الأربعاء، 16 مايو 2012

الفلولين :(


لو
احد الفلولين :)
كسب الانتخابات وبقا رئيس جمهوريتنا
ماحدش يقولي انزلي
مظاهرة
ولا حد يجيب لي سيرة الثورة
وعليه العوض ومنه العوض
حد هيقولي
ليييييييه
؟؟؟
بتقولي كده
ياشمس
علشان الست دي امي
خبطتها في وشي النهاردة وقالتلي هنتخب
شفيييييييييييييق
مع انها كانت مع الثورة
تفتكروا لو خبيت الرقم القومي بتاعها يبقا حرام
بس بجد
لو فعلا الصناديق جابت واحد فيهم
مش نازلة ولا مظاهرة
:(
مااعرفكوششششششششششش
انتوا مين؟؟
من انتم؟؟
شفيق وموسي
!!!!!!

هناك 37 تعليقًا:

Ramy يقول...

أزيك يا استاذة شمس

عارفه يا استاذة شمس لو ان الأنتخابات جابت شفيق بالصناديق منغير تزوير

يبقى خلاص بقى كل واحد عقله فى راسه يعرف خلاصه

بس المشكلة لو ان دة حصل حقيقى و شفيق نجح تفتكرى حضرتك الموضوع هيعدى كدة منغير دم

اتمنى ذلك

انا يمكن لغاية دلوقت مش عارف استقر على مين

بس انا ميال لحمدين صباحى الصراحة

(:

دعاء العطار يقول...

هههههههههههه

لا انا لو فاز اى حد من الاتنين هعتزل الحياة

هروح مستشفى مجانين مش غصب عنى ولا حد هيودينى لا لا انا اللى هروح بارادتى وانا ف كامل قوايا العقليه عشان اريح نفسى من عالم المجانين اللى عاملين نفسهم عاقلين ده :D

رئيس جمهوريه نفسى يقول...

الديمقراطية احترام اختيار الشعب ولو انتخابات نزيهة ونجح واحد فلول يبقي الشعب يستاهل

غير معرف يقول...

شخصيا

هنزل وأنا عارف كويس أوي اني مش راجع بس هنزل

rack-yourminds يقول...

انا واثق ان الشعب سيلفظ الفلول لكن خوفي من التزوير

فاتيما يقول...

معلش يا شموسة

بصى
انا ف نفس المأساة

عندى تلاتة مديرين
اتنين مع الثورة والتغيير جدااااا
واحد فيهم صدمنى من كام يوم
انه هينتخب .. عمرو موشى


اتصدمت
بس مديرى التانى اللى مع الثورة
خدنى براحة وفهمنى
وازعم ان كلامه صح

التطرف بتاع التيار المتأسلم
خلق حالة هروب ناحية تطرف من نوع آخر وهوه الإتجاه للتيار اللى فاكرينه معاكس
..
عارفة
زى اللى بتكره سيطرة ابوها وتسلطه وجبروته
فتروح تنقى راجل شرابة خرج تتجوزه عشان ميسيطرش عليها
فتعانى منه .. زى ما كانت بتعانى من ابوها ....


نفس القصة
الناس عاوز موسى وشفيق
عشان فاكرينهم هيلحقوا البلد من الوقوع ف قبضة التيار الدينى ..
لتلويحهم بالعوف والتحكم

مع ان اللى هيبهدلهم بكرة
هيبهدلك انتا بعد بكرة
ولو كان فيهم خير
ما كنا شفناه من زماااان
وهما مش هيعملوا حاجة
غير انهم يوكسونا اكتر


بس انا مبسوطة
قوليلى ليه ؟؟

اقولك

النقاش مع المديرين بتوعى
اكدلى
ا نفوز شفيق او موسى
هيكون ف مصلحة الثورة
وزى ما انتخابات مجلس الشعب
ما وقعت ورقة التوت عن الاخوان والسلفيين
هتوثعها برضو عن الفلول وعغيرهم

ولو ان اصلا اصلاااااااا
موسى وشفيق قالعين ملط
وكله باين ومثير للغثيان ...
جاتهم القرف

بس مش الكل شايف

منم لله العسكر واللى وراهم
خلوا الناس تهرب من تطرف ...
لتطرف آخر ...

عشان تخلص
ولازم يتعملوا بالطريقة الصعبة
وياخدوا مقلب كبير
عشان يعرفوا
ان مفيش حاجة بالساهل



روقى روقى

وبكرة طنط تقولك
ان كان عندك انتى الحق
زى ما فكرتهم زمااااااااان
ف شهر مارس 2011 وكنت اول واحدة ف شغلى اقول يسقط يسقط حكم العسكر ايام ما كان لسه حتة سكر ...

ومرت الأيام
و كل شوية يكتشفوا ان كلامى صح
دلوقتى الناس بتيجى تسألنى
ننتخب مين وايه رأيك ف كذا
وتوقعاتك
وبفكرهم دلوقتى ...بقدام
ان شاء الله
لما واحد فل يمسكها بمزاجهم
وبعدين يبهدلهم
وتقوم ثورة تانية
و....
معلش
:)

قدر كل زرقاء يمامة ثورة
ف هذا البلد كدا


دى اجابة سؤالك
اللى مفروض يكون
مش .. من أنتم

من احنا .. دا الاهم

احنا الثوار يا شموسة
احنا زرقاويين اليمام يا حبيبتى
واثبت مكانك يا جمييييل

خليهم يتسلوا
:)

مصطفى سيف الدين يقول...

عادي طبعا الست والدتك من حقها تنزل تنتخب شفيق و من حقنا على مصر اننا نخلعه زي ما خلعنا اللي قبله
اتطمني لو شفيق نجح مش هيقع فيها اكتر من اسبوع حتى لو جه بارادة شعبية
متنسيش اصلا ان في قانون عزل سياسي و ترشحه من الاساس عامل مشكلة

إيمان هلال يقول...

لو حد فيهم كسب هنشوف الاكشن اللى على حق ... انا شخصياً هسيب الدراسة واشتغلهم فى الازرق .انا لو منك هخبى البطاقة بما لا يخالف شرع الله

سواح في ملك اللــــــــــــــــــه- يقول...

وتتوالي المفاجأت

انا قابلت واحد اعرفه قاللي هنتخب مبااااارك

قلت له انتخب اللي انت عايزه براحتك بقي

Unknown يقول...

لازم نعمل حركة
امسك اهالينا اللي هينتخبوا الفلول

انا حاسس اني حيجيلي .....
يلا الحمد لله

لــــ زهــــــراء ــــولا يقول...

نفس مشكلتي مع الست الوالدة ههههههه

لولا

beautiful mind يقول...

والله لو الصناديق جابت واحد من الفلول
وكانت دي ارادة الناس ومش بالتزوير
واهلا وسهلا بيهم
بس اياكم حد يقول تاني ننزل الميدان
ساعتها محدش هيسمع لحد

Unknown يقول...

الله يقدّم اللّي فيه الخير .

نرجو صلاح مصر لأن في صلاحها صلاح الأمّة .

تقديري

صاحب الزمن الجميل

ابراهيم رزق يقول...

شمس الشموس

هههههههههههه
فعلا فى بيتنا فلول

تعرفى انى امى فلول بس انا اقنعتها بحمدين صباحى
طبعا اقتنعت برائى بعد ما رفضته فى التعديلات

بصى انا جوز اختى و واختى و و ولادهم التلاتة شفيق
مش عارف فى ناس شايفاه اللارج الظلوم اللى الثوار الشياطين لم يعطوه الفرصة

سلام

♥نبع الغرام♥♪≈ يقول...

والله يا حبيبتى معاكى بكل كلمة بتقوليها

ربنا يستر يارب

)):

محمود المصري يقول...

يعني اية فلول اليس في كتاب الله ماينهانا عن هذا قال تعالي ( ولاتزر وازرة مثل اخري) صدق الله العظيم ومن يقولون علي شفيق انة فلول لانة تسلم منصب رئيس الوزراء لمدة 10 ايام تراهم ينتخبون الافاق ابو الفتوح برغم انهم ضد الاخوان مع انة استمر في الاخوان مايقارب الخمسون عاما ولو هناك عقلا وفكروا قليلا وسئلوا انفسهم سؤال برئ وهو ان من ينضم لجماعة الاخوان مايربو عن 50 عاما ثم يتركهم الان اتراة شخصا لة مبادئ انة يذكرني بالرجل الذي تزوج زوجتة من 50 عاما وعندما ظهرت امامة أمراءة جميلة طلق زوجتة التي عاشرها 50 عاما وهرول الي الجميلة وختاما ان كان شفيق من فلول النظام فماذا تسمون ابو الفتوح واخيرا في اختيارنا لرئيس مصر القادم يجب ان نختار الخبرة فما هي خبرة ابو الفتوح بالله عليكم وليعلم الجميع ان الاختيار ان لم يكن لة منطق فهو اختيار في غير محلة والله أسال ان يررزقنا بمن تحتاجة مصر

Bent Men ElZman Da !! يقول...

ايوه انا بردو قولت اسرق بطاقه ماما ماحدش سمع كلامى اصلها بردو هتنتخب عمرو موسى :D

Tarkieb يقول...

تصدقي انا فوجئت لما كنت باقلب في الهوت بيرد لاقيت كل القنوات المسيحية كمان بتدعو لانتخاب شفيق او موسى والغريب انهم بيقولو صباحي اخوان ومدكن هههههه وقلب ناصري ...عليه العوض ومنه العوض في اللي خلى المسيحيين كمان يفضلو الفلول على اي حد تاني....الظاهر انه مفيش امل

شمس النهار يقول...

اهلا بيكم جميعا بتأسف علي التأخير بس المدونة كانت بعافية حبتين
:))
ان شاء الله ارد علي تعليقاتكم الجميلة وازور مدوناتكم غدا ان شاء الله
:)

شمس النهار يقول...

*Ramy

اهلا اهلا برامي
طولت الغيبة ليه؟

نورتني

انا الحمد لله يارب انت تكون بخير وتكون الغيبة خير

ان شاء الله شفيق مش هيكسب لاتقلق

وحمدين ناصري وجيلي اعتقد شبع من الناصرين
وعلي فكرة ماما خلاص هترشح عمرو موسي

شمس النهار يقول...

*دعاء العطار

اهلا اهلا يادودو فينك

طيب ونبي يادودو خديني معاكي
واهو نبقا ونس مع بعض
:))

شمس النهار يقول...

*رئيس جمهوريه نفسى
ايه ده محمود عندنا يامرحبا يامرحبا

يارب ماتسبش بلوجر تاني بقا

لو الانتخابات نزيه وجه فلول فعلا

يبقا فعلا اغلب الشعب مش عايز تغير
ويبقا ذنبهم علي جنبهم

شمس النهار يقول...

*مصري جدا

ليه بس كده
مش راجع تاني ليه
ان شاء الله مش فلول اللي ينجح

ورغم قلقي الكبير
بس الله كبير

شمس النهار يقول...

*rack-yourminds

التزوير مهمة المراقبين

لو لجان المراقبة اشتغلت صح
التزوير هيبقا في اضيق الحدود
المهم نحاول نقنع المقاطع ينزل

شمس النهار يقول...

*فاتيما

انا لاحظة ان الناس الكبيرة كلهم هينتخبوا ياشفيق ياموسي
خايفين فعلا زي مابتقولي من التيار الديني وخصوصا دول بتوع تحرير المراة

ونبي كلامك زين
:)
وان شاء الله خير

شمس النهار يقول...

*مصطفى سيف الدين

اهلا يادكتور ياقناوي
عملتوا ايه في الشفيق
اسوان واحد ضربوا بالجزمة

وقنا حبسوه
الصعايدة مروقين شفيق

:))
ونبي ماهيطولها لا هو ولا موسي

شمس النهار يقول...

*eman helal

لاتخافي يافتاتي

ماحدش فيهم هينجح

المصرين ماحدش هيضحك عليهم

شمس النهار يقول...

*سواح في ملك اللــــــــــــــــــه

:))

هينتخب مبارك ازاي يعني
:)))
خلاص يدخل اللجنة ويكتب علي الورقة مبارك

شمس النهار يقول...

*Mohamed Amer

لاتقلق هنحطلهم منوم
:)))

شمس النهار يقول...

*لـــولا وزهـــراء

:))
المامهات فلولا ولا ايه :)))

شمس النهار يقول...

*beautiful mind

المشكلة في التزوير
ولازم من مراقبين
في كل حته
ماينفعش انتخابات من غير مراقبين

شمس النهار يقول...

*منجي باكير
اهلا اهلا بصاحب الزمن الجميل
كلماتك اسعدتني
ونرجوا منكم الدعاء لمصر

شمس النهار يقول...

*ابراهيم رزق

اهلا انت فين
ماتعرفش وليد عمل ايه؟

:))
وبعدين في العائلات الفلول دي
:)))

ابعتلك اتنين يقفوا علي بابهم يوم الانتخابات ولا ايه
:)))

شمس النهار يقول...

*♥نبع الغرام♥♪≈

اهلا ياانوسة
تصدقي مبسوطة انك في بلوجر وبتعلقي وتنشري تدويناتك الجميلة

شمس النهار يقول...

*محمود المصري

شفيق ماكنش رئيس وزراء بس
شفيق كان وزير طيران
والعاملين بمصر للطيران والمراقبين الجوين في عهده الرشيد
عملوا اكتر من اضراب واكتر من اعتصام وفي استقالوا
راجع مااقوله علي جوجل
وانت لك راي وانا لي راي وتبقا الحقائق
ويبقا الصندوق حكم
بيننا
ويجب ان نتذكر ان شفيق اسقطه الشعب كما اسقط مبارك
وببجاحته نازل الانتخابات
ولا حول ولا قوة الا بالله
هو مافيش كرامة كده

شمس النهار يقول...

*Bent Men ElZman Da !!

وبعدين بقا في الماماهات دول :)))

احنا نعملهم حفلة كبيرة نلمهم فيها يومين الانتخابات :)))

شمس النهار يقول...

*Tarkieb

التيارات الاسلامية هي السبب في ده
خوفوهم لما شبعوا

والخوف يعمل اكتر من كده
وماتفولش مافيش امل
ان شاء الله خير
انا رغم قلقي المره دي
بس خاسة بتفاؤل كبير ليه مش عارفة