شكرا مش كفاية

شكرا
مش كفاية
ل
محمود ومحمود ووليد الدغري
ورشا عرابي وفاتيما وداليا قوس قزح
وابراهيم رزق وخالد همس الاحباب واسامة الازهري واسلام
وطبعا مينا مش اسف علي الازعاج

الشكر مش كفاية ليييييييييه؟؟
علشان كان المفروض احنا رايحين نسلم علي منامينو قبل مايسافر
اوووم ايه
الاقي تورتة وعيد ميلاد والزمبليطا في الصالون
:))
ودي صورة التورتة اللي اكلوها مني هي والحلويات الشامية :))
وطبعا عايزة اسجل ان بتوع المنصة دوخوني
وانا طالعة من م نصر
وكمان واحنا راجعين داليا وانا
ولفينا حوالين راس الرجاء الصالح
شكرا يااجمل صحبه
وكل سنة وانتم طيبين وبخير وسعادة

مافيش خوف

كتر اليومين دول مواقف واشاعات
عن ان في منقبات او ملتحين بيكلموا الناس يهددوهم
يعني منقبة تقول لمحجبة او سافرة
بكره تلبسي العباية والنقاب غصب عنك
او ملتحي يهدد بنات داخلين المول
ويقول لهم بكره نربيكم ونقعدكم في البيوت
وكده
عايزة اقولكم لا الاخوان ولا السلفين بيعملوا كده
ايوووووووة
دول ناس مااعرفش ملتهم ايه !!
:))
بيحاولوا ينشروا الخوف في قلوبنا
ياريت اي حد يقابل اي حد منهم
يمسك فيه ويلم عليه الناس ويعمل له محضر
اكيد ساعتها هنعرف هو مين وليه وتبع مين
والغريب ان الاعلام مااتكلمش عن هذه الظاهرة
مش كل نساء الاخوان محجبات ولا كمان السلفين
ولا كل الاخوان ملتحين
ونقول يارب

ليلة من الليالي

الاغنية دي ليها ذكريات عندي جميلة
رغم ان المفروض انها حزينة حبتين
:)
بس هي تدل علي الوفاء النادر اليومين دول
مش الحبيبة تتلفت بس
تلاقي اللي ورا منها واللي ورا منها
:))
وهستأذنكم في اجازة سريعة كده
لابد منها
ان شاء الله
اربع ايام بس
وهحاول اتابع او انشر من هناك ان عرفت

الرجيم

من نظرياتي في موضوع الرجيم
اقفلي بوقك تسلمي
:))
بس في ناس مابتعرفش تعمل كده
اوم ايه انا بقا بعد البحث والتنقيب
جبتلهم وصفات تساعدهم علي القفل
:))
الوصفات هنا وميه ميه

بس الاهم من الرجيم وقفل البوق
الرياضة لازم من الرياضة
واللي هتمشي صح وتلعب رياضة صح
لما هتكبر هتعرف ان ده كان في مصلحتها
وهتلاقي نفسها مختلفة عن اللي في سنها
صحتها احسن قاولونها احسن
وضهرها احسن
وماتستغربوش من موضوع القولون ده
الرياضة والمشي بيظبطوا القولون جدا
وان شاء الله
اللي عايزة تخس تخس

قوت القلوب الدمرداشية

هي كاتبة مصرية عاشت في زمن جميل
ولدت1892
وماتت1968
وهي بنت الشيخ عبد الرحيم الدمرداش
مؤسس الطريقة الدمرداشية
وهو من بنا مستشفي الدمرداش
كانت سابقة لعصرها وكل كتابتها كانت بالفرنسية
ولم يترجم منها الا قصة واحدة
واللي عايز يعرف اكتر عنها
يكتب علي جوجل قوت القلوب الدمرداشية
وهيلاقي عنها قصص وحكايات عن حياتها
فريدة من نوعها
حبيت تشاركوني قرائتها
وده لينك قصتها
رمزة بنت الحريم
حقيقي قصة مختلفة جداااااااااااااا

الشاي الاخضر

بقالي مدة بحب اشرب الشاي الاخضر
حبيت اتعمق واعرف ايه اخباره الصحية وفوايده

لاقيت مواقع كتير بتشكر فيه
ولاقيت كمان موقع بيحذر من بعض اضراره

استخلصت من الاتنين ان الواحد لازم لما يجي يعمل حاجة لازم يجيب الكتالوج
:))
ده الموضوع اللي بيتكلم عن الفوائد وهي كثيرة جدااااااااا

وده الموقع اللي بيتكلم عن الاضرار في حالة استخدامه غلط

اول يوم في الحملة

بسم الله الرحمن الرحيم

النهاردة اول يوم في حملة التدوين اليومي

وان شاء الله الحملة دي ترجع الطيور المهاجرة عن بلوجر

وان شاء الله هزور كل الناس
وارحب هنا بكل الناس
وعارفة الوقت مش هيسمح نعلق في كل حته
بس نقرا لبعض ونعمل زي الفيس ممكن تدخل تكتب التدوينة جميلة
تحسس المدون انك معاه
عايزين تتواصل
ونرجع تاني هنا

وبالتوفيق للجميع

علي باب مصر

اغنية لو ركزنا في كلماتها هتفرق معانا كتير

كلاكيت تاني مره

نقطة ومن اول السطر
وربنا يستر

بلوجر

صباح الخير
(للي هيقرا الصبح)
مساء الخير
(للي هيقرا المساء)
زعلااااااااااااانة
ايوة
بلوجر بقا مهجور من حبايبه
ليييييييييييه
مش ده اللي جمعنا وعرفنا بعض
مش ده اللي ناس كتير طبعت كتب منه
مش ده اللي انس وحدتنا في يوم من الايام
مش ده اللي ياما فشينا غلنا فيه
فين المناقشات الحامية
فين الزيارات الجميلة
هجرتوه ليه
ايه الغربة اللي الواحد فيها هنا دي
خلاص نقفل المدونات ونفضها سيرة بقا

الانتخابات

بتكلم مع اللي حواليه سمعت الاتي
عن مرسي
هي*طبعا هنتخبه اومال يعني عملنا ثورة ليه ؟
ماهو عشان نجيب الاسلام
!!!
انا*ليه ياحاجة هو احنا كنا قبل كده كفار مكة:))
احنا عملنا ثورة علشان الفساد كان بقا علي ودنه
علشان عيش كرامة حرية عدالة اجتماعية
-------
هي*طبعا هنتخب مرسي
اومال قمنا بثورة ليه ؟
علشان برضوا يجي شفيق بتاع مبارك طب كنا مشينا مبارك ليه؟
-------
هي*لأ طبعا مش هنتخب مرسي
هو انا مستغنية عن مرتبي دول هيقعدونا في البيت ويلبسونا النقاب
انا*ياحاجة اغلب الاخوان زوجاتهم بيشتغلوا ومش منقبات
-------
هي*لأ طبعا مش هنتخب مرسي
يبقا بنتخب المرشد اللي شبه الخوميني مش عايزة مصر تبقا ايران
وكمان دول عندهم ميليشيات يعني هيشبطوا في البلد ويحكمونا بالسلاح!!
ولو اعترضنا مش هيبقا امن مركزي ده هيبقا انيل
---------
هي*لأ مش هنتخب واحد جماعته هرشوا في راسهم قالك نرشح اتنين
ياصابت ياخابت
وبعدين دول من اول الثورة لحد دلوقتي ماقالوا كلمة ووفوا بيها
اصدقهم ازاي
---------
وكل اللي فوق دول فيهم اللي هينتخب شفيق
وعلي فكرة تحت بند الخوف
---------
ندخل بقا علي شفيق
هي*طبعا هنتخب شفيق
انا*ليه ياحاجة كده
طبعااااااا رجل رضي يتحمل المسؤلية في عز الازمة
وبقا رئيس وزراء علشان يخدم مصر
انا*بس ده رجل شكله بيهددنا فتوة يعني
هي*وهو ده المطلوب احنا عايزين بلطجي يحكمنا ويربينا!!!!
---------
هي*ايوة طبعا هنتخب شفيق
رجل عارفينه وعارفنا مرسي ده مين بقا
وكمان شيك كده وابن ناس!!!
--------
هي*ايوة هنتخب شفيق ده عارف كل صغيرة وكبيرة في البلد
مش لسه هيذاكر!!!
--------
هي*ايوة هنتخب شفيق
اللي هيحافظ علي مصر وهويتها مش اللي تبع السعودية
وعايزها خلافة
وماحدش هيدخل الدقون دي السجن تاني الا شفيق
دول خربوا البلد يعني عاجبك مجلس الشعب
اللي شكله زي مايكون في افغانستان
---------
هي*ايوة هنتخب شفيق
انا ياستي مش عايزة رئيس بدقن
ومش عايزة مصر تبقا السعودية
ونام من المغرب زي الفراخ مين الاخوان دول اصلا
----------
كل اللي فوق ده مش كلامي ده نتاج قعدة حبيت اوصلكم ملخصها
وكل واحد حر في اختياره
بس عايزة اعرف الكلام ده نتيجة الاعلام ولا ايه
مين اللي وصل المصرين انهم ينتخبوا شفيق
؟؟؟؟؟؟

الفور سيزون

من الضهر
وانا مستنية المؤتمر الصحفي بتاع شباب الفورسيزون
ولا حس ولا خبر لحد دلوقتي لعل المانع خير
======
وعلي فكرة
انا ماعنديش غضاضة
اني انشر اي تعليق مخالف لي في الراي
حتي لو فلول
المهم انه يكون لائق ولا يخرج عن حدود الادب
والمدونة عامة ومن حق اي حد يدخل ويعلق بس بأدب
ومن حقي ارد او لا ارد
ومن حقي ماانشرش اي تعليق مش لائق وبه الفاظ لااقبلها
اتكلم زي ماانت عايز بس بالادب
وشكرااااااااااا
اللي يعرف حاجة عن المؤتمر يقولي
سواء هنا او هناك
في تويتر سارق الكلمات

التزوير التزوير

علشان تعرفوا
ان التزوير لشفيق
قادم قادم
كل المسيرات
طول ماهي ماشية تقطع بوستراته
اومال مين بقا اللي انتخبوه دول
:))
؟؟؟!!

نقول تاني(ثورة كاش )

ده بوست
كتبته
بعد خلع مبارك
وكأنه امبارح

نقطة

نقطة
ومن اول السطر

وردة

اغنية حكايتي مع الزمان اغنية كل المصرين

وليالينا
ياصغنونة ياصغنونة بكره نأبك يجي علي شونة

:))
ماتت ونفسها معانا
علي الله بس مانلمش شنطتنا ونهاجر ونغضب ونسيب البيت
:))