الجمعة، 22 نوفمبر 2013

الذكريات والذاكرة

صباح الخير
وانا بدور علي ورقه تايهه مني
لاقيت ورقة صغيرة كاتبه عليها
(اذا كنت تمتلك ذاكرة قوية 
وذكريات مريرة فأنت اشقي اهل الارض) 
اكيد قريتها او سمعتها في اي حته وكتبتها ونسيتها
وطول عمري اقول ان الذكريات الجميلة
بتؤلم اكتر من الذكريات المريرة المؤلمه نفسها
لأن لو في افعال جميلة كده ليه الفراق والنكد
وبمرور الوقت المفروض والطبيعي
ان الانسان بينسي كل شئ مؤلم ومابيفتكرش الا الحلو
وخصوصا في الحب
لو فضلت فاكر الذكريات المؤلمه من حبيبك
وفضلت تنزنز ليه بيها
عمر ماهيستقيم الحال بينكم ابدا
وان دخل النكد من الباب هرب الحب من الشباك
وكلا الطرفين خسروا
بس واحد هيفضل عايش في الذكريات المؤلمة المريرة
والتاني عايش في الذكريات الجميلة المؤلمة 
برضوا 
بس علي الاقل ذكريات عندما يتذكرها يبتسم
ولتستقيم العلاقة وتدوم 
افتكر الاشياء المشتركة
و الذكريات الجميلة
استرجاع الذكريات الجميلة
بيرسخ العلاقة بينكم ويجلب السعادة 
ونقول الحمد لله علي نعمة النسيان
جرب كده يكون حد مات حتي لو شرير
هتلاقي انك مش فاكر له الا الحاجات الجميلة بس
:)

هناك 7 تعليقات:

Gamal Abu El-ezz يقول...

يلجأ البعض للذكريات المريره أحيا حبا فى أن يعيش دور المظلوم الذى جار عليه الزمن
وهناك من يبعد عنها ويهرب للذكريات الجميلة وذلك لانه يحب الحياة أكثر ولكن ليس هناك ذكريات جميلة فى المطلق أو جزينة فى المطلق
كوكتيل الذكريات متنوع زى بالظبطدرجات الألوان بين الأبيض والأسود


تحياتى

سواح في ملك اللــــــــــــــــــه- يقول...

اما بالنسبة للذكري

علي رأي الست ام كلثوم

افتكرلي لحظة حلوة عشنا فيها في

الهوي

وافتكرلي مرة غنوة يوم سمعناها سوا


بتعجبني وسطيتك ياشموسة

وبتعجبني كمان تسليمك بالآقدار وما

حدث قد حدث

فانتي نوعا من الناس لايحب الآلتفات

وراؤه وهذه احدي صفات الشمس

ذلك الاسم الرائع التي اطلقتيه علي

مدونتك وكأنه يعبر عنكي

فالشمس تدور ولاتلتفت خلفها ولا تتوقف

عن دورها في ان تهب الدفئ والنور

للكون



تحيتي ياشموسة

ابراهيم رزق يقول...

شمس الشموس

مش بحب اجترار الاحزان

لكن احيانا بيبقى غصب عننا

جيلان حمزة يقول...

كلام جميل و رائع و أنا من أكثر الناس إحتياجا أني أسمعه .. لأني بفكر جديا أمسح و أقطع كل اللي مكتوب في مذكراتي لأنه اغلبه ذكريات سيئة لكن لم أمتلك الشجاعة بعد .

في حاجة كمان

كنت حابة أسالك عن مدونتك التانية ( مطبخ شموسة ) ... بعد ما قريت فيها و أعجبت بيها جداااااااا أكتشفت انك مش بتكتبي فيها من قرابة السنتين .. ياترى ليه ؟ بجد ياريت ترجعيلها تاني لأنها رائعة و مصرية جداااااا
طب والله انا اتشجعت و نويت أعمل اكله منهم بكرا ..

تحياتي الخالصة و الحارة و تقبليني من متابعينك .
شكرا جزيلا

Foxology يقول...

ومن نعم الله التي لا تحصى علينا .. النسيان .. وعلشان كدة لما حد بيموت ولو كان شرير فعلاً بننسى كل الشر وبنفتكر الذكريات الحلوة بس :)

تدوينة جميلة بجد .. تسلم الأفكار

تحياتي

الازهرى يقول...

:(

Tarek Mageed يقول...

يمكن الناس بتتذكر الذكريات المؤلمة لكى تأخذ منها دروس وعبر للمستقبل علها لا تحدث مرة اخرى . اكيد الناس مش بتحب النكد ولا تجتر الآلم .
ويمكن النزنزة دى من باب ذكر فإن الذكرى تنفع . مش ينفع الناس تعيش من غير ذكريات .
على فكرة الذكرى جميله او مؤلمه دة موضوع نسبى يعنى كل واحد يقدرة بمقدار الآلم الى حس بيه وقد ايه اتوجع ممكن الطرف التانى مش حاسس اصلا ان فى موضوع وهى دى المشكله ان كل واحد عامل لنفسه معيار .
اعتقد لازم الطرفين يراعوا بعض ده ابسط الحقوق ومنحاولش نسيب ذكريات مؤلمة خصوصا للحبيب . لان ممكن كلمه او حركة او لفظ او تصرف توجع وجع السنين .
اعتقد لازم كل واحد يحط نفسة مكان الطرف التانى .
طبعا الذكريات الجميله حاجة لذيذة وممتعه خصوصا بين الأحبه
عفوا للاطاله