الاثنين، 24 أكتوبر 2011

الانتخاااااااااااااابااااااااات !!؟؟

انشرها وإشرحها وثقف البشر تؤجر بجد مش دعايات فارغة...
on Twitpic

بعد دراسة عميقة مستفيضة محولة (اي حولة)
في موضوع الانتخابات
فهمت كده علي قدي
وكنت محتارة افهم اللي حواليه ازاي
ايوة ماهو لازم اللي يفهم مايسكتش يفهم اللي حواليه
الموضوع مش سهل المره دي
ولازم كله يفتح عينه بس مش علشان ياكل ملبن
لا
علشان نحاول نجيب مجلس شعب كويس علي مقاس المرحلة بالظبطت
مش مجلس شعب اوووووول سايز
ده رسم لاقيته علي الفيس وتويتر منتشر وبصراحة كويس ونميس
وماكنتش عارفة انشره هنا
لاقيت الدكتورة ستيته نشراه هناك بطريقة عرفت انشره منها
وكمان دول بوستين من عند الزميل ماجد القاضي برضوا مهمين
البوست الاول
البوست التاني
وادينا نتعكز علي بعض لحد مانفهم ونفهم اللي حوالينا
فاكرين النبؤة بتاعت فتحي سرور!!؟؟:))
وادي النبؤة التانية
مجلس الشعب الجديد بالترتيب العددي
اخوااااااااااان
وطني وفلووول
سللللللللللللفين
وفديييييييييين
باقي التيارات والاحزاب والمستقلين
اما شباب الثورة يبقا يقابلني في الثورة الجاية
وماتقولوش اني محبطة
النبؤة لو صحت هيبقا مجلس جميل:)
وقلبي مع المستقلين الجدد والقدامة الدوائر كبييييييييرة جدا وعلشان يلف هنا وهناااااااااااااااك عايز سنة
اما المراة بقول لها هارد لك المره دي وادي اللي خدناه من الكوتة
المصرين في الخارج علي عيني وراسي طبعا
بس المصرين بره مصر انواع
نوع في الدول العربية ودول من وجهة نظري لازم يدلوا بأصواتهم
وكذلك المصرين اللي في بعثات مؤقته
لكن المصريين اللي هاجروا بره مصر نوعين
نوع مرتبط الي الان بمصر ويعرف عنها اكتر من اللي عايش فيها
ونوع مايعرفش حتي لو رجع شارع بيتهم القديم فين
واولاده ايوة معاهم الجنسية المصرية
لكن مايعرفوش حتي مصر فين علي الخريطة
ومش هيعرفوا اصلا يقروا ورقة الانتخاب علشان بالعربي
يبقا هيفهموها ازاي اذا كان احنا لحد دلوقتي بنحاول نفهم
ونتعرف علي المرشحين عن دوائرنا
قبل مانسمح للمصري بره مصر يشارك
لازم نعرف اللي هيشارك ده فعلا مصري ولا جنسيته مصري بالوراثة مش اكتر
ولازم الموضوع يدرس ويطلع قانون صح يطبق صح مش كل حياتنا كده
قوانين بنج للتهدئة وبس
واتمني لكم انتخابات سعيدة
:))

هناك 31 تعليقًا:

Ramy يقول...

الأنتخابااات هتكون سعيدة حقيقى

((((:

سواح في ملك اللــــــــــــــــــه- يقول...

صدقيني ياشموستنا

الناس البسيطة فاهمة كويس مين اللي وحش

ومين اللي كويس

وبرضه عايزك تعرفي ان الناس البسيطة

نوعين

نوع عارف كويس انه لو باع صوته

هيجيب مرشح لدايرته قد يفيده وقت

الانتخابات فقط وبعد كده ميشوفوش

وده نوع من الناس واعي وفاهم

رغم اميته لكن التجربة علمته

ونوع عنده استعداد يبيع صوته لاي حد

وباي تمن ومنهم العصبجية وخريجي السجون

والبلطجية ودول مفيش فايدة فيهم

لو مش مصدقاني

اسالي الست ام محمد اللي بتشتغل مع حضرتك

الحاجة الوحيدة اللي هتجيب اللي احنا عايزينة

في الانتخابات

هي الكثافة العددية والاقبال

لان البلطجية والمزورين

ميقدروش يعملوا حاجة في وسط سيل من البشر

تحيتي ياشموسة

شمس النهار يقول...

*Ramy

:)))))
ايوة يارامي

بناتي لما نتناقش في حاجة واقول لهم بلاش
ومايقتنعوش ويصروا اصرار
بختم المناقشة ب اتمني لكم.....سعيد او سعيدة

واللي في النقط بقا يبقا رحلة يبقا خروجة يبقا انتخابات

دي كناية علي ان الموضوع مش عاجبني وربنا معاكم بقا

:)))

شمس النهار يقول...

*سواح في ملك اللــــــــــــــــــه

المشكلة ان الناس البسيطة دي عارفة مين الكويس ومين الوحش
في القديم
لكن الجديد ماحدش يعرف عنه حاجة
والفلول والوطني مصدرين وجوه جديدة

كمان طريقة الانتخاب جديدة علي المواطن

شوف ربنا يستر
ويكفينا شر بلطجية الانتخابات
وفوريجية السياسة
وان شاء الله خير

Unknown يقول...

السلام عليكم

أولا: جزاك الله خيرا على الإشارة للبوستات وأتمنى أن يكون ما بها مفيدا حقا.

ثانيا: لستُ معك في تشاؤمك (نعم أراه تشاؤما).. وأنا مع سواح.. وعامة ماذا لو جاء البرلمان كله إخوان أو وفد أو سلفيين... طالما الشعب هو الذي اختار فلا ضير ولا حجر على اختياره... ومن أهم مميزات الديمقراطية أنها تصحح نفسها تلقائيا... فإن جاء الإخوان مثلا ولم يحسنوا فبألف سلامة الدورة التالية!!!

المهم في نظري أن ننشغل بكيف نحافظ على نزاهة الانتخابات (كل منا يؤدي دوره ومسئوليته التي سيُسأل عنها أمام الله).. حتى نمنع (أو على الأقل نقلص إلى أكبر مدى) تواجد الفلول (وهم لا بد سيتواجدون هذه المرة... معلش طبيعة المرحلة الملخبطة اللي إحنا فيها).. لكن عندما يتواجدون بنسبة قليلة فلن يؤثروا في صنع القرار...!!!

هذا والله الموفق.

تحياتي أختي الكريمة.

Ms Venus يقول...

الانتخابات


بحاول اقول فى امل

وربنا يستر

nour alqamar يقول...

بالتوفيق بالانتخابات ياشمووووستنا
بالتوفيق عزيزتى
منوره
مع تحياتى
نور

beautiful mind يقول...

اهم شيء بس في الموضوع كله
الناس اللي غيرت جلدها زي التعابين
ومعروفين ومحسوبين ع الحزب الواطي
ازاي يجيلهم عين يترشحوا تاني
قال وايه عاملين احزاب جديده
وكأنك يابو زيد ما غزيت
فعلا دي لعبة قذرة
وقانا الله شرها

غير معرف يقول...

كاتب درافت من فتره في الحكايه دي تحديدا لكني تراجعت عن نشره

أعتقد أننا نعشق الصعب ولن نتعلم الا من خلال الطريق الصعب التجربه والخطأ

بيكون تعليم قاسي طبعا لكنه لا ينسى أبدا

شمس النهار يقول...

*ماجد القاضي

وعليكم السلام ورحمة الله وبركاته

انا اللي بشكرك انك تبت البوستات الجميلة دي

واتمني ان كل اللي عنده رؤيا للموضوع ده يكتب برضوا


علي فكرة اناماعنديش مشكلة مع الاخوان بالعكس تماما
مش عارفة ليه انت دايما فاهمني كده
:))
الاخوان هو الفصيل والتيار والجماعة والحزب الوحيد المنظم اللي عارف بيعمل ايه
وله تاريخ طويل في الشارع المصري
وفوق هذا الاخوان اكثر الفاهمين الواعين للأسلام في نظري
ومش بتكلم كده
لا
بتكلم من منطلق قربي منهم

وانا مش متشائمة من الانتخابات
ولكن الوضع فارض عليا التخوف
مع هذا التسيب الامني المقصود
مع هذا العدد الكبير من البلطجية في الشارع المصري
مع العلم انهم ممكن يتلموا في ليلة واحدة

متخوفه مما اراه من الفلول والحزب الوطني من تواجد وبشدة في الساحة
مع تعمد المجلس عدم اعلان قانون العزل السياسي

الي اخر المشهد مما يضر بالعملية كاكل
ونقول ربنا يستر
ونحاول نعمل اللي علينا ونرضي ضمايرنا

شكرا لك

شمس النهار يقول...

*Ms Venus

نحاول نعمل اللي علينا

وان شاء الله خير

Mina يقول...

مع كامل احترامي لرأي حضرتك طبعا
ومع كامل احترامي برضو لحالة القوقعة اللي انا فيها:)
بس انا اتخضيت من حاجة وكان لازم ادلو بدلوي فيها :)))))
اتخضيت من رأي حضرتك في موضوع المصريين في الخارج واننا لازم نفرق بين المصريين هوىً وهوية وبين المصري بالاسم وبالوراثة وبس
طيب ودي هانعملها ازاي
هل هانرجع لمحاكم التفتيش
ولا هانعملهم اختبار وطنية قبل السماح بالانتخاب؟
وحتي لو كان ده متاح وممكن نعمل اختبار وطنية
فهل كل المصريين الموجودين في مصر وطنيين اكتر من المصريين اللي مايعرفوش حاجة عن مصر؟
بلاش موضوع الوطنية
نخليها ان قصد حضرتك انهم مايعرفوش مصلحة البلد لانهم مش عايشين فيها
طيب ماهو تلات ارباع المصريين اللي عايشين في مصر برضو مش عارفين وبيمشوا اما وراء العاطفة او المصلحة الفردية
اسف جدا علي رأيي وان بدي فيه بعض العصبية (من الاعصاب مش التعصب ) وان كان والله ماهواش كدة خالص :)))
بس اول خطوة لتدهور دولة القانون هو التفريق بين الناس في القانون
ايا كان التفريق ده بين مين ومين
مصريين بالخارج والداخل
مصريين متعلمين وغير متعلمين
مصريين مثقفين وجهلة
مصريين متدينين وعلمانيين
التفريق والتمييز مرفوض مطلقا واطلاقا
عفوا علي الاطالة
.............
بين قوسين بقي
ازي حضرتك اخبارك ايه يارب تكوني بخير :)

Unknown يقول...

السلام عليكم
شكرا يا شمس على البوستات ، جارى القراءة ، و أتمنى أن يكون البرلمان اللى جاي على مقاس المرحلة فعلاً.

ابراهيم رزق يقول...

السلام عليكم

انا قريت البوست من اول ما نزل و مش عارف اعلق

تعرفى فيه مرض نفسى اسمه اكتئاب ما قبل
مثل اكتئاب ما قبل الولادة
واكتئاب ما قبل الامتحانات

انا حاليا مصاب باكتئاب ما قبل الانتخابات
العملية لا تبشر و الديمقراطية التى يتشدقون بها ديمقراطية بغيضة لاننا ننتخب من الاسوء و ليس من الافضل
و القاعدة تقول الاختيار من الاسوء اختيار سىء
الناس المحترمة فى البلد دى حاجتين
يا متعففين عن الخوض فى الانتخابات بمعاركه القذرة
يا دخلهم محدود و لا يستطيعون خوض المنافسة التى تحتاج دعم مادى لا قبل لهم به
من اين يأتى التفاؤل و اى ديمقراطية يتحدثون عنها
اى ديمقراطية تجعلنى اختار من بين
برجماتية و لصوص و متشددين و جهلة تفتكرى ماذا تفرز تلك الديمقراطية

تحياتى و تقديرى

Foxology يقول...

أولا : ألف شكر بجد على التوضيح وهنشره ان شاء الله فى تدوينة خاصة ، لأن الموضوع كان فيه غموض وناس كتيرة مش فاهمة اللى بيحصل ولا عارفة هتنتخب ازاى .

ثانيا : نبؤة فتحى سرور أعتقد انها ممكن تتكرر بس أكيد هيبقى فى صراعات لأن الكل طمعان المرة دى

تحياتى

Unknown يقول...

تحياتي لفكرك المستنير و طرحك القويم

إنشاء الله الأمور في تونس في الاتجاه الصحيح و ليبيا و كذلك نريد انشاء الله المحروسة

حفظكم الله و رعاكم .


^جديد الزمن الجميل : أحبّك ..!




*

شمس النهار يقول...

*نور القمر

ده نورك
نور القمر
:)))

ادعي لنا
وان شاء الله خير

شمس النهار يقول...

*beautiful mind

ضحكتني
من سؤالك يجيلها عين ازاي

هي دي ناس اصلا عندها عين تبصر بها

دي ناس مغيبة عن الحق
مايهمهمش غير المصالح

ربنا يقينا شرهم

شمس النهار يقول...

*مصري جدا

تصدق مش عارفة ليه عندي احساس ان المصريين هيخلفوا التوقعات
والتنبؤات
:)))

بس كان نفسي شباب الثورة الحقيقين يدخلوا المجلس

ونحط تحت الحقيقين مليون خط

شمس النهار يقول...

*Manamino

منامينو عندنا يامرحبا يامرحبا

:))
والحمد لله انك اتخضيت علشان تطلع من القوقعة
:))
لو كنت اعرف كده كنت خضيتك من زمااااان
:))
ندخل في سبب الخضة
انت عارف ان ضد تعصب اصلا
ولكن
انا قابلت وقعدت وعشت مع الجيل الثاني والثالث من المصرييين بالخارج
وخصوصا النمسا وامريكا
الجيل ده لايعرف عن مصر حتي موقعا علي الخريطة
وبمااني غلباوية ياما قعدت اتناقش معاهم لما دماغي طقت
ان ماينفعش مايعرفوش حاجة عن يلدهم
واصلهم وهويتهم
جيل حتي مابيعرفش يتكلم عربي
تقدر تقول لي ده هيشترك معاك ازاي
كمان في جنسيات بتشطرت ان المصري يتنازل عن جنسيته الاصلية ولا يجمع بين الاتنين وهو في السر كده بيحتفظ بيها
صدقني انا مش ضد ان يصوت المصريين بالخارج بالعكس انا عشت بالخارج ده وعارفة يعني ايه الحنين وتلهف اخبار الوطن
وعلي فكرة اشترك في جروب يؤيد الطلب
ولكن انا ضد ان نضع قانون مسلوق لايفي بالغرض
انا عايزة قانون مدروس يحترم
وده نسيبه لأهل القانون والعلم هم اولي به منا
لكن علي الاطلاق كده
تقدر تقول لي ستحدد الدوائر علي ايه بالنسبه لدول
بلاش
تقدر تقول لي مين فيهم معاه الرقم القومي او حرص ان يكون معاه رقم قومي
اللقاء التدويني القادم هحكي لك بعض ممااعرف عن الجيل التاني والتالت بره مصر
وهحكي لك عن الجيل الاول بعض الحكايات ومن ضمنهم واحد عمل ايه في بسبورة المصري بعد مااقسم القسم لأمريكا بالولاء
وان عرف السبب بطل العجب
:))
بس بجد انا سعيدة وتستحضرني اغنية فيروز رجعت ليالي زمان
ايووووووووة زمن التعليقات والمناقشات هيرجع ولا ايه؟؟
:))))

Mina يقول...

لا بقي
ده انا اللي لو اعرف الحفاوة دي كلها كنت جيت هنا من زمااااان :)))
والله انا فعلا اللي وحشتني ليالي زمان بتاعة ستنا فيروز ووحشتني المناقشات والخناقات :)))
نرجع للخناقة :)
اولا هارد علي بعض استفسارات حضرتك وبعدين اقول رأيي تاني بصورة مختصرة
1- الرقم القومي موجود في الباسبور الجديد واللي مامعاهوش باسبور جديد وماهتمش انه يجدده من السفاره في البلد اللي قاعد فيها وحابب يشارك في انتخابات بلده هايروح يجدده او يعمله لو ماكانش عنده اصلا ولو مش مهتم اصلا يبقي يتحرق مش هانجيبه ينتخب بالعافية

2- القانون المصري بيشترط علي من يتجنس بجنسية اخري غير المصرية انه يخطر وزير الداخلية ولابد ان تتم الموافقة من وزارة الداخلية واذا لم يتم الاخطار في خلال سنة من حصوله علي الجنسية الاخري فتسقط الجنسية المصرية عنه
وطبعا اللي اتنازل عن الجنسية المصرية واخد الجنسية التانية ومحتفظ بالمصرية في السر ده ماقالش ولا اخطر حد فالتالي هو اصلا ساقطة عنه الجنسية وماهواش مصري اصلا ولو الخارجية بقي ولا الداخلية (مش عارف مين المسؤول عن ده) مش عارقين يحصروا الناس دي يبقوا مش شايفين شغلهم كويس

ولو ان اصلا اصلا مش معني ان حد اتنازل عن الجنسية المصرية عل يالورق علشان ظروف البلد اللي هو فيها بتحتم عليه ده فهو مش وطني ومايستاهلش انه يشارك في مستقبل بلده كلنا بنعمل بلاوي سودا ع الورق وبنقول ياسيدي ده كله كلام علي ورق فبلاش نحكم علي نية حد ونقول انه اتنازل عن جنسيته والكلام ده كله وبعدين حتي اللي بيتنازل عن الجنسية المصرية يقدر تاني بمنتهي البساطة انه يقدم اوراق للحصول علي الجنسية مرة تانية لانه ابن مصري وله الحق في الحصول علي الجنسية بالوراثة في اي وقت

3- موضوع الدوائر بقي فانا مع حضرتك في ان اصحاب القانون والمشتغلين به هم اللي من حقهم بس تحديد ده
من الناحية الاجرائية بس
يعني هم اللي يقدروا يحددوا كل واحد هاينتخب فين وازاي وايه الضمانات وبعدين احنا مش هانخترع حاجة ما كل الدول ليها رعايا في الخارج وبينتخبوا عادي جدا والله نشوف لنا طريقة حلوة كدة تناسبنا ونختارها
دي السودان خلوا رعاياهم في الخارج ينتخبوا
الموضوع مش صعب قوي علي فكرة المهم نكون عاوزين ده
.......................
هارجع تاني اقول لحضرتك الموضوع مش موضوع اجراءات ولا النقاش علي هايتم ازاي وايه الضمانات لان دي شغلة القانونيين
انما تعليقي هنا علي المبدأ نفسه
مشمعني ان حد مابيحبش مصر انه امنعه من حقوقه
طيب وفيه كام واحد هنا بيكره مصر وام مصر
كام واحد هنا قال طز في مصر وابو مصر
هل هامنع كل الناس دي؟
وهامنعهم علي اي اسا اصلا
حتي لو واحد قطع الباسبور بتاعه
هل ده حكم علي عدم وطنيته؟
يقدر يعمل باسبور جديد لو عايز يشارك ولو مش عايز خلاص يتحرق
واللي مابيعرفوش يتكلموا عربي برضو مش مقياس للوطنية ولا لحب وطنهم
واجرائيا ماهواش عائق للمشاركة
طيب ما احنا عندنا 40 في المية من المصريين في الداخل مابيعرفوش يقروا ولا يكتبوا عربي
هل هانمنع دول كمان من المشاركة لانهم مش هايعرفوا؟
الاستمارات موجوده واللي يعرف ينتخب واللي مابيعرفش يا اما يعزف عن المشاركة بمزاجه او يدخل يجرب يا اما يفلح يا اما تبقي استمارة باطلة ايه المشكلة
.................
برضو باختصار تاني
الاجراءات لاصحاب القانون
المبدأ هو مانرفض فيه التمييز باي شكل من اشكاله
نقطة اخيرة
حضرتك قولتي في الاول انك مع ان اللي موجودين في دول عربية لازم يشارك طبعا
طيب اشمعني الدول العربية
طيب ماهو فيه ناس في الدول العربية برضو مولودين هناك وماشافوش مصر ولا يعرفوا بيتهم فين
وفيه ناس منهم بيكرهوا مصر والمصريين عمي
وفيه ناس برضو شايفين المجتمع المصري مجتمع كافر والقوانين اللي فيه قوانين فاسدة
هل لانهم فقط مش معاهم جنسية البلد اللي عايشين فيها يبقوا وطنيين اكتر من اللي معاهم جنسية تانية؟
..........................
علي فكرة
تونس مش بس سمحت للمغتربين في الانتخاب
دي كمان سمحتلهم بالترشح
فيه 18 مقعد في البرلمان للمغتربين
:)))
تحياتي لحضرتك
وحضرتك عارفة طبعا قد ايه انا بستمتع بالمناقشة مع حضرتك سواء علي البلوج هنا او في اللقاءات التدوينية العظيمة :)

شمس النهار يقول...

*ريهام المرشدي

اهلا بيكي ياريهام

وندعي ربنا ان فعلا المجلس يبقا زي الفل

علشان نعرف نشوف اللي بعده
:))

شمس النهار يقول...

*ابراهيم رزق

شوف ياابراهيم
احنا مش عايزين نكتأب لييييييييه؟؟
علشان لو اكتأبنا
مش هنعرف نعمل حاجة

وعندي احساس ان ربنا هيخلف الظنون

ونقول يارب
:))

شمس النهار يقول...

*Foxology

الشكر ليك ياابو يوسف انك هتنشرها

وان شاء الله خير
زمن ناحية الكل طمعان فاالكل طمعان يكتب اسمه في التاريخ
المجلس القادم تاريخي
سواء كان كويس او مش
فهو سيذكر في التاريخ
كأول برلمان من بعد الثورة

شمس النهار يقول...

*منجي باكير

اهلا بيك ياباكير

وشكرا علي كلامك
وان شاء الله تونس وليبيا من اجمل الي اجمل

:))

شمس النهار يقول...

*Manamino

طبعا حفاوة ابن من ابنائي عاد الي البيت الكبير اللي بيجمعنا كلنا

:))

ورجعنا للمناهدة تاني
:))))
اه ياني
:)))
1-مااختلفناش بس اللي ماتعرفوش بقا ان بعضهم يسعي الان ليخرج البسبور المصري الجديد لأولاده
اللي همه مايعرفوش مصر اصلا ولا يعرفوا اي تيار ولا حتي نادي رياضي
:))
2-كلامك صح بس اللي ماتعرفوش ان اكترهم ماعملوش كده علشان اسباب كتير اهمها وجود ورث في مصر يخاف يضيع عليه مش بقولك الموضوع كبير
اولهمم اخويا معاه الجنسية الامريكية من 25 سنة ومعاه الرقم القومي وبسبور مصري وزي الفل ولمابابا مات جه وورث وكله تمام
:))
3-لم نختلف مره اخري
حيث اننا نوكل اصحاب الفكر والقانون يضعوا القوانين زي مايحبوا
انت عارف لي صديق متزوج من نمساوية ومخلف منها ابناء والنمسا بتسيب الجنسية الاخري لاتسقطها
الولد اللي سنه جه للتجنيد فضل يقضي التجنيد في النمسا
ولا يخدم في الجيش المصري
رد انت بقا علي ده هتخليه ينتخب وهو هناك الان يخدم في جيش النمسا؟؟؟
مش بقولك الموضوع كبير
اختلف معك انك بتقول ان اللي مابيعرفوش يتكلموا عربي
اين هنا الانتماء
هو يعني ايه وطن يعني ايه انتماء
انا عاشرتهم لاانتماء لهم ويحتقرون المصريين اصلا بنوا جنسهم
من ينتمي لبلد يحرص علي تعلم لغتها والتعرف عليها لاتجاهلها واعتبارها متخلفه
المصري اللي عايش في مصر يسبها ويشتمها لكن بيدوب في دباديبها ووقت الجد نزل التحرير
يشتمها ويقطع اللي يجيب في سيرتها
زي ماتكون امه
منمينوووووو
انت قلت اللي بيشتغلوا في الدول العربية مش المتجنسين وقلت اللي في بعثات مؤقته
:)))))))
لكن من تجنس بجنس اخر غير المصرية اسمح لي فيهم حالات لايمكن باي حال من الاحوال ان اسمح له بالمشاركة
وعايزة اقولك ان فيهم ناس بيبقوا موجهين
ونقول يارب يعملوا قانون لأشتراك المصريين في الخارج
وعلي فكرة تونس والجزائر والمغرب مابيسقطوش الجنسية عن مواطنيهم اذا اخدوا جنسية اخري
:))))
ونقول يامرحب يامرحب بالمعارك
:)))))))
منور يامنمينو منور
:))

غير معرف يقول...

السلام عليكم
يمكنكم الانضمام لفريق عمل مدونتى حيث الربح الحقيقى دولارات
او اذا كنتى من محبى التدوين فحن نرحب بكم
فى انتظار ردك
http://modawantyxp.blogspot.com/p/join-team.html

Carmen يقول...

ربنا يستر .. يمكن

شمس النهار يقول...

*محمد جمال
معليكم السلام ورحمة الله وبركاته

ان شاء الله لما ارجع من السفر اشوف ايه الموضوع

واكيد طبعا من محبي التدوين
:))
اومال عاملة المدونة ليه :)))

لكن مش من محبي الفلوس
خلقت ربنا كده

شمس النهار يقول...

*Carmen

ان شاء الله خير
:)

غير معرف يقول...

متحاوليش تفهمي اي حاجة دلوقتي

لسه غبار المعركة عامينا كلنا

بس كل مرة الاداء بيتحسن ، ومحدش هيصلح حال البلد دي غيرنا