الخميس، 12 يوليو 2012

المجلس


بجد مش فاهمة موضوع المجلس ده
ياريت اللي فاهم يفهمني
مش لما طلع حكم المحكمة الدستورية بحل البرلمان
اقيمت الافراح والليالي الملاح
علي النت وفي الحياة العامة
حتي الست اللي بتشتغل معايا (ام محمد)
قالت في داهية همه عملولنا ايه
دول عايزين يقعدونا في البيت ومين هيصرف علي العيال بقا
ده غير
ان كنت كل مااقابل حد الاقيه فرحان فيهم
طيب بذمتكم ده كان شكل مجلس
مين فينا مااتريقش عليهم وعلي كلامهم
وانه مجلس بلا صلاحيات
اووووووم ايييييييييه
دلوقتي الدنيا هايصة
لأ
المجلس مايمشيش
ليه ياابا الحاج
قالك كده ده مجلس منتخب من الشييييعب
:))
طيب ماهو باطل
والتيارات او الاحزاب كانت عارفة من الاول ان الفردي باطل
اصل الانة انهم طمعانين يبقوا اغلبية
لييييييييييييه
علشان يحطوا الدستور
ايووووة الدستور لازم يبقا اسلامي
علشان باقي الشعب اللي همه كفار مكة يتربوا ويسلموا
ومش محتاجين المجلس اكتر من شهرين
يدوب نظبطت الدستور ونحله
وبمناسبة رمضان حالو ياحالو
:))
عقبال كده مامرسي يوقع قرار الافراج عن المعتقلين السياسيين
ويرمضنوا في بيوتهم
ولا دول مايلزموش المرحلة دي

هناك 17 تعليقًا:

Bent Men ElZman Da !! يقول...

انسب كلمه سمعتها على اللى بيحصل دلوقتى
ماحدش بقى فاهم حاجه !!

مصطفى سيف الدين يقول...

مرسي مش فاضي للمعتقلين
معاه حاجات اهم
اثبات القوة و فرد العضلات
و تنفيذ مخطط الاخوان
المجلس اتلغى الناس اتعاطفت مع الاخوان قالوا خلاص مبقاش في ايديهم كل حاجة صوتت لمرسي و بعدين رجع كل حاجة فلاش باك
و مشهد النهاية و احنا حارقين دمنا مرسي و طنطاوي نازلين من عربية واحدة
مبارك كان معاه حق لما قال كبر مخك فعلا احنا نكبر مخنا و نسيبهم يلعبوا

أندروميدا يقول...

اعتقد ان سر الأزمة .... ان في مصر الآن اكثر من مجلس ... مجلس عسكري ... مجلس شعب ... مجلس شوري الجماعة ...وهلم جرا .

ان السر في الأزمة ... هو النزاع بين المجالس ... وتفرق الجماهير بينهم ... كل بحسب ما يرضيه .

الغريب ان الثورة جاءت ... من أجل النهوض ... ونحن نتنازع علي مفهوم الجلوس !!

تحياتي

الازهرى يقول...

انتى صدقتى ؟؟؟؟

يا خساااااااااارة

سيبيهم يلعبوا ويتسلوا

وخلينا نتفرج ونضحك

كلام حسام يقول...

الحقيقة محدش فاهم اي حاجة في اي حاجة :)

شمس النهار يقول...

*Bent Men ElZman Da !!

ومش هنفهم
بعديييييييين لما نبعد اوي والتاريخ يتكتب
هنعرف ايه اللي حصل
زي كده ماعرفنا ايه اللي حصل ايام زمان
ناس هتكتب التاريخ صح وناس هتكتب غلط
ومن بينهم هنعرف اللي حصل بالظبط

شمس النهار يقول...

*مصطفي سيف الدين

ايوة هو صراع قوة
مين هيمشي كلامه علي مين

وعلي جثة مين
مصلحة مصر والشعب اتخدت تحت الرجلين خلاص
ومش فاهمة هو سايب الدنيا هايصة ورايح السعودية يعمل ايه
ده وقته ولا رايح يكمل اللي ابتداه حسن البنا مع السعودية

شمس النهار يقول...

*اندروميدا

لأ ده احنا عندنا تشليون مجلس
:))

المشكلة كمان ان اللي مع ده بيخون اللي مع ده
واللي بقا بينقد الاخوان بقا من كفار مكة

:))
وبيقينا عاملين زي عم ايوب
هنهض ونبي هنهض
:))
ماتقلقوش
ياسيدي مش قلقانين ادينا صابرين
بس ماتغبش كتير علشان الشعب ده دلوقتي غير الشعب اللي فات

شمس النهار يقول...

الازهري
:))

المخلوع قالها وتقولش لصقت فينا
من يومها واحنا مش ملاحقين علي التسالي
:))

وايه ياعم الكلام الكبير اللي انت بتكتبه ده
لأ تقدمنا كتيييييير
:))))

شمس النهار يقول...

*كلام حسام

الحاجة الوحيدة اللي انا فهماها

اننا عملنا ثورة
جه عسكرون والاخوان خطفوها
وكمان بيتخنقوا عليها

سواح في ملك اللــــــــــــــــــه- يقول...

شموستنا الطيبة

المجلس فيه تلاتين مليون صوت انتخبوه

يطلع بقي دستوري او مس دستوري

حل المجلس جور علي حق تلاتين مليون صوت

لآن المواطن مالوش دعوة

كل اللي يعرفه ان باب الآنتخابات انفتح

فنزل وأدلي بصوته

متجيش بعد كدة تقوللي باطل

تحيتي ياشموسة

;كارولين فاروق يقول...

انتي عشره علي عشره
انا مش مع اللي بيحصل ده ابدا
اصبحت فوضي اكتر ما هي فوضي
خلاص مصر بقت بلد العجايب
تحياتي

faroukfahmy يقول...

شمس النهار
الصين نجحت فى كل حاجةلكن نقصها داجة واحدة ممكن تكسب فيها الملايين وهو اختراع فهامة للشعب المصرى لانها فعلا نقصانا وياريت تشتغل فى شمس النهار قبل ما الدنيا تغيم ياشمس النهار

شمس النهار يقول...

*سواح في ملك اللــــــــــــــــــه

ماهو الكلام اللي انت بتقوله ده هو اللي كانوا بيلعبوا عليه

لكن احنا المفروض دولة قانون
وماعملناش الثورة برضوا علشان نتحدي القانون

همه كانوا عارفين ان ده مش مع القانون وغير دستوري
وفي راي الاغلبية غير اخلاقي بالمرة
انت كاحزب عملة قايمة ليه بتلتف علي القانون علشان كمان تستحوز علي الفردي وتحرم المستقلين من مقاعدهم علشان تعمل كده
فاكر ايام المخلوع لما الحزب الوطني رشح مستقلين مش من الحزب ولما نجحوا انضموا للحزب
كان علشان كده اترفع قضية وبقا غير دستوري
لا يصح الا الصحيح
وانا شخصيا فرحانة فيهم علشان اولا الشعب المصري ماحدش هيضحك عليه تاني
وكمان علشان الطمع قل ماجمع

شمس النهار يقول...

*كارولين فاروق

:)
انتي اللي عشرة علي عشرة يابرج السرطان ياجميلة

هي حبه حبه هتتظبط
ومصر محروسة
:)

شمس النهار يقول...

*faroukfahmy58

ان شاء الله خير

وطول ماالشمس بتطلع
مصر محروسة
:)
والشعب المصري البسيط
ماحدش هيضحك عليه تاني

Dr. Ibrahim يقول...

الباطل كما تفضلتى هو الثلث الفردى فقط
فبأى حق يقوم المجلس العسكرى بحل المجلس كله؟!!

هذا قرار إدارى وليس حكم قضائى..
والمجلس العسكرى يقوم بعمل لعبة قذرة..

والمجلس بالفعل عمل انجازات فى 45 يوم اعترفت بها صحيفة المصرى اليوم فهذه الانجازات لم يقم بها برلمانات مبارك فى 30 سنة...