المفروض النهارده
انشر اول تدوينه عن ابناء بلوجر الرائعين
بس عايزة اهمس في اذن كل زوجة ابن همسه صغيرة
كده علي الصبح
وانا مستنيه دوري عند الدكتور
كان في بنوته جميله
عماله ترغي في الموبايل مع صحبتها وكله سامع
ولاقيتها بتقول لصحبتها
اييييييه هديه وكمان اروح
دي كبرها كل سنه وانتي طيبه علي الموبايل
ومن تخت الدرس كمان
مش هديه عيد الام
عيد الام للأمهات مش القراشانات
وضحكت ضحكه مستفذه
كل اللي قاعدين اترسمت علي وشوشهم
تعبيرات مختلفه كلها تعني الاندهاش والقرف
لاقيت ست كبيره جنبي بصتلها بحده
وقالت لها مسيرك يامراة الابن تبقي حما
حسيت برتياح شديد علي وجوه الناس من كلام الست الكبيره اللي نزل زي الشاكوش علي دماغ البنوته اللي بصتلها بقرف واخدت بعضها ومشيت راحت فين الله اعلم
وعايزة اقول لبناتنا المتزوجات
عمرك ماهتعاملي حد كويس وهيعاملك وحش
اعتبريها امك ومش عايزة اسمع انا ليه ام واحده بس
لأ
لمابتتزوجي بقا ليكي اتنين
وعايزة اقولك
ان دي اللي انجبت الشاب اللي بقا زوجك
ودي امه هو شخصيا لما هيشوفك بتكرمي امه هيكرمك
واعرفي انه لو جه معاكي ضد امه يبقا مالوش خير فيكي
علشان اللي مالوش خير في امه مالوش خير في حد
وهيقلب عليكي في يوم من الايام
واعرفي ان انتي قابله للتغير:))
لكن الام مابينفعش نجيب واحده تانيه غيرها
وكمان دي جدة اولادك ماتقطعيش اولادك بينكم
ويبتدوا يميلوا لحد علي حساب حد
الحب والحنيه والود بيصنعوا المعجزات
وفعلا مسيرك يتعمل معاكي اللي هتعمليه مع حماتك
وكل سنه وكل الامهات بخير وصحة وسعادة
وربنا يبارك في عمرهم
هناك 39 تعليقًا:
شمس الشموس
كل سنة و انتى شمس
كل سنة و انتى قمر
كل سنة و انتى طيبة
يعنى كل سنة و انتى حنان
يا بخت بناتك بيكى
تحياتى
الدايرة الصعبة
مرات الإبن اللي مقبلة على الحياة وكلها أمل في السعادة ولسه بدري عليها في المكر واللؤم هي الغلطانة
ولا الحماة الست الكبيرة اللي أعطت عمر بحاله ومنتظرة تاخد وفاء واحترام واحتواء وحب وإجلال
دايرة متخلصش لآخر المدى
لكن لها حلول
والحلول في يد زوجة الإبن لأن زي ما بتقولي يا شموسة
الحماة كبرت ومش ها تتغير
1- اشغلي نفسك بما شغلك الله به
ساعتها مش ها تقعدي تفندي كلام حماتك بالكلمة
2- لومي زوجك وعاتبيه في بيتكم
مش علشان يروح يلوم أمه ولا يزعلها
لكن علشان تفرغي فيه خطيئة أمه وتنامي وليس في قلبك شغل بإنسان
3- فوتي كل شيء فيما عدا ما يخص الكرامة والكلام المباشر اللي في الوش
علشان ضرب الوش مفهوش معلش
بس قبل ما تردي أو تاخدي أكشن
إدي نفسك 10 دقائق في بلكونة
شباك
سيجارة
ها تردي بالشويش ومرتبة أفكارك وخدي بالك إن النسب لبن إذا تعكر لا يصفى أبدا
لكن الإنسان ذو الكرامة محترم وله هيبة حتى لو من تحت الضرس
4- وحطيها قبل 1 و 2 و 3
ربنا
لو اللي بينك وبين ربنا عامر
ها يعمر اللي بينك وبين الخلائق
رغم أنفهم
وإن كرهوا
وإن رغموا
وإن رغبوا
ربنا
الله
دعاء لله أن يصلح بيتك ويؤدم ذات بينك وبين حبيبك
وربنا يكرمكم جميعا بنات وشباب
وانزاحوا كده علشان أقول لشموسة كل سنة وإنتي طيبة يا فنانة
يارب تفرحي بالبنات وازواجهم وعيالهم ويكرمك ويعوضك ويرضى عنك ويحسن إليكي:)
هههههههههههههههه
حلوه قابله للتغيير دي
شكلنا كده بنقبل حاجات كتير
عموما البوست جميل
ومعاكي حق في كل كلمة قولتيها
ربنا يهدي الحموات والزوجات وكل اللي اخرهم ات دول هههههههههههههه
اصلهم جبارين بصراحة
تحيـــــــــــاتي
كانت هنا ورحلت
Asmaa Fathy
داين تدان ده اللي اقدر اقولهولها ... حماتك يعني مامتك التانية لو انتي مفهمتيش كدا يبقى امك معلمتكيش صح
ناس كتير اول ما تعرف ان ملهاش حما تفرح وتطنط م الفرحة بالعكس الحما بابا للجنة مفتوحلك يا استاذة ياللي بتطنطتي وانتي مـأخدتيش بالك
انا بقى يا شموسة واحدة من الناس اللي طول عمرها كاان نفسها يبقالها حما عشان امي عملمتني صح وربتني صح
كل عام وانتِ بسعادة ياشمسة بلوجر (:
لولا
شمس شموسنا المنورة
انتى فكرتينى بموقف يجب ان يعيه الجميع وهو ان دعاء الحماه ابرك من دعاء الام لان دعاء الحماه من القلب ومردود عن عمل طيب اما دعاء الام لاولادها فعلى السراء والضراء
اتمنى ان تكون الفكرة قد وصلت
كلمات جميله فقط لمن يفهمها
ومن يقتنع حقا بمعني
كما تدين تدان
تقبلي مروري
تحياتي
*ابراهيم رزق
كل سنه وانت طيب
ووالدتك بخير
وزوجتك
وامهات المستقبل ساليناز وسولينا
:))
*ستيتة
اهلا اهلا بالحبايب
تعليقك اثري التدوينه واداها طعم تاني
وكل سنة وانتي طيبه وبخير وسعادة وفرحانه بحبايبك
نورتي شمس النهار:)
* asmaa fathy
ربنا يهدي الجميع
والله بالايمان والحب كله هيبقا تمام
:)
* لــــ زهــــــراء ــــولا
كلامك جميل يالولا
كلامك صح
كل سنه وانتي طيبه وبخير وسعادة:)
* faroukfahmy58
والدتي كانت بتقول لي كده لما تسمع حماتي الله يرحمهاتدعيلي
كانت تقول لي دعوتها اجمل من دعوتي
انا بدعيلك علشان انا امك لكن هي بتدعيلك علشان معاملتك ليها
كل سنه وحضرتك طيب:)
* salwa abdelhalim
سواء فهموا ام ل
هو ده اللي هيحصل
مافيش حاجه بتعدي
:)
كل سنه وانتي طيبه
كلامك صح مية بالمية يا مدام شمس,, أنا في الموضوع ده عندى وجهات نظر كتير
أولها عن الزوج لازم زوجته تعينه بكل ما فيها على بر أمه وأبوه لأن ثواب برهم أو عقاب عقوقهم بيبان في االدنيا قبل الأخرة , وهى وزوجها واولادها في مركب واحد يعنى إللى هينفعه هينفعهم وإللى هيضره هيضرهم
تانى شئ
مش هقول لحضرتك انا مليش غير أم واحدة مع إن دى الحقيقة ولحماتى كل التقدير والإحترام عندى
بس وجهة نظرى إن الخلافات موجودة حتى بين الأم وبنتها زى ما بيقولوا كدة مصارين البطن بتتخانئ الفارق الوحيد إن أنا ممكن اتخانئ مع أمى وبعد ساعة أدخل أكلمها وترد عليا عادى وكأن مفيش حاجة حصلت , أما حماتى مش هتعمل معايا كدة مهما كان لأنى مهما وصلت معزتى عندها عمرها ما هكون زى بنتها
والعكس صحيح بردو
من المنطقى والمفروض إن زوجة الإبن والحماة يتعاملوا مع بعض معاملة الأم وبنتها , بس من الداخل عمر ما المعاملة هتتساوى أبدا لأن دى طبيعة البشر ,, المهم النية الصافية تكون المبدأ الأساسى للمعاملة بصرف النظر عن النتائج
شوفتينى عملت بنصيحتك ورجعت لبلوجر .. إيه رايك ؟؟
طبعا معاكي ف كل كلمة
وكل سنة وانت طيوووووووووووبة
كل سنة وحضرتك طيبة ... وكل عيد ام يارب .. يمر عليكي وانتي بصحة وخير وسعادة وهناء ... وعلي كل امهات العالم من كل بقاع الارض .
وتظل الام هي صاحبة اللقب الحصري ... ست الحبايب .. فمهما احب الأبن او الابنة .. تزوج .. وعاش ... تظل الام هي .. ست الكل والحبايب .
تحياتي
الغاليه والعزيزة / شمس
كل عام وإنتى بإلف ألف خير وصحة
وسعاده وعيد أم سعيد عليكى وعلى
جميع أمهات العالم.
بالنسبه للعداء الدفين بين زوجة
الإبن والأم فالزمن كفيل بأن تفهم ما
عجزت عن فهمه فى الماضى وأن من
الكمال والعبقريه إيجاد حلول لكل
الصعوبات والمعوقات فى حياتناوعدم
الإكتراث للنزغه الإنهزاميه.
يجب إيجاد نقطة تلاقى بين الطرفين
يتم من خلالها الحوار الذى يؤدى إلى
فهم طبيعة الآخر والتى يتبعها
التعامل بشكل أفضل.
يبقى لنا جملة وحيده وهى للأسف لا
ينفع الندم بعد فوات الأوان.
تحياتى لروحك الطيبة
ودمتى بكل الحب
تامر
كل سنة وانتى طيبة يا شمس البلوجز
كلامك صح والله بس للأسف قليل اللى بقى بيفكر بالأسلوب ده ..
تحياتي
* هناء محمود " يوميات فرن بالكهربا "
يااهلا يااهلا
بلوجر نور تاني :)
كل سنه وانتي طيبه وبخير وكل حبايبك بخير
شوفي موضع الحما وزوجة ابنها ده
لو رديناه لأصله
ان تتقي الله الصغيره في الكبيره
وتوقرها وتحترمها
وان تعطفي الكبيره علي الصغيره وتتقي الله فيها
وتعاملها مثلما تحب ان تعامل ابنتها
:)مبسوطه انك رجعتي بلوجر ونورتيه :)
* re7ab.sale7
اهلا بيكي يارحاب
وكل سنه وانتي طيبه :)
*اندروميدا
فعلا الام هي الام
ملكه متوجه علي عرش القلوب
لامنازع لها علي هذا العرش
كل سنه وانت بالف خير
ومنور بلوجر دايما
:)
* Days and Nights
كل سنه وانت طيب :)
اللي بيبقا عايز يحل بيحل
واللي بيميل للهدوء وراحة البال برضوا بيسعي يحققهم
ولكن في ناس بتبقا ولا اللي واخده الحياة معركة
ربنا يهدي النفوس
نورتني
* Foxology
وانت بالف خير وصحة ياابويوسف
كلامك صح
ربنا يجعل ايامك كلها فرح وسلامي ليوسف واينو :)
الدنيا كلها سلف و دين
و كله هيخلص و مفيش حاجة بتتفوت
سيبك أنتِ
كل سنة و انتِ منورة يا شموستنا و ربنا يبارك في كل اللي بتحبيهم و يحفظهملك
شمس
بصراحة موضوعك النهارده من أجمل ما قرات وقد يكون كلامى ده متكرر لكن فعلا الى يكرم أمه بيكرم زوجته لانه بيخاف ربه وكمان زى مهى بتعامل أمه أكيد بياخد نفس الموقف من أمها فهل هى تقبل ده . وكمان إذا كان للزوج مكانه عاليه جدا عند الزوجه أوجبها الله على الزوجه مقابل إنها ليها حقوق عليها فتخيلى رغم مكانة الزوج دى يبقى مكانه أمه بالنسبه ليها ايه دى صاحبة فضل على صاحب المكانه . وكمان الى بتكسب مامتها بلاش لفظ حماتها بتلاقى مامتها دى هى الى بتدافع عنها حتى لو ضد ابنها مدام بتحبها.
*مصطفى سيف الدين
كل سنة وانت بالف خير وهنا
ويارب فرحان دايما
:)
* Gamal Abu El-ezz
شكرا علي كلامك وتعليقك اثري التدوينه
وشكرا علي مجاملتك اللطيفه
:)
كل سنه وانت طيبه
ويارب البنوتات تفهم كلامك
تحياتي
eng_semsem
كل سنه وانت بالف خير وسلامه
:)
الدنيا بتعلم بكره البناتتفهم وتتعلم
عمرك ماهتعاملي حد كويس وهيعاملك وحش
قبل اى تعليق او كلام :
كل سنة وانت طيبة وبخير وصحة وستر وعافية وكل حاجة حلوة :)
على فكرة فيه حموات ممكن تتعاملى معاها بردو بالطيبة والاخلاق الكريمة لكن مش بتقابل ده باسلوب كويس اما وجهة نظرى المتواضعة
اننا لازم نتعمل مع كل الناس بأسلوب واخلاق ترضى الله لان كل انسان بيتعامل باخلاقه وتعليم دينه واسرته
ويمكن فى يوم من الايام يصدق عليها قول الله تعالى ( ادفع بالتى هى احسن اذا الذى بينك وبينه عداوة كأنه ولى حميم )
اما البنت اللى حضرتك بتحكى عنها فدى مثال سىء دائما تسوق الاسرة للخراب بداية من تحريض الزوج على امه الى ان تعمل جاهدة على ان تجعل اولادها يكرهون جدتهم لابيهم وهذا هو العقوق والظلم فليتنا نعلم جميعا سيرة الصحابة وادب الاسلام فى معالمة كل انسان حسب مكانته وصدق قول الحبيب محمد عليه السلام ( ليس منا من لايرحم صغيرنا ويوقر كبيرنا)
اليس من حق كل ام ان نشعرها بعطائها حتى ولو فى يوم من العام ؟!!!
هى بكلامها عن حماتها بهذا الاسلوب اخطأت فى حق زوجها ولتسأل نفسها هل لو هو حاضر النقاش كانت ستقول هذا الكلام السىء عن امه ؟ هدانا الله واياه .....
كل عام وحضرتك طيبة وبخير وسعادة
تحياتى بحجم السماء
بارك الله في عمرك ورقك الصحة والعافية
بحبك في الله و
يارب يجعلنا زوجات وامهات صالحات امين
كل سنة وحضرتك طيبة وبخير وسامحينى متأخرة شوية
البوست كلامه مهم وفعلا دى رساله
بفكر كتير فى لما تكونلى حما ممكن تكون صعبه وقرشانه فعلا لكن فى النهاية دى ام واكيد لو عاملتها كويس هترد عليا كويس وان مردتش هتكون دى حاجة بينى وبين ربنا
شفت ناس كانوا بيوصوا ست على مرات ابنها الوحيد وفعلا من كتر الزن كانت بتتقلب على مرات ابنها بس بعدين لما الناس دول كبروا اتعمل فيهم نفس اللى كانوا بيقلوه للست الكبيره
كله سلف ودين
صحيح فيه قراشانات فعلا لكن خلى الطيب من ناحيتنا
دمت بخير
بارك الله فيك شمس النهار
ولو أدركت المتحدثة سنة
الله في الكون لما وقعت في ذلك
ويبدو أنها نست ( كما تدين تدان )
ودقة بدقة ولو زدت لزادت وأن كل
سلوك مردود على صاحبه لأحسنت وأدت
حق هذه المرأة التي كانت سببا في
وجود هذا الزوج
*ليلي الصباحي
اهلا بيكي :)
كل سنه وانتي بالف خير وصحة وسعادة
انامعاكي ان في ناس مهما تعمليهم حلو مابيقدروش يتغلبوا علي طبيعتهم الشريرة
هنا زي ماقلتي في تعليقك نعاملهم من منطلقنا مش من منطلقهم
يعني البنوته اللي حمتها كده
برضوا تعاملها كويس علي قد ماتقدر
وتحط حدود للعلاقه بالحسني
وتتعامل معاها في اضيق الحدود بالحسني
نورتي التدوينه بتعليقك وتعليقك اضاف للتدوينه كتير
:)
*zeze
كل سنه وانتي بالف خير وصحة وسعادة
وشكرا علي دعواتك الجميلة:)
ومحبتك لي في الله
وجزاكي عني كل خير
*رؤي عليوة
كل سنه وانتي بالف خير وصحة وسعادة
عارفة كلمة مابيدومش غير الطيب
هي دي اللي الانسان لازم يمشي عليها
صدقيني انا ياما شوفت ناس زي ماعملوا اتعمل فيهم
ربنا يهديهم ويهدينا لصالح الاعمال:)
نورتي شمس النهار
*خولة
اهلا بيكي
وكل سنه وانتي طيبه
بعض النفوس ربنا يهديها بتنسي بديهيات الحياة
ندعوا لهم الله بالهداية
نورتيني
كما تدين تدان
* well
صح بس اللي يؤمن
my weblog :: web site
إرسال تعليق