الثلاثاء، 27 سبتمبر 2011

مش لاقية كلام :(


اللي هقوله دلوقتي حصل علي ارض المحروسة
ومش من خيالي ولا من تأليفي
امبارح اتوبيس احد المدراس الخاصة المميزة
من بتوع الصفوة (الكلمة اختراع مصري صرف)
المهم الاتوبيس اتأخر علي اسرة اكتر من ساعة
ماكان من ولي الامر الا انه نزل ابنه من الباص
واجبر هو وتلاته من اصحابه السواق ان يتوجه بالباص
وبه المشرفة وباقي التلاميذ الي قسم الشرطة
علشان يعمل اثبات حالة ان الباص اتأخر
وده بعد مابهدلوا السواق وشتموه
يعني ولي الامر خطف الاتوبيس باللي فيه علشان يعمل محضر
الغريب بقا موقف القسم من الموضوع
يعني ايه يتخطف باص
بتلاميذ في حالة انهيار من اللي بيحصل حواليهم
ولما يروح القسم يتعمل فعلا محضر للمدرسة
مش كحضر للي خطف الباص
وكل اللي عمله القسم ان ساب السواق يمشي بالباص
والتلاميذ اللي طبعا اهاليم كانوا انهاروا من القلق علي تأخر الباص
وكمان النهاردة المدرسة كانت مولعة
اهالي التلاميذ راحوا المدرسة يتخانقوا
وكمان الرجل عايز ابنه يركب الباص تاني
بالرغم انه عمل محضر بعدم تعرض اي حد من المدرسة لأبنه
وطبعا المدرسة رفضوا ان ابنه يركب الباص تاني
بجد مش لاقية كلام اقوله
وولي الامر رجل متعلم ويشغل منصب مرموق
واكيد الموضوع ماخلصش لحد كده
وهنشوف هيحصل ايه
بجد حزينة

هناك 29 تعليقًا:

Miss LoZa يقول...

ربنا يبشرك
انا اختى لسه اول يوم ليها فالباص بكره
افهم من كده انها هتتخطف ؟؟
ههههههههههههههههههههههههه

عمرو يسرى يقول...

ايه دا غريبه
مدرسه ايه ديه
وقسم شرطه ايه دا اللى عمل محضر للمدرسه
مستحيل دا بوست كوميدى ولا ايه

mrmr يقول...

انا كمان مش لاقيه كلام ارد بيه
موقف يحزن بجد

نيللي علي يقول...

هو لو كان بس شغل عقله ووقف نفسه الماره بالسوء ..كان سأل السواق الأول ..ايه سبب التاخير؟..يمكن يكون لى عذره يمكن الطريق ..وماادراكى ماالطريق دلوقتى فى مصر ويكمن مليون سبب وسبب ...وكان عاتب السواق او اشتكى لمدير المدرسه ..بدل ماالموقف زاد سوء بتصرفه ده ..وكل ده بسبب انه عقله فى اجازه :)

نيللى

عبدالحميد خطاب يقول...

بجد انا بردو مش لاقى كلام أقوله على الدماغ الصغيرة أووى ديه
خلاص يعنى إتأخر على الديوان
ربنا يهديه ويهدى أمثاله

سواح في ملك اللــــــــــــــــــه- يقول...

المفروض بقي اولياء امور باقي التلاميذ

يعملوا محضر للي خطف الاتوبيس

يلا بقي خليها مخاضر بمحاضر

Unknown يقول...

مفهمتش اي حاجه ههههههههههه
بس اللي فاهمه ان كل الناس في القصه دي اتأذت
يعني الراجل انهار ان ابنه اتأخر
قام شتم السواق فالسواق اتهزء
وخد الاتوبيس بالمشرفه بالطلاب
فأهالي العيال دول اكيد انهارو
يقوم الظابط ميعملش المحضر ويمشي السواق
فالراجل الاولاني اتهزء في الحركه دي
..
الله بئا :d

غير معرف يقول...

طيب ليه ماقدمش شكوى للمدرسه اسهل :)..

الموضوع مش حزين قوي كده ..... في ناس تعبانه في دماغها كتير يا شموسه :)) ..

غير معرف يقول...

اولا : سلامـُ عليكمـ

ثانياً : بسم الله ماشاء الله النشاط متزايد ومش ملاحقين نعلق
أنا غبت يومين لاقيت 4 تدوينات جديدة
اللهم لا حسد

ثالثاً : بالنسبة للمعلم قذافي لو هو اللي مصمم السياره بجد يبقي دماغه وقتها كانت لسه شغاله والكابلات والفيوز كانت لسه سليمه

رابعاً: بالنسبه للكركديه ... هو ممكن تشرب منه عدد كبير كده من الأكواب أربعه مثلا ورا بعض
مش ده ممكن يرفع الضغط أو ينزله بشكل حاد ؟؟؟؟ مجرد سؤال ...

خامساً : الراجل اللي خطف الأتوبيس ده
أعتقد ان الموضوع بالنسبه له وللناس اللي عملوا كده معاه مجرد رد فعل سئ تمادوا فيه.... مش حكاية خطف ولا حاجه ... مع أن هي شكلها كده

هـــــــــه بس خلاص ... رغيت كتير :)


تحياتي

ستيتة يقول...

على رأي الكبير
يا وجعة مربربة
فيه لخبطة
احنا في عام الضباب يا ولاد
بس هو عام ممطوط شويتين
ويقيني
ها تروق وتحلى
واللي جاي - حتى لو اتأخر - أحلى

صباح الفل

مصطفى سيف الدين يقول...

سبحان الله
بصراحة حكاية ولا في الافلام
ليه مبقيناش بنقدر بعض؟ وندور لبعض على عذر يقنعنا
الاتوبيس اتاخر يمكن بسبب زحمة الطريق يمكن لاي سبب تاني
ليه الراجل ده قدم ان السواق غلطان ولازم يتحاسب وبعدين انت زعلت من تاخير الاتوبيس ساعة رحت بيه القسم واخرته ساعات
وبعدين بمنتهى اللاكرامة عايز ابنك يركب الاتوبيس تاني باي وش
ربنا يشفي
و يهدي
تحياتي ليكي

Tarkieb يقول...

ههههههههه اول مرة وقفت على محطة اتوبيس في المانيا لاقيت واحدة بتتصل برقم كان مكتوب ع المحطة وبتشتكي ان الاتوبيس مجاش وانها كدة حتتأخر 20 دقيقة للي بعده ..وطبعا كنت باستغرب لاني فاكر ايام لما كان سواق الاتوبيس زمان يشوفنا واحنا خارجين م المدرسة وما يرضاش يقف ويجري بسرعة عشان كله نظام بلوشي او ابونية ...العيب مش من اللي خطف الاتوبيس العيب م النظام ...اللي اصلا مش موجود ولا في قواعد

Haytham Alsayes يقول...

!!!!!

انسف حمامك القديم
في كل حاجة تتخيليها في مصر

بس كدة

sabry abo-omar يقول...

وانا كمان مش لاقى كلام.. ربنا يستر ومش عارف امتى الدنيا هاتتصلح بقى ونعيش فى امان ومطمنين على ولادنا وحياتنا .. لكى منى كل تقدير وتحيه على عرضك وكلماتك

ابراهيم رزق يقول...

اولا انا ضحكت على تعليق كراكيب و افتكرت الابونيه زمان طبعا انت متعرفيش الابونيه
هههههههههههههه

يا مصر كم بك من مضحكات و لكنه ضحك كالبكاء

لو كنت انا ولى امر لحررت له محضر ترويع اطفال امنين و احتجازهم بغير حق

تحياتى و تقديرى

نسرين شرباتي "أم سما" يقول...

والله مش لاقية كلام أرد فيه :(

Ramy يقول...

نحن نفتقد

للنظام فى كل شيىء

نفتقد أشياء كثيرة

هناخد فترة كبيرة لحد ما نقدر نبقى صح

ربنا يسهلها بقى

Unknown يقول...

أتى ليصحح خطأ بكارثة :)

Unknown يقول...

جزء م مسلسل الفوضى المعروض حاليا ودون انقطاع

مدونتــــى يقول...

شكرا لك مدونتك رائعه اختى ولهذا قررت ان اكون من متابعى هذه المدونه الرائعه

فشكووول يقول...

السلام عليكم
تحياتى
عارفه يا هانم ان الانسان ساعات بتطق فى نافوخه عشان يثبت انه على حق انه يعمل اى حاجه ومش فى دماغه اى حد خالص ولا اى مصلحه ولا اى طفل ولا اى حاجد بيبقى عايز يقول ان انا على حق وخلاص ..ز وعلى فكره السياره بتاعة القذافى والله فعلا نموذج هايل يا ريت يكون عندى واحده زيها .. امال بيقولوا عليه مجنون ليه .. ما هو آخر حلاوه آهه
تحياتى

Unknown يقول...

السلام عليكم

وأنا كمان بجد حزين!!!
ليس من الإسلام هذا التعنت العجيب!!!!

إيذاء للآخرين في مقابل حصولي على حق كان يمكن جدا أخذه بطريقة مهذبة...!!
وماذا عن الابن الذي سيكون مكروها من الكثيرين (حتى لو لم تتعرض له المدرسة)!!!!

سؤال: هو لسه فيه حد بيتعامل على إنه (شخصية مرموقة)؟!!!!

تحياتي أختي الكريمة.

tarek momen يقول...

ممكن تفسري لي معني منصب مرموق بصورة افضل...يعني بروح امه بيشتغل ايه من الاخر

Unknown يقول...

مصر طول عمرها حتفضل ام الدنيا

حَنيّـن نِضال يقول...

انا مندهشة :O

فشكووول يقول...

انا جيت هنا امبارح بس مش عارف ايه اللى حصل .. حتى لو علقت ما فيش مانع يعنى اثبت حضورى
اصل امبارح يا دوب كنت هنا فى شمس النهار بصيت لقيت الكمبيوتر عمل حاجات وحشه وقعد يمطوحنى هنا وهنا وضيع منى المدونه الجديده اللى مديهانى الواد الازهرى وما لحقتش اتهنى بيها .. قمت النهارده الصبح لبست الترنج وجيت ناطط فى البحر ولاقيت سمكة قرش ماسكه فى المدونه بسنانها وجيت داخل معاها دا بوكس ودا شلوت ودى روسيه وواخد منه المدونه وطالع من البحر وعملت لها كلمة سر جديده وخلى اى هكر ابن هكر ييجى الناحيه دى
تحياتى

شمس النهار يقول...

طبعا بعتذر عن عدم الرد كنت مشغووولة اليومين اللي فاتوا دول جدااا

اخر تطورات الموضوع ان ولي الامر
عمل محضر تاني للمدرسة انهم مش راضين ان الولد واخته يركبوا الباص تاني
وداخلين في مشاكل مع بعض
الغريب في الموضوع بقا
ان اولياء الامور اللي ولادهم كانوا في الباص اكتفوا بأنهم اتخانقوا مع المدرسة
وماحدش اتنحرر يعمل محضر لولي الامر اللي خطف الباص للقسم
وجاب لهم هلع من كتر تأخر اولادهم
واللي روع اولادهم باللي عمله
وعجبت لك يازمن
:(

Carmen يقول...

ايه ده ده بجد؟ ^_^

beautiful mind يقول...

هو التصرف غريب شوية
بس الاهالي بيخافوا جدا علي ولادهم
بس مش لدرجة اني اخد الراجل الغلبان واعمله محضر
طيب واهالي الاولاد التانين
يعملوا ايه بقي