عام جديد وذكريات قديمة

الاغنية دي قديمة تحمل معاها ذكريات كتير من زمان دايما افتكرها في راس السنة او عيد ميلادي

:)

عام رومنسي ان شاء الله :)

كل سنه وانتم طيبين
عايزة ابتدي السنة الجديدة بالكلام عن الرومانسية
والرومانسية مش مظاهر الحب من التوهان والسرحان والسنتحه(ماحدش يسألني يعني ايه هي بنتي بتقولها كده)والنحنحة
لا
كل شئ حوالينا ممكن يبقا رومنسي
تبسمك في وجه اخيك صدقة (مش دي رومانسية)
الكلمة الطيبه (المجاملة الحلوة الصادقة) صدقة مش دي كمان رومانسية
الاخلاص والوفاء رومانسية

لما نشوف شئ جميل ونقول تلقائي الله الله رومانسية
القعدة علي النيل او علي البحر رومانسية
لما نزور مريض ونقول له سلامتك وندعي له دي رومانسية
التدبر التفكر في خلق الله والكون رومانسية

حب الله ومنجاته من غير مانشوفه رومانسية
حب رسول الله رومانسية مااحنا ماشفناهوش برضه
كنت بقرا عن معاملة الرسول لزوجاته لاقيته صلي الله عليه وسلم زوج محب رومانسي جدااااااا
حسيت ان كلمة رومانسية تعني لطف ورحمة تعني قلب رحيم رقيق لا يغدر ولا يخون
قلب عمران بحب الله
وحب الله هو اللي هيخليه رؤف رحيم
قلب محب بمعني الكلمة
مافيهوش مكان للغلظة او الغدر
او البرود واللامبالاة
قلب بيتقي الله في كل افعاله
ولا انتوا رأيكم ايه في موضوع الرومانسية دي
:))
كل سنه وانتم طيبين وعام جديد سعيد رومنسي
:))

فوازير؟؟؟

من وقت للتاني بحب اتمشي في ذكريات المدونه

اقرا البوستات القديمة

وبعض التعليقات

لاقيت البوست ده كان من وجهة نظري لطيف

حبيت انشره تاني

وخصوصا ان مدونين جدد اشتركوا في بلوجر

ياريت كل مدون ومدونة يكتب في التعليق ليه اختار الاسم ده لمدونته

هتلاقوا كمان مدونين معلقين فيه هجروا مدونتهم

فرصه نفتكرهم ونزور مدونتهم

وبهديهم الورد اللي فوق ده
:))

بوست من عند رومنسي جميل

بوست جميل من عند رومنسي

******
من أقوال علي بن أبـي طـالـب
رضي الله عنه
********
إن النعمـة موصولـة بالشكــر
والشكــر متعلـق بالمزيـد
ولن ينقطـع المزيـد من الله حتى ينقطـع الشكـر من العبـد
*******
راحــة الجسـم في قلّـة الطعــام
وراحــة النفـس في قلّـة الآثــام
وراحــة القلـب في قلّـة الاهتمـام
وراحــة اللسـان في قلّـة الكــلام
*******
وقال رضي الله عنه
من ينصب نفسـه للنـاس إمامـاً
فليبـدأ بتعليـم نفسـه قبل تعليم غيــره ..
و ليكـن تأديبـه بسـيرته قبل تأديبـه بلسـانه
*******
وقـــال
العلم خير من المال
لأن المـال يحرسـه و العلـم يحرسـك
والمـال تفنيـه النفقــة و العلـم يزكـو على الإنفـاق
والعلـم حاكــم و المـال محكـوم عليه
مـات خازنـو المـال وهـم أحيــاء
والعلمــاء باقـون مابقـي الــدهر
أعبائهم مفقودة و آثارهم في القلب موجودة
*******
علمت أن رزقي لا يأخذه غيري .. فاطمأن قلبي ،
وعلمت أن عملي لا يقوم به غيري .. فاشتغلت به وحدي

ربط بين خبرين

لما قريت الخبر ده زعلت جدا
وصعب علي الناس والحمد لله مافيش حد مات بس اتشردوا

ولما قريت الخبر ده اتغميت
وصعب علي الناس برضو
صحيح مافيش حد مات بس برضوا اتشردوا وطلعوا من البيت من غير اغراضهم

ومش عارفه ليه ربطت بين الخبرين
الناس من الفقر وضيق الحال والازمه بيفضلوا يموتوا تحت العقار المنهار علي انهم يعزلوا
ماهو يعني هيروحوا فين اصلا؟؟

الحي يقول كلام والناس تقول كلام تاني
والحقيقه انهيار عقارات علي دماغ اصحبها




مافيش ثقه بين الناس والحكومه وقرارات الاحياء

فين رجال الاعمال اللي اغتنوا علي حساب الناس دي
فين حق الفقراء والمساكين

رايحه علي فين يامصر
؟؟؟؟؟؟
_____________

حتي المصانع كمان!!!؟؟؟؟



***********

مش عارفه هو في ايه؟؟
2010
مش عايزة تمشي الا لما تهدلها كام بيت علي مصنع علي الماشي
بعد مانشرت البوست
لاقيت الخبر ده

في أمل

طول ماالانسان عايش يبقي الامل في الله موجود وبكره هيكون اجمل

جمال السجود والليل + تحديث

نداء الي نورهاتي صعبان علي حالنا
ياست الكل افتحي التعليقات عايزين نقول لك مبروك علي الحج
حج مبرور وذنب باذن الله مغفور
********

اليل له سحر غامض جميل

خصوصا ليل الشتاء لما الدنيا تبقا سكون تلاقي نفسك هديت و صفيت
لما تبص في ليلة صيف للسما قبل الفجر وتحس انك لوحدك مع ربنا تناجيه

اجمل العبادات في جوف الليل
مافيش مايعادل سجده في جوف الليل

مافيش مايعادل حلاوة السجود لله ان تضع جبينك وانفك في الارض تسليم وعبوديه لله
تدعوه وانت ساجد تناجيه هتحس براحه ورضاوهو افضل وضع للدعاء

للسجود حلاوة

احساس مؤلم لما مرض يمنعك انك تنزل علي الارض تسجد لربك تسبحه
ساعتها هتعرف قد ايه السجود نعمة وتشكر ربنا عليها لما ترجع وتعرف تسجد تاني

وتشكر ربك

واخر اليوم واحنا بنصلي العشا بعد يوم مرهق لما نسجد هنلاقي الارهاق والتعب والصداع والتوتروالم الضهر راح

دي مقاله عن فوائد السجود

وده لينك من عند اسبيدر مان لتفسير القران ميسر سهل بحجم صغير


وده لينك البوست الاصلي لتفسير القران

كل سنه وانتم طيبين وعام هجري سعيد ان شاء الله
:))

بوست مسروق :)

الكلام الرائع ده لاقيته عند جارة القمر
عجبني اخدته وجيت نشرته هنا
:)
**********
يوما ما ... سأموت

وستعلم إنك أصبحت يتيما

ستعلم أنى جننت بك ولك

ستعلم إننى كنت أقرب إليك منك

ستعلم حينها إنك كنت قاسيا مجنونا

يوما ما ... ستبحث عني و لن تجدني

كما كنت يوما ما ... أبحث عنك ولا أجدك
*****

ملاحظات علي البلوجر

بعد غياب عن البلوجر حوالي 3 اشهر
بسبب انشغالي وكذلك صدمتي
في بعض شخصيات البلوجر الذين يقولون مالايفعلون
وعلي المدونة شئ وفي الحقيقة شئ تاني
ونسيوا نظرية تستطيع ان تخدع الناس بعض والوقت ولاتستطيع ان تخدعهم طول الوقت!!!!!
ولما رجعت وبعد فتره من الرجوع ليه بعض الملحوظات :
******
ناس كتير من المدونين هجروا التدوين!!!
*
وناس كتير انضموا لأسرة التدوين وعملوا مدونات من اروع مايكون
وانضم مدونين صغار السن جدا بس ماشاء الله بيكتبوا جميل جدا
**
اغلب المدونين مش بيتناقشوا مع بعض في موضوع البوست كل واحد بيدخل يرمي تعليق ويجري
كنا الاول بنتابع ونتناقش مع بعض
يمكن علشان العدد كبر جدا الان
***
كان مدون او اتنين عاملين اشراف علي التعليقات علشان كان في حد بيدخل يتطاول عليهم
دلوقتي ماشاء الله الاغلبيه عاملة اشراف وبالتالي ده اثر علي النقاش
مع المدون صاحب المدونة
او المدونين المعلقين بينهم وبين بعض
****
اغلب المدونين بيدخل البلوجر ينزل بوست ويجري لا بيزور حد ولا بيتطلع علي اخبار باقي المدونات
******
اغلب المدونين هجروا التدوين وراحوا الفيس لسهولته عن البلوجر واحتفظوا بالمدونة يكتبوا فيها من وقت للتاني
صحيح الفيس اسهل واسرع ومتابع للحدث اول باول والتواصل اسرع
بس المدونات ارسخ واعمق من الفيس
******
البلوجر شكله وجوه اتغير بجد زعلت
بقا حالة زي حال اي حاجه في مصر
اعتقد انه فقد كتيير من بريقه
وفعل نظرية الغربال الجديد كان له شده
*********
كتير من المدونين فرحتلهم جدا
نشروا كتبهم سواء كانت اصلا تدوينات او مؤلفه مخصوص
وبعتبر دي فرحه للبلوجر كله
وبقول لهم كلهم مبرك
:)
دي ملاحظاتي علي البلوجر بعد فتره من العوده
:))

خبر مفاجأة من الكنترول

حسيت انكم ممكن تكونوا قلقانين ومحتارين

مين هيكون رئيس مجلس الشعب للدورة القادمه
؟؟؟؟؟
قلت اطمنكم

ورحت جبتهاااااا ا
من الكنترول

الحمد لله ماتقلقوش وماتخافوش

فتحي سرور

طبعا مفاجأه قوية
صح؟؟
:)))))))

احترمني شكرا !!!!!!!!

البوست
ده
من عند ام البنات

بوست من العيار التقيل اللي يصيب في الصميم
ياريت نقراه شكرا
:))

ازمة رجالة

كل سنه وانتم طيبين
كل مااجي مسافره باخد معايا كتاب اوكتابين حسب مدة السفر
المره دي وانا بدور علي كتاب اخده معايا لاقيت كتاب كنت نسياه
اكتر من اربع شهور عندي وماقريتوش لسه
اسمه
(ازمة رجالة)
الكتاب ده من اظرف واصدم كتاب قريته مؤخرا علي بساطته
وكمان هو كله حقائق يعني الكاتب (ايهاب عبد السلام )ماجبش جديد
مش اكتر من انه قال للغوله انتي عينك حمرا
ولفت نظري كلمة قويه جدا
ربنا لما قال الرجال قوامون علي النساء
ماقالش الذكور
ماحددش النوع حدد الصفه
يعني مش هيعرف يعمل ده غير الرجل بمعنب كلمة رجل
وكذلك النساء مش الاناث
****
عايزة اقول ان الرجل علشان يكون رجل لازم الست كمان تبقا ست في بعض الستات نسيوا انهم ستات وبالتالي بعض الرجال نسيوا انهم رجال تبادل الادوار وصلنا لده
رمي الحمل كله علي الستات
وتبقا هي الرجل والست في نفس الوقت ***
ربنا كرم الست تكريم كبير
وحافظ عليها كالجوهره
****
رحم الله الشيخ الشعراوي

لما قال( القوامه انك تكون في خدمة اهل بيتك من النساء)
والقوامه هنا مش بس للزوجه
للأم والاخت والابنه والعمه والخاله
*******
للأسف مفاهيم كتير اتغيرت واتغير معاها اوضاع كتير
لا الطفل بقا طفل
ولا الشاب بقا شاب
ولا الست بقت ست
ولا الرجل بقا رجل
_____
الكتاب بيتكلم عن الازمة ليه حصلت واسباب تفشيها
وايه حلها
الكتاب جميل ياريت تقروه
:))

عيد سعيد

كل سنه وانتم طيبين
وعيد جميل سعيد عليكم
:))

:))

ده مش بوست

عجبني جدا
المقال ده
وحبيت نتشارك ونتناقش فيه مع بعض
وهعلق عليه معاكم
:))
***************

ملحوظة:في حاجه بتحصل في القائمه الجانبيه ان ناس بتنشر تدوينات مش بتظهر عندي في ساعتها بتظهر بعدها بمده كتير حد يعرف السبب
؟؟؟؟

تحديث صححت اللينك ++هو في ايه؟؟؟؟؟؟

همه بيتخنقوا ليه علي الترشيحات كده
للدرجة دي الموضوع سبوبه ولا في حاجه انا مش فهماها
يعني همه بيعملوا ايه؟؟؟
:))
نقراءهنا كده

:))))))))))
بس ياريت اللي يفهم يفهمني
:))

عبرنا الهزيمة يامصر ياعظيمة 4

خلصت الحرب بكل ما فيها من بطولات وفضلت روح اكتوبر ترفرف علي الوطن العربي ومصر والكل سعيد

وعايزة اتكلم عن الوضع العربي في اكتوبر

بصراحة الوضع العربي كان جميل ومشرف واتحاد كان نفسنا يفضل

من مساعدات حربيه لقطع البترول الي اخر المساعدات

بس العرب دفعوا تمن الاتحاد ده غالي اوي

نستعرض الوطن العربي بعد 73

بعد الحرب السادات ابتدأ يفاوض علي السلام

وانقسم العرب طبعا مع ان اللي رفضوه زمان رضوا بأقل منه الان بس مش ده موضوعنا

اللي يهمني ان العرب انقسموا علي بعض وعزلوا مصر عربيا عنهم

ده غير الحرب اللي كانت هتقوم بين مصر وليبيا

ووضع الجيش علي الحدود مع ليبيا

وابتدأت الانقسامات الداخليه علي كل بلد

ابتدأت بلبنان والكل عارف الحرب الاهليه اللي ابتدأت شرارتها مع اواخر 74 ورسميا 75

وفضلت لبنان متقطعة

شعبها يقتل في بعض

ولما كانت ألازمه هتنفرج ويلاقوا حل

اسرائيل اجتاحت الجنوب اللبناني واحتلته

ده غير هيمنة سوريا علي لبنان وما يسببه هذا من مشاكل داخليه

والجزائر نفس القصه انقسم الشعب علي بعضه

وفتنه مابعدها فتنه

وبرضه شعبها يقتل في بعض

ده غير مشكلتها مع المغرب ده غير مشكلة المغرب مع الصحراء وقضية الحكم الذاتي

والسودان وقضية الجنوب وبرضوا الشعب بيقتل في بعضه

نروح لليمن حدث ولا حرج شعب مسلح ضد بعضه وضد الحكومه

ونروح علي الخليج العربي ماسلمش برضه

قطر والبحرين وقضية الحدود والخناقه علي جزيرة صغيرة

ونوصل للقضيه والمصيبه الكبري

الحرب بين العراق وايران

وبعد كده غزو العراق للكويت ومسمار جحا

الذي اتي بالقواعد الامريكيه الي الوطن العربي مره اخري

اوماااال هو امريكا وأوروبا هيسيبوا معركة تاني تقوم بين العرب واسرائيل من غير مايكونوا موجودين في المنطقه وبسرعه يدافعوا عنها ويربوا اللي يفكر يمسها

وجت القواعد رسمي الوطن العربي

ومش كده وبس ويدفع لها اموال للحمايه من البعب

ده غير القصه الجديده كل المسلمين ارهابين

وبعدها علي طول الحرب علي العراق وتقسيم العراق

وتفتيته حته حته علي رواقه ونهب ثرواته

فضلت حته علي الماشي كده يخدوها في السكه

هي

الانقسام الحاصل للفلسطينيين وبدل ما ينتبهوا لقضيتهم الاساسيه يقتلوا ويتخنقوا مع بعض

عشان القضية تفضل معلقه علي مايكملوا الاستيطان

فاااضل مييييين

مصر

هنسيبها ؟

لا طبعا !!

مصر فيها اكتر من قضيه مهمله

والحكومه لابتحل ولاتربط فيها

ده غير ان شعبها عايش في امان الله

طيب نعمل له ايه؟

نوقعها مع الفلسطينيين ونعمل مشاكل علي الحدود

ونبتدي نزرع الفتنه بين المسلمين والمسيحين اللي طول عمرهم ماحدش بيعرف ده من ده

وبعدين نقلب المسلمين نفسهم علي بعض والمسيحين علي بعض

وبعدين نشوف بقا قبائل سيناء ونقلبهم علي النظام

وبعد كده ننزل علي الجنوب ونزرع مشكله بين مصر والسودان ونحي مشكلة قديمه اسمها حلايب وشلاتين المحلوله اصلا من ايام عبد الناصر

وفاضل حته علي الماشي ماحدش واخد باله منها

النوبه الجميلة

واهل النوبه وحقهم الضايع ومشاكلهم اللي ماحدش سامعها اصلا

وبعدين ندخل علي نهر النيل ونقلب دول الحوض كلهم علي مصر

ومش عايزة اجيب سيرة الكورة اللي اتخدت زريعه علشان نفرق بين شعبين زي مصر والجزائر

ومصر وتونس ومصر والسودان

مافيش اي حاجه صغيره الا وتقلب الناس علي بعض

حتي الدول الصغيره في الوطن العربي اللي كانت حبيبه بيقلبوها علي مصر ويفهموها ان بفلوسهم هيقدروا يتطاولوا علي مصر

مش كل دي فتن؟

علي فكرة

الكلام ده مش سياسه الكلام ده من قلب مواطنه مصريه عربيه قلبها موجوع بسبب ان الوطن العربي اللي اتحد في وش امريكا والغرب وانتصر يكون ده حاله النهارده

الا من رجل رشيد

تحدييييييث هام * عبرنا الهزيمة يامصر ياعظيمة 3

الورد ده لأبني عادل (البلد دي فيها حكومه )اللي رفع راسنا مع الاوروووبيين وحضارتهم ونجح واتخرج

الف تشليون مع تريليون مبروووووووووك
مبرووووووووك

***************************

حرب الاستنزاف اخدت وقت والساحة المصريه اخدت وقت عشان نستعد للحرب

وفي يوم 6 اكتوبر صباح زي اي صباح رمضان ومدارس وشهادة الاعداديه وشدة اول السنه

كنت مقيمه في بيت جدي لسفر والدي و والدتي يقع بيت جدي علي بعد خطوات من مدرستي و انا راجعه حاسة ان في شئ غريب

دخلت البيت علي صريخ خالي وهو بيتنطط عبرناااااااااااااااا لا بجد عبرناااااااااااااا

استغربت من رد فعله

هو معروف عنه وقار العلماء(كان يحضر وقتها الدكتوراه في العلوم)

وبدور وشي لاقيت جدي رافع يده الي السماء يشكر ربنا ويدعي لخالي الاخر اللي كان علي الجبهة

ولخالتي التي في احد الدول الاوربيه تدرس الماجستير في العلوم

حتى الشغالة كانت بتعيط وبتدعي لقرايبها الشباب المجندين في الجيش

والراديو شغال والتليفزيون شغال والناس في الاول كانت فاكره زي 67 لكن الاخبار من علي الجبهة ابتدأت توصل شويه بشويه

وشفت بعيني الشربات بيتوزع بعد الإفطار

شفت ستات كانت لابسه اسود علي جوزها او اخوها قلعوه ولبسوا ملون حسوا ان اتاخد بتاره

الشوارع هاديه الناس ملتزمة بتعليمات الدفاع المدني شعوووووور جميل شعب فرحان كله وكل شويه صفارات الانزار تصفر نطفي النور وننزل الخندق الا جدي ماكنش يرضي ينزل ويقول انا قاعد هنا زي ماابني علي الجبهه بيواجه انا قاعد هنا بواجهه

مش عايزة احكي لكم عن موضوع الخندق واللي ماعندهمش خندق بينزلوا البدروم واللي ماعندوش بيتجمعوا في مدخل العماره اللي اصلا امامه ساتر من الطوب

الناس اللي خايف واللي بيعيط واللي بيدعي

اتصلت بي صحبتي قالت لي الاستاذة فلانه هتقابلنا امام المستشفي العسكري اللي عايزة تيجي الموعد الصبح (طبعا المدارس اغلقت) والدها جاب لنا تصريح بالزيارة

رحت الموعد اصل المستشفي جنب بيت جدي يادوب اعدي الشارع (علي فكرة كل ماكان يجي جرحي للمستشفي يطفوا النور علي المنطقه)

اتجمعنا ودخلنا المستشفي نزور الابطال ونكتب لهم رسائل لأسرهم ونسمع منهم

مواقف كتير حصلت بس في مواقف اتحفرت

جندي نايم في سريره عمال يصرخ ويزعق رجعوووني جبتوني ليه عايز ارجع الجبهه احارب لسه ما خدتش تاري كفايه

وطبعا بيحاول يقوم مش عارف علشان ماعندوش اطراف اصلا

الموقف التاني كنت في احد العنابر بكتب رساله لجندي ماعندوش يد يكتب بيها وفجأة لاقيت السيدة جيهان السادات داخله علينا العنبر معها الهدايا للأبطال

وقعدت تتكلم معاهم وتشكرهم وبطل من الابطال ملفوف ومتربط كله او الباقي منه وطت علي الباقي من ايده باستها وقالت له انتوا رفعتوا راسنا ومصر مدينه لكم بالعزة والكرامة

ولمحت في عيونها دموع

للأسف ماكملتش المهمه الجميلة دي علشان انتقلت من بيت جدي لولدتي لبيت جدي لوالدي حتي اكون مع اخوتي بأمر من بابا بما ان المدارس قفلت

بعد ماانتقلت لبيت جدي التاني مافيش يويمن وجوز عمتي وصل جريح علي احدي المستشفيات العسكريه

اتحايلت عليهم يخدوني معاهم اشوف الابطال

عايزة اقول لكم ان في المستشفيات دي كان في ناس بتبعت اكل ساعة الفطار للمرافقين

الدكاتره والتمريض شغالين مش بيناموا

المرضي المدنيين في المستشفيات المدنيه طلعوهم وماكانوش زعلانين بالعكس

الروح اللي عشتها في 73 مااعتقدش اني هاعيشها تاني في مصر التفاف الشعب والفرحه والعزة

ده نصر ورد كرامه لمصر كلهااااا

تعالوا نشوف خالتي اللي كانت في اوروبا حصل معاها ايه

هي شكلها خوجاتي حبتين تلاته اربعه فالما سافرت كانوا بيفتكروها منهم لما يلاقوها عربيه يعني مابيكونش زي الاول اوي وده طبعا من الصورة اللي كانت اسرائيل عملاها لنا اننا ضعفاء وجبناء…الي اخره

بعد الحرب بتقول الناس هناك كانوا بيباركولها ومبهورين باللي عملوه المصريين وازاي رشوا خط بارليف بالمايه:))

وسموها الفرعونه الجميلة

وهي راجعه في المطار كل اللي يشوف الباسبور يهنيها ويقول لها طلعتوا فراعنه وضحكتوا علي اسرائيل

العالم كله احترمنا عرف مين هي مصر

سلام علي شهداء هذا الوطن

ياريت تقروا بوست عمنا فشكول ماشاء الله لخص كتير من حوارات اكتوبر فهو قد شارك في تلك الحرب

وللحديث بقيه

عبرنا الهزيمة يا مصر ياعظيمة 2

قبل ما ابتدي البوست عايزة اوضح معلومة انا مش بكتب تاريخ

انا بحكي عن خواطري عن فترة عيشتها فعلا ممكن يكون تفاعلي مع الاحداث غير اي حد ثاني لكن يبقا الحدث واقع وتاريخ لا يمكن تغييره

اتكلمت عن الهزيمة اللي سميت نكسه فيما بعد علي غرار تحريك الاسعار وتاني يوم الاسعار ترتفع وتولع نار

:)

البلد حزين كل بيت كل اسره كل شارع فيه ياشهيد يامفقود ياجريح

واصلا الشعب كله جريح مصدوم مافيش طعم لأي شئ والهم والانكسار رامي ظله علي كل شئ الناس الشارع الفن الثقافة

ده غير ان كل شئ في البلد كان موجهه للجيش سنوات من شد الحزام

وخصوصا في المواد التموينية

ومن الاغاني اللي لسه عالقة في زهني لليوم مدد مدد شدي حيلك يا بلد لمحمد نوح

ويا بيوت السويس لمحمد حمام والدرس انتهي لشاديه كلمات صلاح جاهين اللي غنتها لأطفال بحر البقر الشهداء ومش هننسي شهداء مصنع ابو زعبل

( بعض انقاد مصنع ابو زعبل والشهداء)

ومدرسة بحر البقر وغيرهم من شهداء الغارات الاسرائيليه الجبانة علي المدنيين

فاكره كويس ازاي كانوا بيحذرونا ما ناخدش اي شئ لامع من الارض او شئ علي شكل قلم او لعبه عشان ده لغم

كما تم تدريب الكثير من الشباب علي الدفاع المدني والفتيات علي التمريض

وكان لازم يرجع للناس وللجيش ثقتهم بنفسهم وبقوتهم من الاحباط والهزة النفسيه

وبعد وقف النار10يونيو ابتدأت حرب الاستنزاف اللي مهدت تمهيد قوي للنصر في اكتوبر

وعندما قرأت الان عن هذه الحرب اللتي بهرتني عرفت معني حديث الرسول ان المصريين خير اجناد الارض

مافيش 3 اسابيع من قرار وقف اطلاق النار وعزفت قوات الصاعقه المصريه لحن جميل في راس العش موقعه لقنوا فيها اسرائيل كده درس علي خفيف الناس الاول كانت فاهمه انه كدب زي بيانات 67 وكانت بداية رفع الروح المعنوية للجيش

(ابطال راس العش)

و مع الوقت رجعت الثقة وخصوصا ان مافيش اسبوعين من راس العش ونسور الجو المصريين اللي انضربت طيارتهم علي الارض اخذوا جزء من تارهم وعرف العدو انهم نسور وملوك الجو علي حق

قاموا بسلسلة من الهجمات ضد التشكيلات المدرعة للعدو شرق قناة السويس

و لسه فرحانين باللي حصل من رجال الصاعقه ونسور الجو إلا و البحريه المصريه تسجل للتاريخ اول استخدام للصواريخ في المعارك البحريه بزوارق الطوربيد لتغرق المدمره ايلات امام سواحل بور سعيد وتدرس هذه المعركة في مراكز الدراسات ألاستراتيجيه في العالم

وهناك العديد من البطولات ايضا كانت تحكي في كل بيت مش بس في الاعلام

كل جندي راجع اجازة بيحكي عن بطولة عملها هو وفرقته وطبعا تناقلت هذه الحكايات من كل بيت لكل بيت

وابتدأت الروح المعنوية للجميع ترتفع ومستنين الليله الكبيرة ومش فاهمين هي ليه اتاخرت ده كله

وافتكر ان قامت مظاهرات تطالب السادات بالحرب ومن خبث الرجل قال احارب ازاي وقال شواية اسباب واهية

وقامت المظاهرات والدنيا ولعة

والرجل مصمم علي كلامه انه مش هيحارب

واتضح بعد كده انه كان بيموه رحم الله كل شهداء الوطن الشرفاء

وللحديث بقيه عن النصر

عبرنا الهزيمة يا مصر ياعظيمة

كتير فكرت اني اكتب عن الهزيمة والنصر وخصوصا اني عيشتهم مابين عدم الفهم و الدهشة والمشاركة
وأخيرا قررت ان ادون عنهم
هي رحلة اثرت وشكلت في نفسي الكثير
نبدأ بيوم 5يونيه كنت طفلة شفت الناس بتهلل كل متسمع خبر من الراديو والتليفزيون
وفرحانين جدا وكلمة حرب علي كل لسان وطبعا كطفلة سالت امي عن معناها

وبعد كتير لاقيت امي تبكي و امي من النساء القوية التي لا تبكي ابدا الا للشدائد
وأبي حزين جدا وكان لي عم لسه متوفى افتكرت حد تاني مات
وبعد شويه مظاهرات في كل مكان والرئيس جمال يخطب و ابي جالس هو وأمي وعمي بيسمعوا ووقف عمي غاضب ولن انسي كلماته الغاضبة (لا تعملوها وتسبوها تخرب)

و انا مش فاهمه حاجه
و كل مانروح حته ألاقي الناس زعلانه ولما يبتدوا يتكلموا يبكوا
و الاسرة مجتمعه لفقد اتنين من الاسرة وسمعت أول مرة كلمت اسر
حتى بوابنا في يوم من الايام لاقيت مراته عماله تصوت وتصرخ وهو يبكي بشده
ولما بابا سأله قال له ابني مفقود (وللآن لم يعود)

انا مش فاهمه حاجه حد يفهمني
وواحدة واحده ابتديت افهم وشفت الشباب بيلفوا يدهنوا الزجاج ازرق وكل عمارة بتبني قصدها طوب عالي
وعاد اسير من العائلة واستشهد الاخر
وكان كل شويه اشوف ناس شايله عفشها وبيسكنوا في كل مكان نروح فيه

ولما سالت قالوا دول المهجرين من علي مدن القناة
اللي عنده عمارة كان بيشطبها بسرعة عشان الناس المهجرة تسكن
ما هي بيوتهم اتهدت وبلادهم اصبحت علي خط المواجهه
وكنت بسمع عن الاولاد اللي مش لاقين ورقهم عشان المدارس وحاجات ما كنش عقلي قادر ساعتها يستوعبها
وكبرت مع هذا الهم والحزن العام وما كنش حد بيتكلم في الموضوع ده خالص عار لازم ما نتكلمش عنه
عاشت مصر في سرادق عزاء كبير جدا واجزم انه لم تزف عروس بفرح هذه السنه
ومرت السنين
ومات عبد الناصر والحزن بقا اكبر والبكاء في كل بيت
حتى جدي الذي لم يحب الرجل يوما(بسبب التأميم وأشياء اخري)
بكاه وسمعته بيقول الله يرحمه
وكتبت امي قصيده صغيرة قرأتها في الاذاعة المدرسيه بنفسي
ومرت الايام وتابعنا حرب الاستنزاف وحكايتها التي لا تنقطع
وقبل مااتكلم عن حرب اكتوبر

عايزة احكي قصه سمعتها من احد طيارين 67
كانوا في مطار الاقصر وضربت طيارتهم علي الارض وهمه بيتفرجوا مالحقوش حتى يعملوا اي حاجه دك المطار وسوي بالأرض
وهمه راجعين في القطار ونفسيتهم في الحضيض اتكسفوا يقعدوا علي الكراسي من غير اتفاق لاقوا نفسهم كلهم قاعدين علي الارض منكسي الرؤوس
حسوا انهم اتخدوا علي خوانه ماحربوش عشان يخسروا
همه دول نفس الطيارين اللي جابوا النصر ومحوا العار في73
وللحديث بقيه

ااااااااااسفه جدا

معلش ياجماعه
اي حد معاه نمرتي مايطلبنيش
اسفه مش هرِد علي حد
لا علي موبايل ولا تليفون بيت
ويعز عليا ان في ناس حبيتهم برضه مش هرد عليهم
علشان يبقا كله سواسيه
حلفت ماهرد علي حد من المدونين اطلاقا
حياتي انا حره فيها وماحدش بيحاسب حد ربنا هو اللي بيحاسب
عزائي الوحيد ان حتى السيده عائشة لم تسلم من المنافقين وافتروا عليها
اللي يحب يتواصل معايا هيكون عن طريق المدونه بس مش هتواصل مع اي حد تاني باي شكل اخر

حسبي الله ونعم الوكيل

يا أيها الذين ءامنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين )

علي الصبح

اغنيه حزينه بس عميقه كتير مننا ممكن تكون اي كلمه فيها تشاور عليه وتقول له انت اهو

دعوة مالييش دعوة

الاخت فونك بعتالي رحلة لطيفه هنروح نشوف ايه الموضوع مع بعض

:))

ما هي كتب الطفولة التي بقيت عالقة في ذاكرتك؟

ميكي وسمير زي اغلب جيلي

وعادل وسعاد اللي فضلوا يزرعوا الفول لحد مااستوردناه من الصين الشقيق

******

مَنْ أهم الكتاب الذين قرأتَ لهم ؟

كل الكتاب مابسمعش عن حد الا واقراله

وفي اسمين عندك هدور عليهم واقرالهم

*******

من هم الكتاب الذين قررت ألا تقرأ لهم مجددا؟

ده كان زمان خالص يوسف ادريس والعقاد

كنت صغيره ومااستوعبتش

بس دلوقتي اتصالحنا وقريتلهم تاني

واجاثا كريستي ايام ماكنا صغيرين كانت كتب صغيره كده وقريتلها مرتين حسيتها رعب علي خوف قلت هي ناقصة وماقريتلهاش تاني

***********

في صحراء قاحلة ، أي الكتب تحمل معك؟

مش هقول القرآن عشان ده مفروغ منه

هاخد زمزميه ماءوشمسيه

ماحبكش في الصحراء يعني

********

ما هو الكاتب الذي لم تقرأ له أبدا وتتمنى قراءة كتبه ؟

كان خصام مع يوسف ادريس والعقاد ودلوقتي خلاص

وهشوف الاسم اللي انتي كتباه ده الغريب

وبدور ونفسي ألاقي كتاب عن كيف تكوني تيته لطيفه مفيدة

*********

ما هي قائمة كتبك المفضلة ؟

كتاب جدد حياتك

ولاتحزن

****************

ما هي الكتب التي تقرؤها الآن ؟

اسعد امرأة في العالم لعائض القرني

***********

أرسل الدعوة لأربعة مدونين من أجل مشاركتنا بذكرياتهم مع القراءة ؟

ازهرييييييييييييييييي

وكل من يدخل هنااااااااااااااااااااااااا

وهعرفكم

:)))))

العام اللي مش دراسي

كل سنه وانتم طيبين العام الدراسي بداء وعلي غير العادة بادي حامي جدا تصريحات ناريه ورئيس الوزراء بنفسه بيصرح والمحافظين بيمروا علي المدارس

وأول مره من 19 سنه عمر المدرستين اللي أصادي ألاقي في تلاميذ في الطابور

مش هي دي القضية!!!!!

القضية ان اتوبيسات المدارس الصبح مش ممكن كلاكسات وخناقات ليه ؟؟

عشان الشارع اصلا لا يسمح بدخول اوتوبيسات المدارس الكبيره دي

عشان الناس راكنة ناحية صف عمودي والناحية التانيه موازي وصفين يبقى فين بقا المساحه اللي هتعدي باصين في وش بعض

ودي خناقه كل يوم يتقابل باصين وتقوم الخناقه انت ارجع  لا انت ارجع

والناس اللي زى طبعا بيصحوا عشان صوت الخناقه وكمان كلاكسات العربيات اللي اتحجزت وراء الباصين

بس برضه مش هي دي القضية !!!

القضية ايه بقا ؟؟

ان مشرفة الباص علي غير عادات المصريين لقت للموضوع حل !!

الشارع اللي عليه المشكله من الناحيتين له تقاطعين واسعين  اتجاهين

قالت ان البصات حسب اتجاهه تقف علي الناصية دي تاخد الاولاد وتلف وترجع بهدوء و بلاش خناقة كل يوم

اولياء الامور رفضوا وكانت خناقه ياااانهار ابيض للجو حسيت ان حتى عصافير الشجر سكتت و تتفرج عليهم ما الكلام ده 6 ونص الصبح المهم الخناقه مابين مشرفين مالا يقل عن خمس مدارس بالباصات بأولياء الامور وكان منظر حضاااااري يليق بأم الدنيا

وسمعت كلام مضحك بصراحة

زى ابني ضعيف مايمشيش لحد اول الشارع (اول الشارع ده 40 متر هو بيجري اكتر منهم في فناء المدرسه)

وبنتي ماينفعش تمشي لأول الشارع النهارده الجو حلو بكره يبقي برد عليها(مش عارفه بنتها لما هتروح المدرسه هيقعدوها في جو تاني ولا نفس الجو)

وليه يعني الحركات دي ايه يعني لما تخدوا العيال من قصاد البيوت(عندي اقتراح الباص ياخدهم من جوه البيت)

وفضلت الخناقه يجي ساعة لحد ماسواق زعق وشتم الدنيا علي اللي عمله سواق وقال العيال تتأخر و انا عندي دورة تانيه ايكش البلد تولع و طبعا ولي امر قاله انت ازاي تكلمنا كده انا هوريك

وطبعا الباقي معروف

هي دي العقول اللي بتربي اولاد اليومين دول بتربيهم علي الدلع وعدم تحمل المسؤليه والعند والانانيه

وإحنا الناس اللي ماعندهمش مدراس لينا ربنا بنصحي كل يوم علي خناقه

ادعولنا سكاني هذا الشارع ولي مخصوصا عشان انا ساكنه في التالت

 

العصير!!+تحديث

زارني النهارده الرقيقه نهر الحب واختها الجميلة

شكرا علي الورد الجميل والقعدة اللطيفه

ولو انها قصيرة جدا

نهر الحب من الناس اللي شبه مدونتها جدا

********

هقول حاجه بس كده علي الماشي قبل مااانتكلم عن العصير

بحب اقرا الجرايد بالليل مش الصبح وأمر كده علي العناوين واللي يعجبني اقراه

لفت نظري عنوان ضحكني ضحك و انا مالييش مزاج اضحك حبيت تشاركوني فيه وتقولوا لي ليه حق اضحك ولا لأ

(عباس ونيتانياهو يحاولان التوصل الي صيغة لاستمرار المفاوضات المباشرة براعية امريكية)

:))

مااااعلينا نتكلم بقا عن العصير:

طولي عمري من هواة الفاكهة والعصير مش مهم فريش او معلب المهم انه عصير

ولاقيت انيس منصور كاتب في مواقف حتت مقال يشيب له الولدان

ده لينك المقالاهووووو

من النهاردة مافيش غير عصير فريش ومعمول في البيت

*********************

كمان عرفت ان عصير الخيار مفيد جدا لعصر الهضم وخفض الكولسترول في الجسم

ويساعد في علاج الروماتيزم والنقرس وفوائد في تقوية الاسنان واللثة

والكلام ده علي مسؤولية الاطباء الاوكرانين من اوكرانيا الشقيقه

:)

كما علمت ان ان الكركديه علاج فعال وامن لخفض انزيمات الكبد ويساعد الكبد علي انتاج مضادات الاكسده

ويحسن وظائف الكلي . ويمد الجسم بفيتامينات أ –ب-ج

والكلام ده علي مسؤولية باحثه من جامعة الازهر الشقيقه ومنشور في الاهرام الشقيق

جميل طبيبك الخاص ده صح

:))

نورتوني وانستوني

نورني وشرفني وادخل السرور الي قلبي زيارة جميلة جدا

شيكوووو حبيبتي قائدة كتيبة اعداء ازهري بس جت علي نفسها علشاني

بس الحمد لله قدرنا نفصل في القوات بينها وبين ازهري

ونسينا ناكل من الحلويات اللي جابتها شيكو كان نفسي اجربها في ازهري وعادل

:))

وبعد كده كيمو ابني اللدود اللي جه في ميعاده علي غير العادة و ببنطلون عجب شيكو جداااا ووعد انه هيشتري لها واحد بس نسيت يا كيمو الفلوس اللي شيكو اديتهالك

:))

وبعد كده نورني ابو علي اللي لقاء الزراعيين لم يتيح لي الفرصه اني اتعرف عليه كويس و ما شاء الله عليه فكر مستنير جدا وبشكره علي الهدية اللطيفه شكرا علي زوقك

وكان مع ابو علي ابني قائد الحملة ازهري اللي بشكره انه جه علشان هو كان مسافر يومها بالليل ونزل من عندي سافر

كان نفسي اجرب فيك حلويات شيكو ولكن الله سلم

:))

وعادل ابني اللي فضل تايه لحد ما الحمد لله قدر يوصل بسلام مع احلي بوكيه ورد وكمان الالوان اللي بحبها

بس برضه اختلفنا علي فيلم الجزيرة

:))

بس يا عادل ياريت تتخن شويه

:))

وكانت قعده جميلة جدا جدا وحوار راقي ولطيف

شخصيات بالفعل الواحد يفتخر انه يعرفها

ونزلوا وكلنا انطباع جميل

وبعد كده بشويه نورني اتنين من احب شخصيات البلوجر الي قلبي العروسين فوكس و زوجته اينو وكان اول مره التقي بهم ربنا يبارك لهم وعليهم و اينو من الشخصيات التي لم تختلف كتير عن ماتخيلتها عليه رقيقه زى مدونتها بالظبط

و فوكس ربنا يبارك فيه من شباب مصر اللي انا فخوره بيهم وفخورة اني اعرفهم وقعدنا قعده عائليه جميلة وكأننا نعرف بعض من زمااان جدا

وشكرا ليكم علي الشيكولاته

نوروتني ياجماعه بجد ولو اعرف كده كنت عيت لكم من زماااان

:))  

العيد خلص

ملاحظات العيد

****************
 

العيد في الاول ماكنش حلو محبوسة قاعدة علي كرسي وحساسية مبهدلاني .. وحاجات لطيفه الحمد لله

بس القعدة خلتني اراقب حاجات كتير و افكر في حاجات كتير

الحمد لله

** كنت قاعدة اقرا لاقيت الاولاد كلهم ضحكوا بصوت عالي

قلت لهم في ايه قالو المذيعه دينا بتسأل الراقصه دينا ايه اللي مش بيعجبك في الرجل الشرقي قالت لها (الكدب......)

:)

قالت لها المذيعه مستغربه الكدب ؟؟؟؟؟ الرجل الشرقي كداب ؟؟؟

قالت لها ده فيهم محترفي كدب مبدعين و أساتذة

خلاص بقينا بناخد الحكمة من افواه الراقصات!!!


** والدتي من هواة الافلام وجه حظي انه تتفرج علي فيلم الجزيرة !!

فيلم دموي مش لطيف

بس المؤلف والمخرج حرين يعملوه دموي راقص !!

لكن مش حرين انهم ينزلوا تشويه

في كل حاجه حتى اخلاق وعرف الصعايده

ده كمان هيخربوه ويفتروا عليه

الصعيدي لا يمكن يقتل ست غدر وكمان ست كبيرة !!؟؟

ولا يدور علي طفل يقتله

دي تبقى عيبه وعار و اهله نفسهم يايقتلوه يايتبروا منه

عيب شوهتم كل حاجه ياريت تسيبوا الصعايده في حالهم

و زعلانين ان الغرب بيقولوا علينا سفاحين و ارهابين

:(


** كمان في خبر زعلني اوي

حريق ورش بناء اليخوت والمراكب بالإسكندرية بالانفوشي

انا رحت قلعة قايتباي كتير لكن اخر مرة كنت في زيارة قصيرة لإسكندرية ورحت هناك

بس كان معانا خبير في إسكندرية

ورانا في المكان ده الورش شوفتها من بعيد وصورت يخت كان بيتجهز كان اول مره

اشوف الموضوع ده في مصر

بصراحة انبهرت جدا علشان انا شوفت ده بره

وفرحت اني شوفته في مصر جميل كده

ياريت الدوله تساهم في تجديد الورش دي

وخصوصا ان المكان هناك جميل جدا ومبهر ويقع في مكان اثري وممكن انه يكون المكان من ضمن برنامج السياح

وبكده يرجع اللي اتصرف عليه



** ومش هنسي عساكر الامن المركزي

اللي اتحرقوا كده في غمضة عين زي اي حاجه

بتتحرق في البلد

بس اللي زعلني اكتر تعليق ام مصريه

قالت بالحرف الواحد

اصل انا دعيت عليهم ربنا يحرق قلب امهاتهم عليهم

زى ما حرقوا قلب امهات كتير علي

اولادهم اللي ضربوهم في المظاهرات !!!؟؟؟

زعلت وتأكدت ان المجتمع المصري حصل فيه تغيرااات كتير اوي انا عرفاها

بس كانت الام المصريه عندي خط احمر ابتدي يبهت عندي من تصرفات امهات كتير كنت بشوفها

لكن بالكلام ده خلاص الخط اختفي بالنسبة لي

إلا من بعض الامهات اللي بقوا عملة نادرة

في زمن كل شئ فيه اتشوه وضاع وبقا مسخ

:(

** كمان شوفت فيلم طير انت لأحمد مكي

الفيلم جميل جدا و الحكمه القديمه كون انت مش حد تاني

ماتقلدش حد علشان ترضي حد

في النهاية مش هتعرف لا ترضيه ولا ترضي نفسك

اللي يحبك يحبك زى ما انت

وان مالاقيتش النهارده اللي زيك ويحبك زى ما انت بكره هتلاقي

المهم الاخلاص والوفاء للحبيب

اخر عشر دقائق في الفيلم عجبوني جدا همه تلخيص لحياة ناس كتير اوي


** في النهاية العيد كان غريب اوي السنه دي

حتي غروب الشمس كان غريب مش زى كل سنه

كل سنه وانتم طيبين

:))

عيد سعيد

كل سنة وانتم طيبين وبصحة وسعادة

وادي عدية ماما شمس

:))
هي بدري شويه بس خلاص العيد بعد بكره وانا مسافره
قلت اعيد عليكم قبل مااسافر
:)
نلتقي بعد العيد في النيو لوك بتاعت المدونة
:)

الصمت!!!!!!!!!!

حد جرب مايتكلمش غصب عنه
يعني اصابه الخرس المؤقت
حالة مرعبه وغريبه
ان ماتتكلمش تسمع وماتتكلمش في البدايه تتخنق وتخاف وتترعب وتلاقي الحياة غريبه ايه ده مش عارف اتكلم ولا اعبر عن نفسي وعايز ايه
المدهش بقا ان انت نفسك ساعات تنبسط انك مابتتكلمش مش عايز تتكلم مع حد خالص ودي فرصة كويسه انك تتكلم مع نفسك بس وتعيد ترتيب حياتك وافكارك ودولابك الداخلي وتشغل عقلك شويه في حاجات ركنت عقلك فيها
تلاقي نفسك في تجربه غريبه وتكتشف انها مفيده حبتين تلاته وان ربنا دايما يعمل لك الخير
وتبتدي تشوف حاجات بشكلها الحقيقي
والحالة دي بتخللي اللي حواليك يبعدوا شويه عنك علشان مايضيقوكش ودي فايده عاشرة للموضوع ده
انك تتساب في حالك واكيد انت محتاج ده انك تبقا لوحدك :(

ابو الريش والحقيقه المره