الجمعة، 11 فبراير، 2011

عايزة اتكلم بقاااااااا

امبارح كنا في التحرير والناس هايصه وفرحانه بالمعلومات اللي عماله تتسرب
قلت للبنات ياله بينا علشان نحتفل بالبيت وعندي بومب وصواريخ لزوم الاحتفال وربط في الطريق مع الناس اللي هنحتفل معاهم
وكمان لو اعلن التنحي مش هنعرف نروح ودخول م نصر صعب جدا جدا بعد حظر التجول وكان عدي عليه ساعه اصلا
وقد كان رجعنا البيت في سنه ومن طرق مختلفه وجميع الكباري مغلقه وكانت ليله بيضا
كملت بالخطاب الفريد الغريب المريب الفظيع
الريس مش في القاهرة من الضهر الريس في شارم الشيخ
مش قال لكم عشت وهموت علي ارضها

الريس تعبان وبيقاوح والخطاب اتسجل علي اكتر من مرحلة علشان الريس تعبان علشان كده الخطاب الاضاءه والتون والصورة ساعات بتبقا مختلفه والمنتاج واضح فيها اوي
بس ماشاء الله علي الدكاتره النفسيين المصريين اللي حواليه
الكلام اللي يمس القلب ويشتحف المسائل يقراه من علي شاشه قصاده علشان يبصلنا والعين تيجي في العين
واللي فيه تجبر وعند وتحدي للشعب يقراه من ورقه قصاده

ده ولا الافلام العاطفيه

المهم عايزة اقولكم حاجه
الريس خلاص مشي
بس ليه ياتري ياهل تري هو ماسك وقاعد ومتبت بيده وسنانه كده في الاربع خمس شهور الباقيه
هو خلاص مش هينفع يرجع ولا يرشح نفسه والموضوع خلاص
بس في انتخابات جديده وفي ريس جديد لأول مره في تاريخ مصر مايتفرضش علينا ولا يستهبلونا
المفروض ان في حفل عاااالمي للموضوع ده تسليم السلطه للريس الجديد وده هيدخل التاريخ من اوسع ابوابه
هو مش عايز بعد العمر الطويل ده يذكر في التاريخ بالرئيس المخلوع ومش اي شعب ده المصريين
وطبعا فبركت الضربه الجويه دي اول حاجه هتتشال من التاريخ طبعا علشان كلنا عارفين مين صانع مجد 6 اكتوبر

ومافيش صراع ولا ماصرعش علي السلطه والتورته
والجيش هيحمينا وهيحميه لحد ماده يتم
ماهو ماتنسوش انهم كلهم عساكر في قلب بعض وبيصونوا كرامة راجل منهم علشان المدني اللي يجي يعمل لهم الف حساب
سيبقا الحال علي ماهو عليه وعلي المتضرر يخبط راسه في راس اللي جنبه

حد فاهم مني حاجه انا شخصيا مش فاهمه حاجه من ده كله ومش عارفه هقدر اتغلب علي احباطي وانزل النهارده ولا لأ
منك لله ياحسني مش كفايه بقا ارحل ياكبتن عايزة ارجع اخد الدوا واتعالج

هناك 6 تعليقات:

كيــــــــــــارا يقول...

انا كلمت مينا دلوقت واتشجعت انزل بس مترددة بردو مش عارفه ليه

شمس النهار يقول...

وايه الاخبار هناك؟؟

طمنيني

mahmoud يقول...

حسبي الله ونعم الوكيل فيه وفي كل ظالم عايز الخراب لمصر ربنا يورينا فيه يوم اسود ومهبب ان شاء الله
والف بعد الشر عليكي من الدوا D :D:

كيــــــــــــارا يقول...

بيقولي الجو امن جدا وكلام الجزيرة ان في بلطجية مش صح

غير معرف يقول...

فبركة الضربة الجوية اتقي الله في نفسك انك لم تحجي بيت الله بكل تاكيد وان فعلت فلم يتقبل الله منك الهذة الدرجة لعنة الله علي الحاقدين اللهم اسالك في علاك ان تصب غضبك علي كل افاق ومنهم صاحبة تلك المدونة

كلمات من نور يقول...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر