الجمعة، 18 فبراير 2011

ياصباح الخير+تحديث

ان شاء الله التجمع امام القصر العيني الفرنساوي من ناحية النيل من 12 الي واحده الضهر
وهنزور جرحي الثورة الموجودين هناك
========
ياصباح الخير ياللي معانا

مش عارفه ليه قايمه النهارده عندي حنين شديد ليوم الجمعه في بيت جدي
اللي بيطلق عليه البيت الكبير
كان البيت كله بيصحي بدري علي ريحة البخور الجميلة المميزة لجدتي
واللي بستخدمها لحد دلوقتي
بخور الصندل
كله يصحي وتشرف هي علي اعداد الفطار رغم وجود الشغاله اللي بتحضر
ونتلم كلنا علي تربيزة كبيرة جدا
الجد الجدة الابناء والاحفاد والضحك والكلام
وبعد الفطار الرجال ينزلوا المسجد والنساء نفضل في البيت
مع ريحة البخور وصوت الراديو الخشبي( القيمه السيمه)

يمكن الحنين ده علشان رجعت متنكده من النقابه
فاحنيت لأصالة الشعب المصري والود والحب
وهبقا احكي ايه اللي حصل في النقابه
ربنا يحمي مصر
ويحمي شبابك من الغرور والجهل
ويرحم الاموات
ويرحم الشهداء

هناك 11 تعليقًا:

نبع الغرام يقول...

الله عليكى وعلى الحنين اللى جواكى يا ارق شموسه بالدنياااااااااااااا كلهااااااااااااااااااااااااااااا

نبع الغرام يقول...

صباح الحب صباح الحريه صباح التفائل ياقلبى

ربنا يرحم شهدائنا يارب

جمعه مباركه عليكى وعلى الامة الاسلاميه جمعااااااااااااااااااااء

Haytham Alsayes يقول...

كلنا عاوزين مصر بتاعة زمان
وان شاء الله هنرجعها رغم كيد الحرامية والنصابين

الازهرى يقول...

صباح الفل والجمال والياسمين

تمام نتقاابل هناك وعلشان خاطرك بس
مسموح بتواجد عينات من الحزب والجمعية المحظورين

mrmr يقول...

صباحك صباح جميل يا شموسه
واضح قوى من كلامك وكتاباتك انك حنينه قوى
ربنا يرحم شهداء الثوره
ويكمل شفاء الجرحى

شمس النهار يقول...

*نبع الغرام

شكرا علي كلامك اللطيف ياايناس

صباح الحب والحريه

والحنين للماضي الجميل

اللي هو مصر فعلا

وجمعه وعمر جميل عليكي وعلي كل المصريين

شمس النهار يقول...

*Haytham Alsayes

ان شاء الله ياهيثم بس انا قلقانه جدا
وان شاء الله هكتب بوست عن اللي حصل في النقابه عندنا
وخلاني قلقانه كده

شمس النهار يقول...

*الازهرى

:)))
صباح المناكفه وجر الشكل

لا ماتخافش ماحدش جاي اصلا
هنزل دلوقتي وماحدش كلمني ولا شيك علي الموعد

هنزل مع ناس تانيه
مش عارفه البلوجر ماله
لا حبوا يحتفلوا ولا حتي الزياره

الا ماتعرفش حاجه عن مبارك لحسن وحشني
وتصدق اسبوع ولاحتي تليفون
ده كلام

:))

شمس النهار يقول...

*mrmr

ياصباح الورد والفل والياسمين

شكرا ليكي كلك زوق

بس انا لما نفسيتي بتتعب بجد بحن اوي لبيت جدي
ماعندكيش فكره كان بيت دافي ازاي
وكنه مسمينه بيت الامه
كنتي تلاقي علي طول ناس موجوده
والاكل علي طول محطوط علي السفره
العيله وعيلة العيله هناك
من اول ابن خالت ابن عم من ام تانيه لحد اعمامك
:))))))))))

عالم حبيب يقول...

المشكلة في موضوع الصلح بين الشرطة والشعب ,, كل ظابط يجيبوه على التلفزيون يحلف مية يمين إنهم كلهم نازلين بدون تسليح ,, أمال الناس اللي ماتت دي ماتت أزاي !!!!!!!


بداية الصلح وإعادة الثقة هو الإعتراف بالخطأ والقصاص العادل ,, بعدها ممكن ترجع الثقة لما نحس إنكم بني آدمين بتعاملوا بني آدمين

IBN BAHYA - إبــن بهيـــــــــــــة يقول...

سنواصل الكفاح يا شباب
جمعة مليونية كل يوم جمعة حتى تتحقق أهداف الثورة التي لم يتحقق منها سوى 30% فقط فالنظام مازال كما هو وقتلة الشهداء كما هم في مناصبهم ، بل إنهم يمارسون أعمال البلطجة حتى الآن ويعتقلون من تصل إليه أيديهم ، لن يهدأ شهداؤنا ولا دمائهم الطاهرة قبل محاكمة قاتليهم

أهـــــــدافنـــــــــــا واضحـــــــــــــة
أولاً
مجلس رئاسي مدني
ثانياً
حكومة انتقالية تكنوقراط تحل محل الحالية التابعة للعهد البائد
ثالثا
تطهير البلاد من الفساد في الوزارات والمحافظات والمحليات ومحاكمة المجرمين علنيا سواء القتلة من الشرطة أو رجال الأعمال
رابعا
إقالة النائب العام واستقلال القضاء عن وزارة العدل
خامسا
إلغاء قانون الطواريء
سادسا
الإفراج عن المعتقلين

حتى تتحقق هذه المطالب سنظل نخرج كل يوم جمعة في مظاهرات مليونية للمطالبة بتحقيق أهداف الثورة .. فمازال الحزب الواطي يصول ويجول بطول البلاد وعرضها وكأن شيئاً لم يكن

لن نخذلك يا شهيد
لن نخذلك يا أم الشهيد
لن نضيع دمكم الذي دفعتموه لتحرير الوطن ونكتفي ببعض الفتات فتتقلبون في مرقدكم

والله لن يكون
http://ibnbahya.blogspot.com/