سوق العبور للخضار فرع القصر العيني+تحديث لليبيين

إلى الشباب الليبي ...أنترنت مجاني وغير مراقب في ليبيا اتصال بالرقم
+494923197844321 begin_of_the_skype_highlighting +494923197844321 end_of_the_skype_highlighting
User: Telecomix
Password: Telecomix
الرجاء النشر في كل المواقع حتي يتمكن ابناءنا الليبيين في الداخل من التواصل وارسال الفيديو
=========
البوست ده منشور بشكل غريب للي بيستخدم متصفح فير فوكس

==========
حته علي الماشي كده :بالنسبه للشخصيه الكرتونيه
اللي عاملي فيها زعيم مافياولا السقا في فيلم ابراهيم الابيض(ابن القذافي)
وخطبته الكرتونيه مش فهماه هو بيوقع بين الليبيين والتوانسه والمصريين
يازين ماربيت ياقذافي
ماعلينا ندخل علي البوست
------
لست من الشخصيات الزنانه او الندابه
لكن دلوقتي عايزة ارتدي الزي الرسمي المعتمد لستات الصعايده اللي ميت لها ميت واربط راااااااسي ولا الاخ رامبوا وهو داخل علي حرب
لييييييه؟؟
من اللي شفته في سوق العبورللخضار فرع المنيل(القصر العيني سابقا)
-------
نبتدي الحكايه
الاعلام استفزني جداااا كله شهداء شهداء مافيش سيرة عن المصابين
غير شوية ارقام وكلام
قلت لا نروح نشوف ايه الموضوع ونزور الناس دي
احترنا ناخد ايه معانا قلت يعني الاول نروح نعرف محتاجين ايه
وبعدين نجيبلهم هي يعني هتبقا زيارة واحدة
المهم كلمت مندوبتنا في القصر العيني كيارا
قالت اوك تعالوا قسم الرمد في القصر القديم
رحنا والدتي وصحبتي وحصلنا علي هناك ازهري وكيارا
ومن اول مادخلت هناك حصلي حاله من
الهلع والزهول مع قليل من الانفهاش
اولا علشان تدخل المبني لابد ان تدفع خمس جنيه تذكره
(ده علي اساس اني داخله الملاهي)
المشكله ان اصلا ده مستشفي حكومي المفروض انه شبه مجاني يعني لمعدومي الدخل
كمان كدابين كاتبين ان الخمس جنيه من الساعه تلاته للساعه خمسه واحنا كنا هناك الساعه واحده ودفعنا
ودي اليافطه المتعلقه علي الباب الداخلي للمستشفي يعني بعد البوابه اللي بتدفع عليهاماعلينا
المهم اتفسحنا في المستشفي علي ماوصلنا
لييييييييه؟؟
علشان بنسأل علي قسم الرمد يعني جرحي الثورة
حد يصدق اني اسأل ممرضه عن قسم الرمد تضحك ضحكه خبيثه وتقول لي مااعرفش هنا نطت مني جدتي الصعيديه وشخطت فيها شخطه رعبتها
(مااعرفش عملت كده ازاي اصلا)
راحت قايله من الناحيه دي
المهم وصلنا اخيرا
ومن هنا كانت البدايه
اللي ثبتتني يومين هناك وهنشر البوست وطالعه تالت علي هناك
دخلنا غرفه مترين في مترين فيهاتلات سراير
وماحدش يقول لي ازاي علشان انا مهندسة ديكور ومااعرفش حطوهم ازاي
اللي اعرفه اني ماكنتش عارفه اقف فين
التلات سراير عليهم اربع ابطال بمرافقينهم بالزوار
كان زمان بيخوفوا الاطفال باوضة الفيران
بس عمرهم ماشافوها كده شفتها خلاص
المهم يادوب بنتعرف ونسلم لاحظت
انهم مش طايقنا ومش عايزين يتكلموا معانا اصلا
وكنت مستغربه جدا وقلت لهم في ايه احنا جايين نزوركم ونشوفكم عايزين ايه
في نفس واحد مش عايزين حاجه
بصراحه ضحكت
قلت لهم لا كده فيها قاعده
قالوا لي انتوا تبع ايه قلت لهم تبع ربنا
وعرفت ان الناس بتيجي من جمعيات غريبه ويتكلموا معاهم ويمشوا مايرجعوش
لييييييييييه؟
اللي عرفته ان الادارة السبب
ماعلينا المهم
واحنا لسه بنتكلم اذ فاااااااااجأتا
يدخل علينا شاب من المصابين برضوا وبيزعق حد يشوف ايه الورق اللي عايزينا نمضي عليه ده كمان وكان منفعل جدا وبيشتم
قلت له وريني قالي انتي مين بقا ؟
قلت له ياعم هات وبعدين ابقا اعمل لي كشف عيله
ايه الورق ده
توكيلااااااااااااااااااااااااااااااااااااات
عايزنهم يمضوا علي توكيلااااااااااااااات
علشان يرفعوا قضايا ياخدوا تعويضااااااااات
بس وبمااني ماافهمش في القانون
رحت طالبه المحامي الخاص بي وجبته علي الاسبيكر وقريت له الورقتين والناس اتكلمت معاه واتكلم معاهم وفهمهم ان دي توكيلات هبله وماحدش يمضي ولا يعمل توكيل لمحامي الا لو كان يعرفه معرفه شخصيه
علشان ممكن يجي لهم حد من بتوع مافيا التعويضات
من هنا اطمنوا لينا
والورقتين معايا واتضح ان الاسمين دول تبع محامي معروف وكان ضد الثورة اصلا
سجلت مع المصابين وكلهم اجمعوا علي انهم مش عايزين حاجه ومش عايزين فلوس
عازين كل اللي ضرب عليهم وخسرهم نور عيونهم
يتحاكم
ودي احدي اليفط المعلقه هناك معلقنها المصابين هناك
وعايزين يكملوا علاج ويتعاملوا معامله كريمه وينقلوهم عنبر ادمي لوحدهم
وزعلانين ان الناس سيباهم ونسياهم
ده حمام العنابر
انا نقيت انضف صورة مارضتش احط صورة اصعب من كده
علشان لوحد بيقرا البوست وهو بياكل ولا بيشرب
انا سجلت فديوهات كتير جدا
بس مش هتقدروا تشوفوا غير १८ بس
ربنا قدرني ورفعتهم علي اليوتيوب
المهم
انتقلنا للعنبر الكبير بقا
ساحة السوق الاصليه اللي علي حق ربنا بقا
امي انفعلت وطق فيها العرق التركي وكانت هتتجنن
وازهري اختفي في ظروف غامضه
واتضح انه كان قاعد مع المصابين بيحكي
واكيد عنده حكايات كتير واكيد هينشرها
كياره رغم انها اصلا بتشتغل في القصر العيني
بس كنت كل ماابص عليها الاقي علي وشه تعبير غريب جدا
مش قادره احدد زهول ولا زعل ولا هيغمي عليها
بس كانت ساكته وكلامها قليل
وصديقتي اللي كانت معايا مالقيتهاش
اللي حصل اننا تفرقنا في العنبر وكل واحد بقا في حته مع مصاب شكل
المصابيين شباب من اول تسع سنين طفل وطفله
ماقدرتش اسجل مع الولد اكتر من ३६ ثانيه واغلبهم صمت علشان كنت هعيط
ومش معقول الولد يقول لي كنت رايح اسقط مبارك مع بابا
وانا اعيطله
اما البنت ماقدرتش ابص لها اصلا كنت هنهار ومش هكمل
المهم
اتصاحبنا كلنا وبقينا عيله
اه وربنا العنبر مرضي ومرافقين بالزوار بقوا اصحبنا وعرفناهم بالاسم
وسجلنا في الخباثه علشان مااتطردش
واحنا بنسجل في البلكونه اذ فجأتا نسمع خناقه جوه وشتيمه
وطبعا صورتها فيديووووون
الخنااااقه ليه بقا(علي فكره دي كانت رابع خناقه بس دي خناقه مخصوص شويه)
اسباب الخناقه
التمرجي مع واحد تاني شكله غريب مريب
عايزين يغيروا الملايات والبطاطين لييييه؟؟
الاخوة في التليفزيون المصري تحت عايزين يطلعوا يصوروا
الله مش التصوير ممنوع واي وكالة انباء او فضائيه تيجي مابيطلعوهاش اشمعنا بقاااااااااا
وطبعا عايزين يفرشوا ملااااايات بيضا وجديدةويحطوا مخدات
ويغيروا البطاطين المقطعه ويطردوا المرافقين والزوار
وقفنا مع الشباب ورفضنا انهم يعملوا ده
وقلنا اللي عايز يصور يصور علي الطبيعه وتم طرد التمرجي والشخص الغريب المريب ده
ودخل دكتور ومعاه شباب من شباب २५ يناير بس مش مصابين
وواحدة منهم قالت لي في ايه بس ليه بتعملي كده وبتقومي الناس علينا
احنا عايزين مصلحتهم وعايزين نوصل صوتهم للناس
حضرتك مين قلت لها انا مصريه مش مهم اكون مين
انتي اللي مين قالت احنا شباب تحالف 25يناير
اتكلمنا وفهمتها اللي حصل
وانضمينا مع بعض ووقفنا وماخليناش حد يصور غير الحقيقه وعلي الطبيعه
اه نسيت اقولكم ان بتوع جمعيات خيريه جم واحنا هناك جايبين لهم ورد
ومارضيوش يتكلموا معاهم
وانا بتناقش مع واحده منهم وانتوا تبع ايه وبتاخدوا اساميهم وارقام بطاقتهم ليه
وقالت لي اسم جمعيه وهميه عمري ماسمعت عنها اصلا ولما قلت لها كده
وشها اتغير وقالت لي يعني تعرفي كل الجمعيات قلت لها اه
لما حاصرتها بالكلام اتعصبت وقالت احنا جايين نخدم ومافيش ثواني لاقيتها كأنها ماكنتش هنا اصلا هربت من العنبر
ولحد دلوقتي مش فاهمه الموقف ده ايه
؟؟؟؟؟
وخلصنا الزياره وروحنا واحنا راجعين عرفنا ان في خناقات بتم في بعض الاحياء الشعبيه ولسه سواق التاكسي بيحكي لنا
وهوب
لاقينا الشارع اللي يوصلنا علي م نصر مقفول الحته بتاعت الدويقه
ولما استفهمنا قالوا بلطجيه واقعين في بعض ومع السكان
مارتحتش خالص للموضوع
يادوب وصلت البيت لاقيت شاب من المصابين بيقول لي في حاجات غريبه بتحصل
في مرضي شكلهم غريب بيدخلوهم العنبر واصلا العنبر الكبيرده كل اتنين علي سرير
قالي شكلهم بلطجيه وبيجروا شكلنا وفعلا علي باليل لاقيته مكلمني بيقول لي ان بيمشوا مصابين من الثوره علشان يدخلوا مصابين الخناقات
وعلي الصبح كانوا مطلعين ناس كتير وطبعا من غير تقارير
وربنا يكرمهم شباب التحالف الصبح
راحوا علي هناك ومعاهم جرائد مستقله وحكوميه (اخبار اليوم) وبعض التليفزيونات تصور
كده بقا رسمي كل شئ انكشفنننن وبان
وعلي مارحت مع بنتي والبنوته اللي اتعرفت عليها من التحالف
كان الاعلام مشي
وبعدها
كان البلطجيه تمكنوا من العنبر تماما
ولاقينا الشباب بتاع التحالف تحت مارضاش يطلعونا وقالوا المنظر فوق مش مظبوط وهنروح نعمل بلاغ في الشرطه(مارضيوش قالوا لو دخلنا العنبر هنتقطع)المهم راحوا للشرطه العسكريه وقدموا بلاغ بالحالة والوضع
ورحنا احنا الباقي علي مستشفي المنيره نشوف المصابين هناك
(وهنتكلم علي الموضوع ده بعدين)
المهم خلصنا الزياره وروحت علشان بنتي كان عندها دكتور(ماهي كمان عينيها تعبانه من القنابل المسيله للدموع)
ويادوب روحنا البيت ولاقيت تامر (شاب من المصابين)بيكلمني وهو منفعل جداااااااااا(وده اصلا غلط علي العمليه اللي في عينه)
الحقونا الجيش جوه العنبر وبيهددنا وبيخرجونا وبيقولوا انتوا بلطجيه
والدنيا بقت غريبه وانتوا مش مرضي ولازم نفضي العنبر دلوقتي
قلت له طيب اقفل واكيد في غلط
قال لي انا هعتصم قصاد المستشفي ومش هنمشي
قلت له ماشي ده احسن حل علي ماالناس تجيلكم
وفعلا اخدوا بعض واعتصموا امام المستشفي وكل اللي يشوفهم من الناس يركن عربيته ويقف معاهم بعد مايعرف
الموضوع لحد مالكوبري بقا كله متظاهرين ضد المستشفي
كلمت احد شباب التحالف ولاقيتهم جزء في احمد ماهر وجزء في النقابه بيتظاهروا علشان ليبيا
قلت لهم علي اللي حصل وقلت لهم الحقوا الناس اكيد في غلط لايمكن الجيش يعمل كده
وربنا يحميهم لموا بعض وكلموا دكاتره من شرفاء القصر العيني وطلعوا علي هناك
ايه اللي حصل بقاااااااااا
مانعرفش مين من المستشفي راح للجيش اللي بيحمي المستشفي وقال له البلطجيه من اهل بعض المرضي احتلوا العنبر وبيبرشموا وبيعملوا حاجات مش مظبوطه وبيهددوا المرضي والدكاتره تعالوا اطردوهم علشان نعرف نشتغل
طبعا دخل الجيش وجد ان الكلام صح
وطرد الكل اللي في العنبر
شباب التحالف فهموا رئيس القوة العسكريه بتاعت المستشفي
الموضوع والدكاتره كشفوا علي الممرضي وطبعا همه عارفين بعض
والحمد لله المصابين رجعوا العنبر علي مسؤلية هذا الضابط الشجاع
بعد ماكنوا قعدوا في الجو السئ بتاع امبارح اكتر من تلات ساعات
عايزة اقول لكم ان مابيرضوش يدوا اي حد تقرير بالحالة
ولا حد عارف اي حاجه في اي حاجه
وعاجزة عن الكلام وهسيب الفديوهات تتكلم
والمقاله دي
والمقاله دي
وعشان هي كتير هحط اللينك بس مع فيديو واحد بس
http://www.youtube.com/watch?v=SNCKVtNdUqM