الاثنين، 7 فبراير 2011

همست عتاب بالقبقاب+تحديث في سؤالين وحته+تحديث

لا كده مش هينفع انا ممكن اطب ساكته في البلد دي
البلد فيها ثورة وبتتولد من جديد
والمفتي بيقول ان مصر محسوده
طيب ياريت يرقيه والبخور عليا
بجد احنا كده بنضحك الناس علينا
========
دلوقتي بيقنعوهم يروحوا القصر الجمهوري:))

مش هددوهم الاول لو راحوا ولو اتحركوا هيعملوا ويسوا
وحطوا حواليه حراسه مشدده

وسلك
ولا دي خطه قطه علشان يسيبوا الميدان
=========
للي بيشتموا في قناة الجزيرة هي الجزيرة راحت صورت في ميدان تاني غير ميدان التحرير ولا بلد تانيه غير مصر مش ده اللي حصل فعلا؟؟؟
ولا هنعمل زي الست الوحشه اللي راحت تتصور ولما طلعت الصورة وحشه مسكت في خناق المصور وكسرت له المحل!!؟؟
سؤال للحكومه هو 15%علاوة دي رشوة للشعب !!؟؟
ولا انتوا فهمتوا الشعب اوي كده!!؟؟
غلبان وبيرضي بقليله
اول مره في التاريخ يتخاف علي ثورة من شعبها
وتظل مصر ام العجايب
==========

للجيل الجديد اللي مايعرفش يعني ايه قبقاب
القبقاب ده عبارة عن مداس خشبي (شبشب) لزوم الحمام زمان
وهو السلاح الرسمي المعترف بيه زمان للعقاب
وهو السلاح المعتمد تاريخيا اللي اتقتلت بيه شجر الدر
المهم
احب ان اهمس همسة عتااااب(لحد دلوقتي) تحت تهديد القبقاب
لمين؟؟
للباشمهندسين
اللي في ايران احنا حبايب وحلوين
لكن تدخلوا في شؤنا وبينا وبين بعض
لا
مصر هي مصر لاهتبقا ايران ولا انتوا تلزمونا اصلا

والكباتن
اللي في امريكا الكابتن المتر اوباما اللي كل شوية طالع يقولنا ناوناو
والست كلينتون ناوناو
ياريت تبطلوا تنونو وبالتالي احنا هنسبكم تهوهو
مااااالكوش دعوه بينا
واديكوا شوفتوا مصر علي طولها وعرضها ايد واحده واتحمت من شبابها مش من الشرطه

والزغاليل اللي قبل كده دبحناهم وصدناهم زي العصافير في 73 بلاش انتوا بالذات
بلا امن اسرائيل بلا نيله
ولا تحبوا الشعب المصري يبعت لكم كام مليون من الشباب يحرس لكم امن اسرائيل ويجيب عليها واطيها والشباب اهو اثبتوا جداره في الحراسه والامن

ياريت العالم كله مالوش دعوه سيبونا نحل مشاكلنا بنفسنا
ومانجلكوش في حاجه حلوة

هناك 11 تعليقًا:

tarek momen يقول...

يا نهار ابيض تخيلي بعد ما قرات البوست اكتشفت فعلا ان عدد الناس اللي اشتركت في مظاهرات الجمعة اللي فاتت في جميع انحاء مصر يقترب من عدد سكان اسرائيل يعني لو اجتمعوا كلهم و تفوا علي اسرائيل تغرق و تموت

sony2000 يقول...

يالله
بجد بجد
احنا بعد كدا اللي هيتكلم
هنطلع عليه شبرا بس...ونشوووووووف
احنا كولنا رجااااااااله مش اي حد:)

Mina يقول...

ماهو علشان كدة الناس عملوالها زار في التحرير

mrmr يقول...

تصدقى يا شموسه
باين علينا اتحسدنا يا اوختى
تفسير رائع للقبقاب بس اعتقد ان الكل عارف يعنى ايه قبقاب
نورتى المحكمه يا اجمل شموسه

لــــ زهــــــراء ــــولا يقول...

والزغاليل اللي قبل كده دبحناهم وصدناهم زي العصافير في 73 بلاش انتوا بالذات
بلا امن اسرائيل بلا نيله
ولا تحبوا الشعب المصري يبعت لكم كام مليون من الشباب يحرس لكم امن اسرائيل ويجيب عليها واطيها والشباب اهو اثبتوا جداره في الحراسه والامن

ياريت العالم كله مالوش دعوه سيبونا نحل مشاكلنا بنفسنا
ومانجلكوش في حاجه حلوة

" بصي بقى انا مكانش ليا نفس للدنيا ولا اضحك ولا حاجة نسيت الضحك اللي من القلب من فترة بس بجد قلبي ضحك من قلبه من اسلوبك وقلتي كل اللي في قلبي وكنت عايزة اقوله للزغاليل والمتر اوباما والقطة هيلاري كلينتون وخليها في فضيحة الحاج كلينتون اللي سيرته متعطرة منين ما بيذكر ورسالتك للكباتن الايرانيين وخاصاً الكابتن الكبير كبير القاعدة الحاج الخمينئي تسلم فمك وادي الشعار محطوط مش بالشبشب لأ بالقبقاب وسمعني اجدع سلام لو مكنتش انت تدلعني بالقباب مين هيدلعني ... وكمان سلام يابرادعي المانجا ماهيش نوواوية بالمرة عشان انتي نسيتي عم البرادي في حوارك اللي جاي ياخد حتة من التورتة ونزل ببرشوت ع السخان يمكن يلحق

لولا

موناليزا يقول...

جامدة يا شموسة:)

د.ريان يقول...

صباحكم خير وطيبة

مدونة جميلة ورائعة

ALLELIO- موطنـــــــــــــــــــــــــــى(ma patrie) يقول...

موضوع ايران مفهوم ومنطقى لان ايران عاوزة تعمل امباطورية فارس وتعيد امجادها من جديد

بالنسبة لامريكا فمنطقى جدا لان امريكا شايفة فى حسنى حجرة عثر لتدخلها فى مصر وبالتالى التحكم فى قلب المنطقة العربية عن طريق اقامة قواعد امريكية فى السويس وحسنى كان رافض الموضوع دة


بالنسبة للشعب فالمحترمين منهم رجعوا المنازل بعد خطاب الرئيس اما البقية فعاوز اعرف الاكل اللى بيروحلهم دة على حسب ماسمعت بيروح منين ؟؟؟

Kiara يقول...

بالنسبة للعلاوة دي بما انى من موظفين الحكومة

اينعم بعقد لكن كل زمايلي في الشغل قرروووو يطلعو ويعلنو رفضهم للعلاوة دي

بس اللي واجعني ياماما ان التليفزيون المصري غسل عقول وخلاهم ماشين بيكررو كلام قايله شوية اعلاميين حسبنا الله ونعم الوكيل

Kiara يقول...

عاوزه اقول كلمة كمان

اللي مراحش الميدان ووقف جوا المتظاهرين

عمره ما هيوصل للاحساس اللي جواهم

علي راي عادل

ميدان التحرير تحسي انه مصر بجد وريحته عنبر وريحان

ويديكي قوة تهد جبال

وجواكى دفعه مش ممكن يتصورها حد

حاجه تخيلي تقولي

الله اكبر بنفس احساس جند مصر وهما بيعبرو

إنسان || Human يقول...

هههههههه
الكابتن المتر اوباما لا حلوة
المشكلة ان في ناس تستغل كلام ايران وتقول الحقوة في اجندات ايرانية