الجمعة، 11 فبراير 2011

اخيرا فهمت حاجه

الدكتور عمرو حمزاوي كان بيتكلم من شويه علي العربيه
وقال كلام زي الفل بصراحه

وكذلك وائل غنيم كان علي العربيه وقال كلام برضوا زي الفل

اللي فهمتوا وتحققت منه من اكتر من مصدر

الرئيس مابقاش رئيس خلاص
يعني بقا رئيس شرفي ليس الا يعني يملك اللقب ولا يحكم الشعب خلاااااااااااص

ولا يقدر يقابل حتي مندوب دولة نيام نيام(اللي عايز يعرف ليه يقرا البوست السابق)

نرجع للخطاب الخطاب واضح انه معمول للقضاه والمستشارين والسياسيين واوباما وليس للشعب
لو سمعت الخطااااب بالراحه كده هتلاقي انه خطاب سكلانس حفظ لماء الوجه
يعني حتي وهو ماشي بيتنطط علينا

الخطاب مكتوب بطريقه انه مايتفهمش ليه مااعرفش
خطاب مكتوب بطريقه عنجهيه جامده
يااخواااااااانا ياللي في الحكووووومه عايزين حد يطلع علينا يكلمنا بالبلدي كده يفهم الناس اللي في الشارع راسها من رجليها الناس اللي في الشارع مش من المجمع اللغوي ولا استلفناهم من فقهاء الدستور والسياسه
اللي في الشارع دول خليط من المجتمع من اول بياع البطاطه الي وكيل الوزاره
حد يطلع يكلمهم ويكلمنا
حد يقول لنا ليه فتحي سرور قاعد علي قلبنا كام شهر تاني
ليه الشريف قاعد
ليه احمد شفيق متحدي الشعب وسايب وزير الاعلام قاعد في تكية التليفزيون المصري
ليه الناس اللي بتتحاكم دلوقتي زي مابيقولوا بيروحوا بيوتهم مع ان الريان اتحبس من اول يوم
حد يطلع يقول للناس ليه اللي قتلوا الشباب في المظاهرات مااتفضحوش لحد دلوقتي مع ان السادات اللي مش عاجبنا لمهم في ليلة واحده زي الفيران
ميت الف ليه حد يعبرنا ياحكومه الله يخربيوتكم الشعب كله في الشارع الا انتوا
مع ان انتوا اللي خربتوها

هناك 11 تعليقًا:

محمود يقول...

سيعلم اللذين ظلموا اي منقلب ينقلبون كل النظام حرامي الديك دليل حجيتي بيت الله بلغت من العمر مابلغت ولا تحكمي عقلك ودينك حسبي الله فيك جزاوك عند الله عسير

محمود يقول...

ياايها اللذين امنوا ان جائكم فاسق بنبا فتبينوا ان تصيبوا قوما بجهالة لدينا في مصر ثقافة التخويين ينبع ذلك كلة من بعدنا عن ديننا في قريتي الصغيرة اسرة بنت بيتا جميلا من عدة ادوار قالوا الناس عليهم انهم يتجارون في المخدرات واخرين قالوا انهم عثروا علي شنطة بها مليون جنية هذا ما يحدث الان في مصر وان شاء الله سيرحل مبارك وسيتولي غيرة وغيرة ولن يسلم ايهم من نفس تلك الاقاوييل يحزنني انك سيدة كبيرة في السن ولا تتعقلي حسبي الله ونعم الوكيل

محمود يقول...

من يتذكر السادات وايامة يعلم اننا دائما يجانبنا الصواب فيما نفعل ونحكم بة وهذا ما سيحدث اللهم اسالك اللطف اللهم لاتؤاخذنا بما فعل السفهاء منا اللهم انت تعلم من علي الحق ومن علي الباطل

لــــ زهــــــراء ــــولا يقول...

لاول مره فى حياتى احتاج انى ادرس لغه عربيه بجد لان الخطاب تقريبا كان بيتكلم فيه بلغه ميته ماحدش بيستعملها

زهراء

شمس النهار يقول...

محمود

ياريت افهم منك علي اي شئ تعترض علشان زي ماقلت انا ست كبيره وعلي قدي

ياريت تفهمني
وانا طلبت ان حد يفهمني
ياريت الحد يكون انت

مشكلتنا يااخ محمود اننا مابنتكلمش صح مع بعض
ياريت نتكلم مع بعض ونفهم بعض واللي مش فاهم يفهم اللي مش فاهم
انا اجتهدت وحاولت افهم ولو كنت قريت البوستات السابقه كنت عرفت اني كتبت انا مش فاهمه حاجه
وبرضوا ماحدش دخل المدونه يفهمني

هو ده نفس اللي الحكومه ومبارك بيعملوه من يوم 25 يناير
لاعيزين يفهموا ولا يتكلموا مع حد ولا يفهموا حد

اللي في التحرير في التحرير
واللي في الحكومه في الحكومه

واللي في البيوت مش فاهمين حاجه

لو انت فاهم فهمني

وبعدين نبقا نقعد نندب علي مصر علي مهلنا

أع ـقل مـ ج ـنـونــة يقول...

شمس ..
اعرفي انه مش هيسيب الشعب الغلبان دا الا علي مستشفي المجانين !

هيعمل زي الصهاينة
ميسيبوش شئ الا لما يدمروه

لــــ زهــــــراء ــــولا يقول...

انا شايفة يا شمس ان الخطاب واضح
بيعتذر عن دم الشهدا.
بيفوض البرلمان لتعديل 5 مواد من الدستور.
بيفوض صلحياته للنائب اللواء عمر سليمان.
ايه موش واضح؟ انتم كنتوا عايزين كلمة واحدة ملقتوهاش انه يتنحى وده اللي خلى الخطاب عندكم موش واضح لانكم مبرمجين الاحداث على كلمة واحدة وهو التنحى .. بس لو دققتي شوية هتلاقيه بيقلكم انا تنحيت بس بلغة تحافظ على ماء وجهي ارحموا عزيز قوم ذل يا ناااااس

لولا

ذو النون المصري يقول...

الان قرر يطلع و يتكلم
للاسف قراراته دائما متاخره جدا
يبدو انه صدق نفسه بلعتباره حكيما بالفعل
لقد زينوا له هذه الصفة و جعلوها علما عليه و مدحوا له التاني في اتخاذ القرارات بعد دراستها و فحصها حتي تاتي دائما في مصلحة الشعب
و الان يتاني في اتخاذ القرارات فتاتي علي دماغه في النهاية

محمود يقول...

ياشمس فعلا احنا مش بنحاول نفهم بعض بس علي الاقل لدينا دين وعقل دين نشوف الرسول عمل اية في دخول مكة وقبله وحاشا لله ان اصف احدا بالكفر العقل ان كان هذا الرجل حرامي ولدية 70 مليار كما يقولون كان مشي وهرب اخلاق يعني شمس ست اكيد لها اشياء كويسة واشياء مش كويسة مش ممكن حد عندة اخلاق يوصفها انها وحشة واخيرا رايت معي يلفطات مثل ارحل ياحمار الخ دي اخلاق تصوري اني الان مقتنع ان لو حدث ورشح احدا ممن قاموا بالمظاهرات نفسة لرئاسة مصر ساذهب لميدان التحرير ولن ابرحة حتي لو كنت بمفردي لية لاني هخاف منة فرض الرائ بهذة الطريقة الا بيفرضوها علينا خلق لهم وسيخلق لهم اعداء

Unknown يقول...

خلاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااص

Unknown يقول...

الله أكبر
الله أكبر
الله أكبر
الله أكبر
الله أكبر
الله أكبر