الخميس، 17 فبراير 2011

كله الا الشخصنه +تحديث

ان شاء الله هنحاول نتجمع يوم السبت ونروح نزور جرحي الثورة
ارجوا نشر الموضوع واللي عايز يجي
اهلا وسهلا بيه
======
حزييييييييييينه جدا
مش مصدقه ان اللي بيتظاهروا دلوقتي وبيعملوا اعتصامات
دول يكونوا شاركوا في الثورة
مش ممكن ليه كده
كل واحد في مكانه عارف مين راس الفساد مش محتاج يتظاهر خلاص
يتجمع كل من له مظلمه داخل النقابه او الادارة او البنك او المصنع
وتتعمل شكوي جماعيه رسمي ويمضوا عليها وتقدم للنائب العام لو معاها اوراق
او للجيش
حراااااااااااام ماضيعوش الثورة
ماضيعوش الفرحه
ماتتدوش لبقايا جرزان الحزب الوطني
يسرقوا مننا الثوره
ويبقا في فوضي
ويثبتوا ماقاله الرئيس المتنحي انه نفسه يمشي بس خايف علي مصر من الفوضي
لما تنحي وعدي يومين من غير فوضي صعب علي بعض الناس
فاحبوا يعملوا فوضي
اخرت الفوضي دي ايه وقف الحال اخرته فين
في ايه يامصريين ياللي واقفين حال البلد
عجيبه مش كنتوا بتندبوا وتولولوا علي وقف الحال والخسارة الماديه والسياحه
والناس اللي باليوميه
والاقتصاد اللي وقع والبنوك والبورصه اللي قافله
مين بقا قافل البنوك دلوقتي؟؟
مين اتسبب ان المدراس تتأجل لتالت مره
مش انتوا
الحمد لله انهم مش متظاهرين الثورة
متظاهرين الثورة سواء شهداء او احياء اهدوا الشعب النصر
خلااااااااص رجعوا بيوتهم رجعوا مواقعهم علشان يبنوا ويراقبوا تحقق المطالب
كنا بننزل وبنحارب علي النت اللي بيهاجموا المتظاهرين
والبعض دخل هنا وفي الفيس وعلي الميل شتمنا
ودلوقتي مين اللي موقف حال البلد
اللي بيحب مصر يحافظ علي مصر
والحب مش كلمة الحب فعل

هناك 37 تعليقًا:

mrmr يقول...

انا نفسى يا شموسه فعلا اوجه كلمه للناس اللى بيطالبوا فى الوقت الحالى بمطالب شخصيه
يا ناس مش وقته خالص اهم شئ دلوقتى مصر واستقرارها وامنها وبعدين نبص للمطالب الشخصيه
اللى عايزين يزودا الاجره المكوباصات واقفين حال البلد واللى عايزين زياده فى الاجور واقفين حال البلد واللى بيطالوا بحوافز ومساواه بين المكافاءات واقفين حال البلد
لو بتحبوا البلد فعلا حافظا على امنها واستقرارها وبعدين بصوا للمطالب الشخصيه اطلبوا اولا الامان والنهوض ببلدنا ونظامها وبعدين كل ده يتداوى

شكرا ليكى شموسه
http://sahrdodo.blogspot.com/2011/02/blog-post_16.html
ده موضوع مهم ياريت تبدى رايك فيه

شمس النهار يقول...

* mrmr

مش عارفه يامرم يعني همه سكتوا ده كله حبك دلوقتي وان شاء الله مين هيعمل لهم ده كله
دول عايزين مصباح علاء الدين

لازم الامور تستقر علشان في الهوجه دي ممكن الناس الفاسده يحرقوا اوراق كتير بتدينهم

وحاضر من عينيه هروح اشوف اللينك شكرا انك حبيتي تشاركيني معاك

mrmr يقول...

هما فعلا يا شموسه الفاسدين والخارجين على القانون ابتدوا يحرقوا اوراق كتير تدينهم وربنا يستر ويعدى الايام اللى جايه بخير

سواح في ملك اللــــــــــــــــــه- يقول...

السلام عليكم
اصل كل مؤسسة من المؤسسات دي يقودها
شخص كان او لازال من ازلام النظام
والناس قرفانة منهم بس كانت بتكتم في
نفسها لما وقع الكبير اهتزت هيبة هؤلاء
فقد كانوا يخشونهم
فحصلت الزيطة دي
رغم اني مش مايدها
بس كان يجب علي الجيش اسقاط كل
هذهالرؤوس ليريح الناس منهم
تحيتي

شمس النهار يقول...

* mrmr

رحت اللينك وقلت راي ورزقي علي الله

:))

شمس النهار يقول...

* سواح في ملك الله

عارف الناس خايف لا الدنيا تهده ومافيش حاجه تحصل

بس صدقني كل ده هيتشال
بس انا معترضه علي الاسلوب انا ممكن اعمل كل اللي انا عايزاه من غير مااعطل البلد

زي ماعملوا بتوع التليفزيون
طردوا الناس الوحشه وشغلوا التليفزيون
وراحوا قدموا الاوراق للنائب العام
وماقفلوش التليفزيون

سواح في ملك اللــــــــــــــــــه- يقول...

لازال هناك شيئا ناقصا لم يفعله قيادات
الجيش لو فعلوها لاسكتوا الناس وهدات
الاصوات ولصبروا حتي يروا

شمس النهار يقول...

* سواح في ملك الله

ايه هو من وجهة نظرك؟؟؟

سواح في ملك اللــــــــــــــــــه- يقول...

احتجاز اوالتحفظ علي
اموال الرئيس حتي يتم البت فيها
ثانيا هما بيقولوا ده خدم مصر
وحارب من اجلها
وكانه حارب وحده اوكان قرار الحرب بيده
ومن الطرائف ان قبل الثورة باسبوع
كان يرقد جمعة الشوان البطل المصري
في مستشفي مصطفي محمود وباع بيته ولايجد
ثمن الدواء اليس هذا بطلا

شمس النهار يقول...

* سواح في ملك الله

هو اصلا في شارم واملاكه في مصر متحفظ عليها ومش هيقدر يبعها
والاموال اللي بره اتحفظ عليها من ساعة امشاء التنحي وده اتضح انه اجراء بتعمله البنوك احترازي
ان شاء الله الفلوس هترجع هترجع

سواح في ملك اللــــــــــــــــــه- يقول...

اصدرت فرنسا قرارابالتحفظ علي اموال المصريين
المسئولين وتقول السلطات الفرنسيةلم ياتهاطلبا
للتحفظ علي اموال الرئيس
ثانيا
محاكمةالعادلي علنيا ورغم كل جرائمه
يكفيه جريمة واحدة فقط لادانته والتهمةواضحة
اطلاق النار علي متظاهرين
وانسحاب الشرطة من الشارع
وهاتان الجريمتان يكفيان لاعدامه
وهم واضحتان وضوح الشمس ولاتحتاج
لمستندات للادانة

باحث عن حب يقول...

احلى وصف
سرقوا الثوره
ربنا يرضى عنك
يا شمس
هستأذنك
هسرق منك
صوره

الازهرى يقول...

للأسف الوضع داخل على مرحلة الفوضى اللى بتلى الثورات عادة
بس دى بتنتهى إما بضياع الثورة
أو يتعاملالعقلاء مع الأمر ويحافظوا على مكاسبها وكلا المثالين فى التاريخ

غير معرف يقول...

مفهوم الثوره في العموم التغيير الفوري والمطلق

يحاولون تغيير ذلك

فمن المنطقي ان يحدث تمرد

Unknown يقول...

السلام عليكم

معك في أن هذه الاعتصامات تزيد العبء على الجيش في الوقت الراهن، لكنها طبيعية (في معظمها) نتيجة لفوضى الحرية وانفجار المكبوتين التي نتجت عن الثورة وزوال الظلم والخوف عن كاهل أولئك المعتصمين في كافة المناحي..

أعتقد أن منهم من خرج بصدق وبحسن نية (دون اعتبار لمدى صحة التوقيت) طكعا في استغلال الموقف الحالي لنيل حقوق مسلوبة منذ زمن بعيد.. لكن أعتقد أيضا أن هناك من استغل هذا الأمر لإثارة حالة من البلبلة التي تعطي انطباعا بأن الثورة خلفت فوضى وعدم استقرار...

والحل في رأيي بالنقاش السريع مع كل فئة للتفريق بين ذوي المطالب الطبيعية (ووعدهم بحلها وفق خطة زمنية واضحة وملزمة) وبين ذوي المطالب غير المنطقية (وإيقافهم بحسم خاصة أنهم سيكونون قلة، فليس هناك عامل حقيقي يحافظ على لقمة عيشه سيستمر في عمل مأجور!!)..

تحياتي أخي الكريمة على الطرح المهم.

لــــ زهــــــراء ــــولا يقول...

شمس الشموس

انا قربت اتجنن هلى كل الناس عندها مشاكل طيب نصبر لان خلاص بدان فى فتح ملفات الفساد لكن كل واحد عاوز مشاكله تتحل فى التو واللحظه والثانيه ولما قعدت افكر شويه قولت اكيد ان الحكايه دى لها هدف ومنظمه ..

نفسى اتكلم مع الناس اللى بيعملوا مظاهرات فئويه واقولهم ممكن نصبر شويع ويعدين نعمل مظاهرات كل واحد يطالب بحقه بس نصبر شويه يا جماعه والله خايفه على مصر اوى
ربنا يستر


زهـــــراء

♥نبع الغرام♥♪≈ يقول...

بجد الله يكون فى عون الجيش

انا كمان مقهوره بجد

خلى الناس تشوف مصالحها بقا
بجد
حرااااااااااااااااااااااااااااااام

شمس النهار يقول...

* سواح في ملك الله

اعتقد ان جاري عمل الكلام ده
بس المشكله هي الصمت
ماحدش عايز يصرح باللي بيحصل

لسه معتبرنا قاصر ومش هنستوعب
واضح انهم همه اللي لسه مااستوعبوش
ان المصري فاهم كل حاجه

شمس النهار يقول...

* محمود(باحث عن حب)

:))

انهي صورة يامحمود اسرق اللي انت عايزة
مدونتك وبيتك ومطرحك

شمس النهار يقول...

* الازهرى

ان شاء الله خير ياازهري

ان شاء الله هنزور الجرحي واسر الشهداء يوم السبت
بالقصر العيني هتعرف تيجي

شمس النهار يقول...

* مصري جدا

يتمردوا حضرتك
بس بالمعقول

علشان بواقي او مش بواقي كل الحزب الوطني والمخربين لسه موجودين
وعايزين يثبتوا فشلنا

شفت حضرتك انس الفقي ومحمود سعد وتدني الحوار

شمس النهار يقول...

* ماجد القاضي

الكلمه الخطيره في تعليقك هي المناااااااقشااااات
والحوار ياريت نتحاور

علشان ملاحظه دلوقتي دكتاااااتوريه في الجو
قايمه سودا عدم تقبل الاخر
مع ان المفروض مانفرض راي علي حد كل واحد حر
اللي بيحب مبارك ماشي اهلا وسهلا
مانشتموش بقا ونقول عليه خاين
كل واحد حر يعتنق اللي عايزة ويقول اللي هو عايز

شمس النهار يقول...

* لـــولا وزهـــراء

كلامك جميل
خاليكي داعيه في موقعك
اي حد تعرفيه منهم اتكلمي معاه
وخليه داعيه في موقعه
كنا الاول بنقول كلامي مش بيتسمع
دلوقتي خلااااص
كل كلمة بتتسمع
حتي حبايبي الحلوين المنورين في البلوجر برضوا بيسمعوا
بس نفسي اعرف التقارير اللي بيكتبوها دلوقتي بتروح فين
:))

شمس النهار يقول...

* نبع الغرام

ان شاء الله خير

وربنا يهدي المصريين اللي طلعوا دول

يارب احمي مصر

باحث عن حب يقول...

تعالوا نحب صح
هحطها فى مدونتى
وشكرا ليكى

شمس النهار يقول...

* محمود(باحث عن حب)

الشكر لله

دي صورة اللي كانت مصمماها مدونة لطيفه اسمها موني الشريف وهي حاليا مش عارفه ليه قافله المدونة

الاحلام يقول...

كل انسان كان قد شعر بالظلم فى السنوات الماضيه احس ان هذا هو الوقت الذى سوف يرفع عنه الظلم فالكل تنفس الصعداء والكل عنده امل فى رفع الظلم عنه ولاكن كل انسان يعبر عن الحريه من وحى تفكيره هو ولا ينظر الى المصلحه العامه مع اننى اتعاطف مع هؤلاء الا اننى اجد انه لا الوقت ولا الزمن هذا الذى يجب فيه حدوث هذا لان هذا الوقت من المفترض انه وقت الاستقرار
تقبلى تحياتى الاحــــــــــــــــلام

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

shoshta_ joker يقول...

السلام عليكم....

ياررررررررب ياشموسة الناس دى تفوق بقى وتخلى عندها دم والفوضى دى تتلم ونعرف نبنى البلد دى زى ما بنحلم بيها


امييييييييييين يارررررررررررب

دومتى بخير
فى رعاية الله...
shemo

sony2000 يقول...

بصي
لاذم بجد حد يتكلم معاهم لان غصب عنهم
بقالهم 50 سنه ساكتين
وبيفوروا دلوقتي
لاذم نتكلم معاهم وبهدوء علشان نشوف هيعملوا ايه وهنعمل ايه
بس بأذن الله كل حاجه هتكون كويسه
متفائله بأذن الله

الازهرى يقول...

انا معاكم بإذن الله
بس حددوا ميعاد ومكان العملية

ورتبوا مع الجناح العسكرى

شمس النهار يقول...

* الاحلام
اوافقك القول

وان شاء الله هكتب بوست عن اللي حصل في النقابه عندنا
وهشرح معاه ايه اللي ازعجني وخوفني

ولازم نعرف ان الحزب الوطني لم يحل وناسه ماليه الدنيا ومش هيستسلموا

الشعب سحب السجاده من تحت رجليهم
تفتكر هيسكتوا
لازم نخللي بالنا

شمس النهار يقول...

* غير معرف

عجبني اوي انها حقا عائله محترمه

شمس النهار يقول...

*shemo_ joker

بجد انا منزعجه جدا
وخصوصا بعد اللي حصل امس في النقابه

واللي ان شاء الله هكتب عنه بوست
بس لما اهدي واستوعب
اللي حصل
علشان اللي حصل ده جزء من اللي بيحصل في مصر

شمس النهار يقول...

* sony2000

المشكله يا سوني انهم مش بيسمعوا غير نفسهم

ولما اكتب اللي حصل في النقابه امبارح هتعرف انا خايفه ليه والعقليات دي بتتصرف ازاي

شمس النهار يقول...

* الازهرى

:))
المكان القصر العيني الفرنساوي
من ناحية النيل

والساعه من 12 الي واحدةان شاء الله