شمس النهار: ونبي ماتمشي+تحديثات+تحديث جديد علي الصبح كده+تحديث علي المسا

الجمعة، 4 فبراير 2011

ونبي ماتمشي+تحديثات+تحديث جديد علي الصبح كده+تحديث علي المسا

الشباب اللي في ميدان التحرير ناس زي الورد والفل وبصراحة خسارة فينا واطالبهم بأن يسبهم مننا((اي يفكهم مننا ويحلقولنا ))ويطلبوا اللجوء السياسي من شعب تونس
وشكرا
======
نوارة نجم تحييكم وترد علي الخاييفين علي مصرمن ميدان التحرير
********
عايزة ابعت تحيه كبيرة لشعب تونس اللي صمد شهر ايد واحدة
وماخفش بالرغم ان السياحه عنده اتضربت وهي المصدر الرئيسي في الدخل القومي
وماعندهمش الخير اللي في مصر اللي بيتنهب علي مدار عقود طويله وماخلص
ونبي ماتمشي
علشان احنا هبل وبنصدق ان شهر ربيع شهر حرااااااااااام وحرام فيه القتال وده علي اساس ان المتظاهرين الكخه مقاتلين وان البلطجيه ياحرام مسالمي
ياريت يامصريين ترجعوا لجوجل تعرفوا الاشهر الحرم ومعناها قبل ماتدخلوا تتخنقوا علي الفيس
ونبي ماتمشي
علشان احنا شعب نستاهل كل اللي بيجري فينا
ونبي ماتمشي
علشان انا ضعفت اوي قصاد الخطاب اللي طلعت قلته
واول مره اعرف ان السادة الدكاتره النفسيين بيعرفوا يكتبوا خطب تؤثر في الناس اوي كده
ونبي ماتمشي
علشان رئيس الوزراء كان بيقول ماحدش هيعمل لهم حاجه وكانوا بيضربوا
ونبي ماتمشي
علشان الكبتن وزير العدل قال بمنتهي العنجهيه للبي بي سي انه ماعندوش قضاه ينزلوا مظاهرات(اصلهم المدام)
وبعدها بخمس دقائق كلموا (البي بي سي)المستشار مكي رئيس محكمة النقض جوه الميدان ومعه بعض القضاه
ونبي ما تمشي
علشان النايب بتاعك قال انه اتكلم مع الشباب المعتصمين وهو ماتكلمش
ونبي ماتمشي
علشان وزير اعلامك الكداب قال علي كل القنوات المصريه الصديقه
ان الشباب استسلم(تقولش في حرب)وخلاص هيعملو حزب وندموا علي مافعلوا
والنهادره الناس كلها في ميدان التحرير
ونبي ماتمشي
علشان عمالين يخوفونا بالاخوان المسلمين تقولش صهاينه والا ديانه اخري ولا هيحكومونا غصب عنا
ونبي ماتمشي
علشان النايب والجرايد والاعلام
الحكومي الصديق
طلع علينا وقال ان اللي حرر المساجين (سجون مصرررررررر)في اكتر من سجن في مصر في اكتر من محافظة هم ميلشيات من حماس وحزب الله
الله الله
يعني كمان جايب لنا نائب كان رئيس جهاز مخابرات فاشل
يانور النبي لا كده ونبييييييييي ماتمشي
ونبي ماتمشي
علشان ده ورث فينا بنحب خنقنا
ونبي ماتمشي
علشان اكتشفت ان الشرطه والامن المركزي اكتر من الشعب
ونبي ماتمشي
علشان احنا هاااااشين اووووي لما غزة تضرب نجري ونكتب تدوينات ونعيط ونتهم اللي مابيكتبش وينوح انه خاين وبيحب اسرائيل والاقي الستات والرجاله والشباب عايزين يجروا يروحوا يقعدوا معاهم واحنا مش عارفين نصمد لنا يومين
تحيه لأهل غزة اللي بيتسحلوا بقلهم 50 سنة ولسه صامدين
ونبي ماتمشي
علشان من غيرك هنضيع
مع ان جمال عبد الناصر الاسد المرعب بجد مش نفخ اعلامي راح يوصل الناس المطار رجع مات وكانت مصر في ايام سوده نكسه وغلب وقرف
والحمد لله مصر لااتخربت ولاوقعت وكان في اخوان مسلمين برضوا
ونبي ما تمشي
علشان من غيرك هنضيع مع ان انور السادااااااااااااااااااات طلع من بيته يحتفل
استشهد مات وبرضوا كانت البلد لسه بتفاوض في باقي سينا ومشاكل
وبرضوا مصر ماضعتش
ونبي ماتمشي
علشان الملك فاروق لما قامت الثورة والحرس الملكي واللي مايعرفش يعني ايه الحرس الملكي ياريت يدخل علي جوجل ويعرف
الحرس الملكي قال له نضرب
قال لا ولا نقطة دم واحدة وسلم السلطه في سلاسه
وخرج من مصر معزز مكرم ولم يسمحوا له بالبقاء في مصر
ولم تسقط مصر
ونبي ما تمشي
علشان وحشنا السيمون فيميه
ونبي ماتمشي
علشان هايبر وكارفور وسيتي ستارز قفلوا ومش بنعمل شوبنج
ونبي ماتمشي
علشان طوابير العيش اللي مزعله الناس مع ان سبحان الله طوابير العيش دي بنوح ونصوت عليها بقالنا من يوم الكابتن مصيلحي مانورنا وناس كتير ماتت
لكن دول الغلابه اللي بيدوروا علي الرغيف ابو قروش قليله هيكلوه حاف
لكن اللي زعلان دلوقتي من طوابير العيش الناس الهاي اللي بتشتري الرغيف ابو نص جنيه وبتبعت البواب يشتريه
ونبي ماتمشي
علشان الناس ابتدت تجوع ومافيش اكل ونسينا ان تلتين الشعب اصلا بيناموا من غير اكل
ونبي ماتمشي
علشان الثوار الكخه عكننوا علينا ومااتفسحناش وفسحنا العيال في الاجازة
ونبي ما تمشي
علشان بعض المدرسين الشرفاااااااااااء اوي اللي ان شاء الله هيولعوا
عداد الدروس توقف وسيل الفلوس اللي بتدخل جيبه نشف
ونبي ماتمشي
علشان خوفونا وطلقوا علينا بلطجيه وقطاع طرق
ونبي ما تمشي
علشان في مصر ام الدنيا لسه المصري بياخد فلوس علشان يقتل اخوه
ونبي ما تمشي
علشان احنا تافهين وبلا راي ومبادئ وخرعين وبنغير جلدنا اسرع من الحيه
ونبي ما تمشي
علشان نجحوا حاشيتك ان بعد ماالشعب رجع ايد واحده عرفتوا تضربوهم في بعض
ونبي ما تمشي
علشان انت كويس واحنا مانستهلكشك
وانت حلال فينا
يعيش حسني مبارك
وسمعني سلام خليك هنا خليك وبلاش تفارق
وكل ماهفتكر حاجه هدخل اكتبها
حزييييييييييينه

اسلمي يامصر
ولا حول ولا قوة الا بالله

هناك 28 تعليقًا:

باحث عن حب يقول...: احترت
والله يا شمس; 4 فبراير 2011 في 2:07 م
شمس النهار يقول...: ماتحترش يامحمود

علشان هو ده المطلوب ان الشباب والشعب يحتار

دور علي الاسامي اللي هناك في ميدان التحرير

من كبار حكماء البلد

من كل الطوائف والمفكرين والاعلاميين
مالاحظتش ان كتير من اللي بيقروا نشرت الاخبار اتغيروا علشان رفضوا يطلعوا يقروا يقروا اخبار كاذبه ويتسحلوا بعد كده ويتزبلوا من الشعب زي بتوع 67 ومراكز القوي
اقرا التاريخ يامحمود; 4 فبراير 2011 في 3:01 م
باحث عن حب يقول...: شمس اختنا والله انا بجد
معاكى فى كلامك
بس عاوز استقرار
حرام اللى ماتوا ومشافوش دنيا دول
حرام اللى راسه اتفتحت علشان شويه بلطجيه
حرام
اننا نتخانق حرام الدم ده
كله
عندك حق
بس متربصين بمصرنا من كل الجهات
كله متربص بمصر
رغم اللى بيحصل فى الاردن والجزائر واليمن من ثورات والناس كلها غير مهتمين غير بمصر
العالم بياكل عيش على قفانا
بجد يا اختنا شمس انا تعبت واتخنقت
كلمه لآ محدش هيخاف يقولها تانى
بس من غير دم ولا ارهاب
وكمان لو مفيش انتقال سلمى هتكون مهزله اقباط المهجر ومايكل منير والناس دول عاوزينها مسيحيه علمانيه عاوزين يدوووسوا علينا
بجد بجد مش لاقى كلام
اسف
متلغبط; 4 فبراير 2011 في 3:34 م
شمس النهار يقول...: * محمود(باحث عن حب)

عاوز استقرار يامحمود زهقت خلاص نفسيتك تعبت يابني من عشر ايام
نجحوا ابواق الاعلام المصري يرهبوك
ماتقولش علي اللي ماتوا حرام دول شهداء عند ربهم يرزقون
وطول عمر مصر متربص بها واستعجب للي بيقول ده لملايين في الشارع من عشر ايام ومابيقولش ده لشخص واحد بس
وايوه لازم الدنيا كلها توقف كل برامجها علشان تذيع ما يحدث في مصر
انت ماحضرتش ايام الحرب والسلام
النهارده اليمن والبحرين وسوريا والجزائر وكل الدول العربيه بتعمل ده
علشان مصر نجحت ماعملوش ده بعد تونس
ياريت تقرا التحديث عندي هنا
واللي بيرهبك ويقول لك عايزنها مسيحيه المسيحيين كمان بيرهبوهم وبيقولوا لهم هتبقا ايران وهتتسحلوا
لما الامن ضرب خرطوم الماء شديد الاندفاع في المصليين اللي حماهم المسحيين
وجوز بنتي عيان لحد دلوقتي من ضغط الخرطوم ومن دور برد شديد جدااا ومع كده نزل تاني
ماتخفش يامحمود همه عايزين يهزوا الشباب بعد ماصحي وصحصحلهم
وهعيدها تاني خلاص انا فعلا مش عيزاه يمشي ورحمة ابويا مش عايزاه يمشي
هو حلال فينا; 4 فبراير 2011 في 4:31 م
إيمان هلال يقول...: انا مت على نفسى من الضحك لم طلع الخبر بتاع ربيع قول دا ، بس نقول ايه
سيبك من تونس وبصى على فلسطين اللى كانوا تحت الحصار شهور وعمرهم ما قالوا زهقنا ولا تعبنا ، واحنا اللى لسه كل حاجه تحت ايدينا عملنا زى الستات الزنانه وقعدنا نندب حظنا وربنا انحنا شعب يستاهل اللى يحصل له; 4 فبراير 2011 في 5:43 م
mrmr يقول...: هانت يا شموسه
ربنا يكمل ما بدأوه فيه شبابنا
يارب حافظ على مصر وشعبها
امين; 4 فبراير 2011 في 8:02 م
شمس النهار يقول...: اعقل مجنونه

ان شاء الله هتعدي علي خير

واضح ان في كتير مش قادرين يصمدوا

لك الله يامصر; 4 فبراير 2011 في 8:46 م
شمس النهار يقول...: * mrmr

آمين

طمنيني علي الثانويه العامه عندك

يارب خير; 4 فبراير 2011 في 8:47 م
Haytham Alsayes يقول...: لا ميمشيش
انا بؤيد مبارك
نعم لمبارك
كفاية انهم مظبطين البلطجية اللي في ميدان التحرير وبيدوهم 100 دولار ووجبة كنتاكي كل يوم
نعم لمبارك
انا رايح الميدان من بكرة
انا عاوز اكون مستقبلي في عهد بابا حسني; 4 فبراير 2011 في 9:39 م
Sweet Violet يقول...: ياشموسة انتي بتتكلمي فى روح الشعب المصري بتاع زمان
اما دلوقتي روح الشعب المصري "يلا نفسي" لما تكلمي كذا واحد عن الناس اللى ماتت يقولك هما راحوا بمزاجهم يستاهلوا !!
يبقى فعلا الناس دي تستاهل حكم مبارك; 4 فبراير 2011 في 9:41 م
Kiara يقول...: ياماما

انا تنحت لما قريت خبر ربيع دا

وكله كوم وكلام ان في جيش منين جاي شويه من امريكا وشويه اسرائيل

حاجه تخنق

ولما نقول في جرحي محتاجين دم يجي واحد يقول دول بيبعوا الدم

ولما نقول انه عمل وعمل

الاقي الرد بمنتهي التلقائية كنا عايشين في امان

اي امان والواحد بيمشي خايف انه يتقبض عليه بحجة قانون الطوارئ

مش جاب له سيرة خالص

وهو كل اللي اعتقلوا

طب تخيلي ان في مصريين بيقولو

تنزل الطيرات عليهم من كل مكان وتقتل 10 من هنا و10 من هنا والباقي هيجرو ويخافو

لكي الله يابلدى

بس بردو فخورة اني مصرية وفخورة بالشباب اللي نزلت واللي حرست واللي نضفت واللي ساعدت واللي قالت للظلم لا; 4 فبراير 2011 في 10:07 م
باحث عن حب يقول...: شمس يا ريت يكون صدرك رحب معلش ممكن تسمعينى
الف سلامه على جوز بنتك
بس ممكن تسمعينى
بصى انا والله لم ارهب ولم اخاف بس نفسى فى الاستقرار
سؤال هما بيمثلوا كل الشعب ولا نفسهم بس عاوز اقول احنا صبرنا كل ده وفى اصلاحات يبقى ما لايدرك كله لا يترك كله
حاسس بالفرج انا والله متابع كل القنوات الا خباريه بس
انتى عندك حق والله عندك حق
بس نوصل لحل وسط
مش عاوز حد يلعب على ارض مصر من مخابرات اجنبيه
ومصر تلوقتى ارض خصبه لكده اختى
تعرفى انا تلوقتى لا اثق فى حد
حصل عندى انعدام ثقه باللى حواليا
انعدام وزن محدش صادق اللى هجوا على المتظاهرين دول فى اللى بيقول انهم رجال جمال مبارك واحمد شفيق وفى اللى بيقول ان الداخليه ملهاش يد
بجد متخبط
اسف للاطاله
بس يارب
احمى مصرنا
الغاليه
يارب
حاجه اخيره وسؤال اخير
اعلانات التليفزيون المصرى بتاعه الدخليه اللى بتقول فيها اطمن
والجهاز الكبير ده اللى اسمه امن الدوله والشرطه والمخابرات كله وهم
واللى بيقولوا ان الجهاز المخابرتى من اكبر الاجهزه مش عارفين يحلو الالغاز دى
يااااااااااااااااااه
كنا عايشين فى وهم كبير
كبير
كبير قوى; 4 فبراير 2011 في 10:11 م
Haytham Alsayes يقول...: ممكن ياشمس ارد علي محمود بكلمة واحدة بس
اقرأ قصة سيدنا موسي كويس
استقرار ايه يابني اللي بتتكلم عنه
دي دايما سياسة فرعون
ما أريكم إلا ما أرى وماأهديكم إلا سبيل الرشاد
وبعدين اللي عاوز الحرية يستحمل شوية معلش
وعلي فكرة لو زعلان علي اللي ماتوا
في اللي بيموت في العبارة والقطر وبيموتوا مذلولين في اقسام الشرطة وانا مش هاقولك اكيد انت عارف
الله يكرمكم بلاش شغل الفضائية المصرية والقناة الاولي
ومش هاقولك اتفرج علي الجزيرة اتفرج ياعم علي البي بي سي عربي اهي محايدة
هو من امتي ياجدعان حد بيثق في الاعلام المصري
انتوا شعب نساى فعلا; 4 فبراير 2011 في 10:25 م
لــــ زهــــــراء ــــولا يقول...: شموسة لو علقت هتزعلي مني بس هعلق ومتزعليش مني

مصر اولاً
لا للتخريب
نعم للشرعية
لا للفوضى
لا لهدم رموزنا
لا للتدخلات الخارجية

مصر الاول ياشمس ... كل نظام له سلبياتة وهفواته الاهم نلحق مصر اكيد بتقرأي الاخبار
ايران وخطبة الخميئي
تصريحات اوباما
تصريحات هنري كلينتون
تداعيات الوضع في اسرائيل
جيشنا بيحمينا جوا والمفروض يكون بره بيدافع عنا
انهيار الامن
مصر هشة قوي ومحتاجة رجالة يقفوا يساندوها مش يتخنقوا مع بعض ويسيبوا عوامدها تنهار
لولا; 5 فبراير 2011 في 4:13 ص
حفيدة عرابى يقول...: بدون مجاملة
أجمل تدوينه قرأتها فى الموضوع ده
تسلم الايادى :); 5 فبراير 2011 في 6:59 ص
catroz يقول...: أزال المؤلف هذا التعليق.; 5 فبراير 2011 في 8:20 ص
catroz يقول...: أزال المؤلف هذا التعليق.; 5 فبراير 2011 في 8:20 ص
catroz يقول...: ياكش تولع يا مبارك انت و اللى معاك; 5 فبراير 2011 في 8:22 ص
رحاب صالح يقول...: فعلا بجد احلي كلام قريته لغاية دلوقت
ويا ريت كان في لايك هنا وانا كنت عملت مليون لايك ولايك
بجد ولا اروع
ومش لاقية كلام بجد اقوله
تسلم الايادي
ويارب توصل مصر لبر الامان; 5 فبراير 2011 في 2:20 م
غير معرف يقول...: شمس النهار ,كم أتعبني حالكم وكتبت عدة بوستات وكان همي همكم لكن بعد الأحداث الأخيرة المحزنة والتي تحول معها عدد كبير من الناس في مصر لجهة النظام وتفاجأت بعدد كبير من المدونين الذين يساندون النظام حدث لي نوع من الإحباط وخيبة الأمل وقلت في نفسي كا قلتي تماماً لك الله يامصر ومسحت تلك البوستات ....لك الله يامصر وأنا أكتفي بالعاء الخالص لله أن ينقذ مصر من كل هذه الفوضى .
واكتشفت أن هناك كم كبير من المنافقين الذين يرغبون في زعزعة إيمان ذلك الشعب الطيب بشتى الوسائل .
صادقة أنتي ياشمس النهار في كل كلمة قلتيها وذكرت ما كنا نرغب بذكره .
لك الله يامصر ونجاك من كل الخطوب .
ثقي شمس النهار أن الفجر قريب ....صبرجميل والله المستعان
دعواتنا لكم في كل وقت أن يبدل الله حالكم للأفضل ويقذف في قلوبكم القوة والثبات والإيمان ويوحد صفوفكم وينصركم على من يتربص بكم أيًا كان ,تحياتي .; 5 فبراير 2011 في 4:35 م
Mina يقول...: أزال المؤلف هذا التعليق.; 7 فبراير 2011 في 8:29 م
Mina يقول...: أزال المؤلف هذا التعليق.; 7 فبراير 2011 في 8:30 م
Mina يقول...: أزال المؤلف هذا التعليق.; 7 فبراير 2011 في 8:30 م
Mina يقول...: أزال المؤلف هذا التعليق.; 7 فبراير 2011 في 8:31 م
Mina يقول...: واحد صاحبي قالي الانجيل بيقول من كان منكم بلا خطية فليرمه اولا بحجر
وواحد صاحبي تاني برضو قالي الرسول قال من لم يوقر كبيرنا ليس منا والراجل عنده 85 سنة ومايصحش نطرده بالشكل ده
............
تصدقوا انتوا الاتنين لولا قدسية الكلام اللي بتقولوه كنت قلت كلام قبيح
يانهار اسود
انا من يوم اللي حصل وانا تقريبا قاعد في الميدان مابرجعش الا كل كام يوم علشان انام كام ساعة وارجع تاني
النهاردة اول يوم ارجع بدري شوية ويبقي عندي وقت ادخل النت واشوف الناس بتقول ايه واتفرج ع التليفزيون واشوف الناس بتقول ايه
تصدقي بايه
انا قرفت اني خرجت ورجعت البيت
هم دول اللي الناس هناك بيموتوا علشانهم؟
ايه ياجماعة
مصر ايه اللي خربت
مصر مين اللي خربت
يااااه
ده مبارك طلع قديس وولي من اولياء الله فجأة واحنا قاعدين هناك مش عارفين حاجة
هو مش هو ده مبارك اللي قتل منا الاف في كل حتة وفي كل داهية غرقانين ومتسرطنين والقايمة طويلة مش وقت عدها دلوقتي
مش هو ده برضو ولا واحد تاني ولا الدمعتين اللي نزلهم خلوه بقي ملاك
وال 400 واحد اللي ماتوا والالاف اللي اتصابت ببلطجية مبارك (سواء بزي رسمي او من ركاب الجمال والحصنة ) هم اللي بقوا شياطين وخاربين البلد
بقوا عملا واخوان مسلمين ومندسين واصحاب اجندات
بقوا عيال صايعة وعواطلية وقالبينها جونينة ومقضينها رقص وغنا
هي دي وقفتكم معاهم وفي ضهرهم؟
هم دول اللي طلعوا يدافعوا عنكم وعن حقوقكم في حياه ادمية
كل ده راح بدمعتين من بابا مبارك؟
لو حد عايز يعرف مين الناس دي ويشوف اجنداتهم يروح يشوف
يتخلي عن سلبيته ولو ساعتين ويروح بس يشوف الناس دي كان بيجرالها ايه
يتفرج بس
ومايقلكش ماحدش هايتعرضله لان العيال السيس دول هايحموه من اول مايدخل الميدان لحد مايخرج ماحدش هايمسه من ايه جهة
ولو ماعندكش وقت اسمحولي اصدع حضراتكم شوية وانقلكم شوية مشاهد من شاهد عيان; 7 فبراير 2011 في 8:35 م
Mina يقول...: العيال السيس دول طلعوا في يوم واحد فاتحين صدورهم لقنابل غاز فاسد قتلت وصابت منهم ميات
اللي مات مخنوق من الغاز واللي مات برصاص حي واللي اتفقعت عينه برصاص مطاطي واللي جسمه بقي زي المصفاه من خروم الخرطوش في كل جسمه
ومافيش واحد فيهم اتراجع عن الخطوط الامامية ولا حتي اندس في وسط الناي علشان يبعد عن الضرب
الكل كان بيتصارع علشان يكون في اول صف علشان يحمي اللي وراه
العيال الصايعة دول دخلوا عليهم بالجمال والحصنة والقنابل والرصاص الحي والتروس اللي كان الواحد منها ممكن يقتل اربعة ولا خمسة
ووقفوا بشوية طوب يدافعوا عن موقفهم وعن قضيتهم ويدافعوا عنكم
بشوية طوب قدام سيوف وسنج وسكاكين
العيال دول كان اللي بيتعور فيهم بيروح للدكتور يخيط الجرح ويخرج يكمل مع اخواته وهو رابط الجرح
العيال دول منهم واحد دراعه اتفتح بسكينة ومارضيش يدخل للدكتور يخيطله الجرح او يربطه وقطع كم القميص وربط دراعه وقال مش هاسيب الناس الا لما نخلص اللي بنعمله وفضل واقف يدافع عن الناس لحد ما اغمي عليه ووقع
العيال دول منهم ناس جاتلهم اخبار شبه مؤكدة ان الجيش هايضربهم بلليل وهم بايتين هناك ومافكروش انهم يسيبوا الناس وقالوا لو هانموت نموت كلنا
العيال دول منهم ناس اتقالهم من ناس ساكنين قريب من الميدان لو حسيتوا بخيانة او ضرب من اي حتة تعالوا بسرعة ردوا عليهم لو الشقة تكفي الخمسين الف اللي في الميدان يبقي هانيجي كلنا لكن لو فيه واحد هايفضل برة يبقي كلنا واقفين معاه وهانموت معاه
العيال دول في قمة التحضر والرقي والاخلاق علي مدي الاختلاف الرهيب في الشرائح الموجودين وعايشين في مكان واحد لاكتر من عشر ايام
مختلف التيارات الفكرية والاجتماعية والاقتصادية وحتي الدينية
حد يقدر يصدق ان تجمع فيه ملايين (واللي معترض علي الملايين هانقول الاف) مايحصلش فيه خناقة واحدة بين اتنين
لو حد داس علي رجل حد اللي انداس علي رجله بيبتسم ويعتذر للي داس علي رجله قبل التاني مايعتذرله
العيال دول مخليين ميدان التحرير انضف مليون مرة من الايام العادية اللي كان فيه عمال البلدية شغالين بالرغم من كل التجمع ده
شباب وبنات زي الورد بيشيلوا الزبالة باديهم من الارض
العيال دول علي مختلف طبقاتهم عاملين نظام تكافل اجتماعي في منتهي التماسك والترابط لو كانت الحكومة عملته من خمس سنين بس كانوا وفروا علي نفسهم كل اللي بيحصل ده
العيال دول فيه منهم بيقعد باليومين ماياكولش اي حاجة
العيال اصحاب الاجندات دول فيه كتير منهم مايعرفش ايران فين علي الخريطة ومايعرفش عملة ايران ايه
العيال اصحاب الاجندات دول فيه كتير منهم فاكرين ان قائد حماس هو بن لادن
العيال اللي كلهم اخوان دول انا قاعد وسطهم من اول يوم (انا اسمي الاخ مينا); 7 فبراير 2011 في 8:36 م
Mina يقول...: نداااااااء لكل المصريين الشرفاء اللي انا عازرهم كلهم لانهم متعرضين لهجمة شرسة من الاعلام الحكومي
وحتي لما السياسة اتعدلت شوية بقوا بيستخدموا نظام السم في العسل
ارجوكم ارجوكم ارجوكم ماتحكموش علي ولادكم من غير ماتشوفوهم
من غير ماتسمعوهم
لو عايزين تعرفوهم روحوا شوفوهم
الناس دي بايتين في البرد القارص ده من غير حتي بطانية لمدة اكتر من 14 يوم علشانكم مش علشان وجبة كنتاكي
مش هاقولكم ماحدش هايعرض نفسه للخطر والموت علشان وجبة كنتاكي ولا علشان اجندة خارجية
انما هل يعقل حد يستحمل البرد الفظيع اللي اكيد حضراتكم حاسين بيه وانتم جوا البيوت وتحت البطاطين علشان وجبة كنتاكي ولا اي مبلغ ايا كان؟
ياجماعة عايزينكم في ضهرنا
مش عايزنكم عبء علينا زيادة
كفاية اللي الناس دي محتملاه هناك
مش هايكون عليهم كل الضغط ده وكمان ضغطكم عليهم وانتم محسسينهم انهم عملا وامريكان واسرائيليين وايرانيين
.......................

رجاء اخير
الجماعة اللي قلبوا كلهم خبراء وفقهاء دستور دلوقتي
ياريت نبطل افتاءات شوية مافيش حاجة اسمها دستور
الدستور في الشارع
اللي عاوز يشوف الدستور ينزل يشوف الشارع ويشوف عدد الناس اللي رافضين الدستور واللي عملوه
الناس هي اللي بتعمل الدساتير
الدستور مش كتاب منزل
لما يكون كل الناس بالشكل ده رافضين الدستور يبقي يتغير ويتفور كله مافيش حاجة اسمها حل دستوري وحل غير دستوري
...............
اللي شايف اللي حصل ده كفاية ولازم نرجع
اللي حصل مابيمسلش اي حاجة من طلباتنا
اللي بيقول نرجع ونراقب ولما مايعملش اللي وعد بيه نرجع ونعتصم
مش هاقولكم الا كلمة واحدة
الشباب دول لو رجعوا من غير تحقيق مطالبهم هايرجعوا مكسورين
مستحيل تقدر تلمهم تاني لان كل واحد فينا هايرجع وهو مش قادر يرفع عينه في عين اهله حتي
لاننا زي مارحنا زي مارجعنا
ماحدش يقولي قدمولنا تنازلات لان دي مش تنازلات دي شوية فتات بيحاولوا يسكتونا بيها
ماحدش يقولي ادولهم فرصة
بقالنا تلاتين سنة بندي فرص
ماحدش يقولي الحكومة الجديد
دي عاشر حكومة جديدة
هو كل يوم هايجيبلي حكومة ويقولي دي جديدة اصبر عليها لما نشوف هاتعمل ايه
اللي ماحلش في تلاتين سنة مش هايحل في 8 شهور
اللي خايف علي اهانة كرامة الرئيس
هل كرامة الرئيس ام ارواح الملايين
واي كرامة تلك التي تهان
هو الرئيس ده مش قال اول ما مسك الحكم انه مش هايمسك اكتر من مدة واحدة
ادينا بنطالبه بانه يحقق وعده وانه يمشي اظن سيبناه كتير قوي
الناس اللي صدقوا الدمعتين
ماتراجعوا خطابات الريس في التلاتين سنة اللي فاتوا
حد فيكم يفتكر حاجة اتنفذت من اللي قالها؟
ماكل مرة يقول دي اخر دورة
حد فيكم يآمن شخص مجرم زي ده علي نفسه يوم واحد بعد كدة
حد فيكم يآمن شخص مجرم زي ده علي الشباب اللي زي الفل اللي في التحرير انهم يرجعوا بيوتهم لو فكروا يفضوا ثورتهم دي؟
حد فيكم يضمنلهم ده؟
اللي يطلع ويقول انا اضمن ده برقبتي وبنفسي ان الريس ينفذ كل اللي قاله انا هارد عليه واقوله وانا اضمنلك برقبتي وبنفسي ان الناس اللي في التحرير دول كلهم هايروحوا دلوقي حالا
.......................; 7 فبراير 2011 في 8:36 م
Mina يقول...: اللي شايف ان البلد وقف حالها والبلد خربت
مين اللي خرب البلد؟
من تلاتين سنة والبلد بتتخرب وبتتنهم وبتتسرق
ماحسناش ان البلد بتخرب الا دلوقتي؟
الناس اللي صعبان عليهم الناس اللي شغالين باليومية
هو الناس اللي شغالين باليومية ظهروا فجأة
ماهم موجودين وسطنا طول عمرنا
اشمعني دلوقتي حسيتوا بيهم
اشمعني دلوقتي بتدافعوا عنهم
ما طول عمر اللي شغال باليومية ممكن يتعب ويقعد شهر في بيتهم
عمرك سألت عن حد منهم تعبان وصعب عليك ورحت ساعدته لانه ماعندوش دخل طول ماهو تعبان؟
ومش هاقول كلام مكرر ناس كتير قالته باننا قاعدين في ميدان التحرير وبس يعني باقي البلد ليه واقفة
ماتشغلوها
...........................
الام الغالية شمس النهار
اسف للاطالة واسف اكتر للانفعال
بس الكلام كتير والمشاعر اكتر
واللي قلته ولا يعبر عن واحد علي عشرة من اللي جوايا; 7 فبراير 2011 في 8:36 م