السبت، 26 فبراير 2011

ثورة كاش فوري+تحديث

بالنسبه لكلام القوات المسلحة اللي هو:
(اللي فضيناهم ما كانوش متظاهرين، دول كانوا متواجدين بعد حظر التجول وعادة مافيش تظاهرات بعد حظر التجول، وقالوا قبضنا على 27 واحد طلع منهم تمانية بلطجية، وكان فيه ناس بتحدف ازايز فارغة على الجيش، واحنا بنأسف اذا كان سباب حد من شباب الثورة اتأذى بس كان فيه بلطجية مندسين وسطهم)
بالنسبه للنص الاحمر الغريب
بس معلش كله منك حلو ياجيشنا
بس يعني يوم الخميس احنا فضلنا للساعه واحده ونص بالليل
في ميدان رابع العدوية امام مسجد رابعه العدويه
في حملة تجهيز قافلة مساعدات لليبيا
والجيش كان واقف حوالينا ماحدش قال حاجه بالعكس كانوا مبسوطين من الشباب وهو بيسلم بعضه الكراتين علشان يرصها في الكونتينر
وبالنسبه لباقي الكلام
ماحدش من الشعب كله يرضيه ان شاب يرمي زجاجه او طوبه علي الجيش
ووارد طبعا ان يندس شباب بلطجية من بتوع الحزب الوطني
وسط المتظاهرين
لكن متظاهر مصري حر يزعل الجيش
مااعتقدش
وحصل خير
===================================
نداء ورجاء وطلب لقواتنا المسلحة الجميلة

الشعب يريد ثورة
كاااااااااااااش فوووووري مش قسط

مش علشان مش واثقين فيكم
حاشا وكلااااااااا
جيشنا الحر فوق مستوي الشبهات

لكن علشان خفافيش الظلام اللي صعبان عليها ان الثورة نجحت
وانهم اتقفل عليهم النهيبه اللي كانوا بينهبوا فيها

وكراسيهم اللي فقدوها وكشك الحراسه اللي اتشال من تحت البيت واستبدل بالزنزانه

اللعب ابتدي ياجيشنا

ياريت نلحق نقطع الازرع الرئيسيه للأخطبوط قبل مانندم وتروح دماء الشهداء والمصابين هدر

وعرفاك ياجيشنا مالكش في اللوع ولا شغل البلوتيكا لكن همه تمرسوا وتربوا علي الدسائس والمؤمرات
انت واحد +واحد =اتنين
لكن دي ناس عندها يساوي مليارات

معلش التحرك يكون بسرعه علشان نقطع عليهم خط الرجعه
والشعب يطمن
ونشوف شغلنا
(ولو ان الشعب ماشاء الله عليه ناس بتشتغل وناس بتبني وناس بتتظاهر)

ونلحقهم قبل مايولعوها فتنه
واول الغيث احداث امبارح واول امبارح

ويعني شفيق من بقيت اهلنا مايمشي هومافيش غيره
هو كويس علي عيني وراسي
بس هو لسه بيفكر بالطريقه القديمه
اوقف البرنامج وهو يعني البرنامج مش علي اليوتيوب من يومها
ده كده اللي ماتفرجش اتفرج
شكرا شفيق بصراحه اللي كان مش مؤمن بنزول التحرير الان بعد الحركة دي هينزل
وماتخافش ياجيشنا
دي مصر فيها ८० مليون وزير ومحافظ
مانشيل امن الدولة ايه اللي هيحصل
كل واحد في مكانه عارف فين الفساد

انا عارفه انك خايف وعايز تخلص وتسلمها مدنيه مش عايز تكرر اللي حصل في ५२
بس الشعب هو اللي بيقولك خليك معانا شويه
ماهو مش هينفع نعمل انتخابات دلوقتي المجالس هتبقا يااخوان يا حزب وطني

ومش معترضه علي الاخوان بس مش بعد ده كله المجالس برضوا مايبقاش فيها الناس كلها مش كتله ولا كتلتين
والا القرارات هتبقا عوجه ومايله علي جنب

ودي مطالب الثورة اللي من اول يوم بنقولها
-حل حكومة شفيق(اللي اصلا حلفت اليمين لمبارك)وتشكيل حكومة انقاذ وطني من الكفائات(ومااكثرهم)
-الغاء جهاز امن الدولة(اللي قاعد في كل حته حتي النت)
-محاسبة رموز الفساد بداية من مبارك الي امن التليفزيون
-الافراج الفوري علي المعتقلين السياسيين قبل وبعد २५ يناير
-محاسبة خاصه وعااااااااجلة للمسؤلين عن مجازر الثورة واللي اصلا معروفين وبيستهبلوا
-اطلاق حرية تكوين الاحزاب
-الغاء قانون الطوارئ ولو ان دي فيها كلام علشان اجرائات القبض علي الفاسدين يتم بسرعه بس يعني له درجات
-حل الحزب الوطني سريعااااااااااااا صحيح همه هيغروا اسمهم وبيعملوا الحزب من جديد بس علي الاقل مايبقاش موجود
هي دي الطلبات اللي علشانها استشهد كثير
وناس اترفدت من شغلها كتير
وخسرنا اقتصاديا والي اخر الخسائر
يبقا بعد ده كله ماتتعملش
ونلوم الشباب انه نزل التحرير تاني
الشعب ماعدش ينفع يضحك عليه لامن حكومة ولا من اي حد ولا حتي من خفافيش الظلام مش هيعرفوا
عايزين سرعه مش علشان حاجه اكتر من اننا عايزيين نخلص
ونفوق لحاجات تانيه

عارفه ان الضغط كتير ان النائب العام مسحولين علشان الفساد اكتر واكبر كتير من اي تصور
بس سرعة البتر مطلوبه

هناك 31 تعليقًا:

ذو النون المصري يقول...

ربنا يهدي الاحوال و تنتهي الثورة علي خير
او علي الاقل الجزء الاول من الثورة لاننا لابد ان نقوم باكثر من ثورة
لاحداث التنمية و تطوير البلاد
كي تصبح مثلما نتمني

Unknown يقول...

السلام عليكم

مؤيدك تماما..
وقد تجدي في بوستي الأخير رأي يكمل رايك..

أنت تكلمتِ مع الجيش..
وأنا تكلمت مع الثوار..

والكلامين يصبوا في صالح الثورة..

دمتِ سالمة أختي الكريمة.

واحد من الناس يقول...

صح

ثوره كاش فوري

ثوره كامله مكمله

مش ثوره إلا ربع

لــــ زهــــــراء ــــولا يقول...

نداء ورجاء وطلب لقواتنا المسلحة الجميلة

الشعب يريد ثورة
كاااااااااااااش فوووووري مش قسط

" ياست الكل تعرفي ان تجميد ارصدة اسرة الرئيس السابق في بنوك سويسرا هيبقى مصيرها ايه؟ 50% منها هتتصادر لسويسرا دا قانون عندهم وابقي قابليني لو عرفنا ناخد النص التاني كاش ايه بس

تعرفي ليبيا عندها ايه؟ بترول وبحر وغنيية ومعمر واكلها في كرشة احنا بقى عندنا
بحرين ونيل وقناة وبترول وتلت اثار العالم وفقراااااااااااااا.
محتاجين نتايج الثورة فوري بس لازم منخدش النتايج مرة واحدة لازم نحقق الانجازات خطوة خطوة مش مصباح علاء الدين هو ندعكه فيطلع الجني :d "
لولا

VÖltaa يقول...

احنا اتخانقنا مع الشرطة العسكرية فى التحرير عشان بيتنططو علينا وبعد مامشينا بساعتين حصل الضرب

بقالنا شهر ويحصل فينا كده

انا تعبت
و زعلان من الجيش

sony2000 يقول...

مهو فعلا كل حد قلان دلوقتي
وفي ناس مش عرفه تعمل حاجه
فالخير كلو بأذن الله جي بأتحادنا
وبفهم اللي عوذين يوقعوا مبنا وبين الكل
اللهم رد كيدهم في نحورهم ونعوذ بك من شرورهم

إيمان هلال يقول...

والله يا شموسه أنا حبه كمان وهشك فى نفسى ، انا شخصياً الحكومه جابتلى والحمد لله غباء .... ربنا يستر بجد

ويرحمنا من التصوير البطئ اللى شغلين بيه

Haytham Alsayes يقول...

الجيش بطىء للاسف
وحكاية الثقة اكيد في ثقة
لكن السرعة واجبة مع هؤلاء لانهم يمتلكون خبث السنين
يارب استر


تحياتي

حلم بيعافر يقول...

وكاننا فى عهد حسنى مبارك بالظبط

الاحلام يقول...

تحيه لكل من ساهم فى تسهيل المعونات لاخواننا فى ليبيا تحيه لكل شاب وفتاه عاشوا هذه اللحظات التى ستكتب على جبين كل مصرى
كم انا سعيد وانا اقراء هذه الكلمات وكم انا متلهف لعمليه البتر السريع كى نرى نتيجه الثوره وايجابيتها
تقبلى تحياتى الاحـــــــــــلام

prince4ever يقول...

سلامو عليكم يا استاذه شمس
و الله واحشني جدا متابعة حضرتك انا بس كنت بتخرج و الحمد لله قفلت الامتياز مع المرتبه و فضتلكو بقى :)
انا ليا كام كلمه معلش شكل هطول
كل المطالب دي كلنا بنأيدها بس في درجات للتأييد...كتير من المصريين متخوفين فعلا من بكره..الناس المتمسكه بحكومة شفيق مش فقط حبا ليه قدر ما هو خوف مما هو بعده...رغم ان اساسا عمر الحكومه ما كانت بتفرق مع الشعب ف حاجه ما هو زيد زي عبيد و كلهم حراميه...و انا اساسا مبدافعش عن حكومة شفيق لان فيها امثال ابو الغيط اللي فشل فكل ملف مسكه و اخرهم مصريين ليبيا اللي اخويا كان واحد منهم و كان عايش في طرابلس كمان..
كمان وجدي فاشل من البدايه...اين هي القوات اللي بيتم نشرها و كل الهرت ده..و اساسا الفوضى اللي الناس تخشاها من رحيل الحكومه موجوده فعلا و اساسا بسبب الحكومه فميش خوف من حاجه..
كل المطالب بتاعة الطوارئ و المعتقلين و غيرها ممتازه جدا ولازم تتنفذ ان شاء الله
لكن مطلب حل الحزب مش مطلب شعبي...اه حزب فاسد و سئ لكن حله مش حل المشكله نفسها...هناك اكيد ناس كفاءات و محترمين في الحزب..لكن الحزب كيان سئ و منحط انا معاكي...لكن ممكن فقط تجنيبه تماما و تنحيته عن الحكم مع الاحتفاظ بكافة حقوقه في التواجد او المشاركه مثل غيره من الاحزاب...لان زي ما حضرتك قلتي ما هو ممكن يتحل النهارده و بكره يلمو نفسهم تحت اسم جديد..يبقى عملنا ايه...تنحيته هو الحل ابعاده هو المطلب الصحيح
الجيش...نعم ليس امامنا سواه حاليا و يجب الثقه فيه..لكن ليست ثقه عمياء..والدي كان لواء جيش و هو ع المعاش و عمي عميد حالي..على حد قولهم و العهده على الراوي ان هناك في المجلش الاعلى قيادات فاسده و مرتشين دون ذكر اسماء..إذن بعض الثقه و بعض الحذر
لكن ما يخافه الشارع المصري البسيط هو الاستمرار في التعنت..هناك ثوار لا يمسعون لشئ..احدهم كان يكلمني و قال بالحرف الواحد من لم ينزل ميدان التحرير لا يحق له الكلام عن الثوره..و هو احتكار ضيع لثورة شعبيه من كافة الاطياف..انا شرقاوي و شاركت في الثوره في الزقازيق و تعرضنا لرصاص مطاطي و قنابل غاز..لكن على حد كلام هذا الشخص فأنا لم اشارك ف الثورة و انا بطه بلدي لاني لم ااخذ ختم التحرير...و ماذا عن السوايسه و الاسنكدرانيه...صدقيني ليس كل الثوار طاهرين و رائعين هناك اغبياء و متعنتين و متعصبين بشده
ثم الثورة ليست حكرا على احد..هناك ثوار و مفكرين لم ينزلوا إلى الشارع في اي وقت لظروف مرضيه او اسريه او لأي شئ اخر..لا يحق لنا تنحيتهم عن الثورة او نمن عليهم بحريه لا يستحقوها من وجهة نظر هذا الشخص
و العجيب ان هذا الشخص لم يذهب التحرير سوى يوم الخميس السابق للتنحي حيث الاوضاع اهدأ نسبيا..و يلومني رغم اني شاركت في بلدي يوم 28 يناير جمعة الغضب و المأساه..
و للاسف كما ذكرت لا تقبل للاخر في هذا البلد...حتى اني تقريبا لم اعد اناقش والدي لانهما ايضا متعنتين و تحكمهم كلمات اعلاميه و اهواء
الثقافة تعمق الفكر و تبني جسورا من الثقه بالنفس و تجعل في عقولنا الفلتر الذي نميز به الخبيث من الطيب و الصح من الغلط
اااااااااااسف جدا على الاطاله يا استاذتي و مبسوط اوي اني رجعت اتابع حضرتك من تاني
تقبلي تحياتي

راء يقول...

تمام كلام مظبوط

بدأوا يدونا اقراص مهدئة تاني وهيحاسبوا العادلي اخيرا
بس مبقاش سهل يتضحك علينا بحركتين
طول ما الفساد علني لسه

الازهرى يقول...

لا حول ولا قوة إلا بالله

ما حدث من المقنعين والشرطة العسكرية هو ما حذرت منه عادل فى التحرير بعد محادثتى مع أحد رجال القوات المسلحة وقوله لى أنهم يتوقعون شغبا من بعض عناصر النظام القديم يدعمه أمن الدولة والشرطة الفاسدةولذلك نزلوا بأعداد كبيرة لحماية المتظاهرين

الحمد لله على كل حال

الوضع بيزداد سوء وميليشيات الحزب الوطنى بتتحر ك بشراسة
وكان فى كذا محاولة فى العياط عندنا لإثارة الفتن والحمد لله وقفنا لها
ولازم كلنا نخلى بالنا

وربنا يستر الأيام اللى جاية

ابن رشد يقول...

اسلوبك جميل و ثوري بس محتاج قراية اكتر و تحليل للوقائع اكتر

mrmr يقول...

الجيش لازم يتحرك بسرعه للقضاء على البلطجيه اللى بيهددوا البلد
خلينا بقى نعيش فى امان

شمس النهار يقول...

*ذو النون المصري

مقصره في الاطلاع علي مدوناتك بس والله مافيش وقت

فعلا كلامك صح وبالفعل بيتعمل
يعني الشباب مقسم نفسه جزء بيقابل المجلس الاعلي وبينزل التحرير
وجزء شغالين علي اهل الشهداء والمصابين
وبنحاول نعمل نواة لمشاريع تنمويه

وان شاء الله ثورة الشعب المصري لن تسرق

شمس النهار يقول...

* ماجد القاضي

وعليكم السلام
بعتذر عن التقصير بس فهلا مافيش وقت ونفسي اليوم يبقا 48 ساعه

قريت بوستك الاخير واعجبني جدا
ياريت كل واحد مننا في مكانه ينشر مفهوم الثورة واللي بيحصل
علشان كبار السن اللي حضروا ثورة 52 مش مقتنعين ان دي ثورة
بيعتبروها تصحيح او تعديل

وجيل الوسط لسه مش عارف يقرر
والشباب عنده حماس ونشاط وعايز كل حاجه زي ما الثورات بتقول

تحس ان كل جزء في وادي

شمس النهار يقول...

*واحد من الناس

ثورة يعني انسف حمامك القديم

وهات من الاول
يعني نقطة واول السطر

مش تصحيح
دي ثوووووورة
بكل بديهيات الثورة

يعني بنقلب الصفحه السودة
ونجيب صفحه بيضا

شمس النهار يقول...

*واحد من الناس

ثورة يعني انسف حمامك القديم

وهات من الاول
يعني نقطة واول السطر

مش تصحيح
دي ثوووووورة
بكل بديهيات الثورة

يعني بنقلب الصفحه السودة
ونجيب صفحه بيضا

شمس النهار يقول...

* لـــولا وزهـــراء

حبيبتي انا ماتكلمتش عن الفلوس اللي بره خالص الفلوس دي ان اجلا او عاجلا هترجع ومش زي مابتقولي خالص هترجع كامله
وفي مفاوضات بتحصل انه يسد بيها ديون مصر
مافيش حاجه اسمها انهم ياخدوا نصها
ده كلام غير صحيح بالمرة

انا هنا بستخدم التعبير مجازي بشبه اللي بيحصل ان حد عمل ثورة يعني بينسف القديم ويجيب جديد
مش بيلصم ويعدل في القديم

ولو رجعتي وقريتي في تاريخ الثورات
في العالم هتلاقي انها مصباح علاء الدين في حاجات وحجات بتاخد وقتها
يعني الثورة تشيل كل رؤوس الفساد متمثله في الرئيس ووزرأه ومديري الامن
واعوانهم ومجلسي الشعب والشوري
وده بيحل كتير من المشاكل

لو بصيتي للي حصل هتلاقيه ولا نص ده
الي الان سايبين سرور والشريف وزكريا عزمي يعيسوا فسادا وينسفوا كل الاوراق اللي تدينهم

اما الباقي لما الفساد يتشال ونقدر ننمي بحريه من غير سرقه
ونعمل المشاريع الجميلة هتلاقي مصر بقت جنة

حبيبتي ثورة يعني ثورة مره واحده
مش بالتنقيط

شمس النهار يقول...

* VÖltaa

عارفة كل اللي حصل في التحرير

وماكنش ينفع تتخانقوا مع الشرطه العسكريه
ولا القوات الخاصه اللي نزلت

علشان كان في بلطجيه في وسطكم
وكمان فيران الفساد من الحزب الوطني كانوا داسين ناس بملابس جيش في وسطكم

يابني دخلت مدونتك لاقيت بوست جميل جدا
بس ماعرفتش اعلق من كم الكلمات اللي فيه ياعم في البلوجر بنات وستات
خف شويه من الكلمات دي
ولو شلتها هتلاقي بوست زي الفل
:)

وعايزة اقولك ماتزهقش وماتملش
النفس الطويل والشاطر اللي يضحكفي الاخر
ولا انت فاهم ان الفساد كان هيسلم بسهوله

شمس النهار يقول...

* sony2000

بالظبت ياسوني
لازم نبقا ايد واحده

ونلتف حول الثورة نحميها
من الفساد

وان شاء الله خير

شمس النهار يقول...

* اعقل مجنونه

هو ده اختلاف الفكر والاجيال

المجلس الاعلي علي مهله
وونبي انا جايه

ورؤوس الفساد بيجروا يمين وشمال بيبهدلوا الدنيا

والثوار معتصمين وبيتظاهروا

بس انا عندي امل

شمس النهار يقول...

* Haytham Alsayes

الجيش بطئ جداجدا ده صح

وطالع عينه ماشي
والفساد كتير والمصايب كتير
والمشاكل
وشايل الشيله
بس ده مايمنعش ان مطالب الثورة لم تتحقق حتي الان

شمس النهار يقول...

* حلم بيعافر

مش اوي يعني بس الحق يتقال وشوش كتير اتغيرت

بس لسه مطالب الثورة لم تتحقق
ودي ثورة مش تعديل ولا تبديل ولا تصحيح

شمس النهار يقول...

* الاحلام
عجبتني جدا كلمة البتر دي
هو فعلا كده الثورة بتبتر الاعضاء الفاسده من المجتمع
ولسه ده ماحصلش
وان شاء الله هيحصل

شمس النهار يقول...

* prince4ever

وعليكم السلام يادكتور ورحمة الله وبركاته

اهلا اهلا
والف مبروك وعقبال الدكتوراه
قول ان شاء الله
وبرضوا بمتياز

واهلا بيك مرة اخري في البلوجر

تعليقك قوي ومتفقه معاك في 99% منه زي الانتخابات
والمجلس الاعلي فعلا زي مابيقول والدك وعمك
وده وارد الفساد في مصر في كل مكان
مافيش مكان ماكنش فيه فساد

والثورة مش ملك حد معين دي ملك الشعب المصري
وليست شباب فقط كل الشعب كان في التحرير من كل الاعمار حتي اللي عندهم 80 سنه كانوا هناك
واللي مارحش ميدان التحرير كان واقف يحرس تحت البيت اللي كان في ميدان التحرير يعني اللي في ميدان التحرير لو ماكنش مطمن علي اهله ان في شباب ورجال بيحرسوهم بداله كان ساب ميدان التحرير وروح يحمي اهله وكانت الثورة باظت
والثورة ماكنتش ميدان التحرير بس
الثورة كانت في كل مكان في كل محافظة
وده اللي نجحها فعلا
وملاحظة ان النغمه دي اليومين دول واللي نزل بيتمنظر مع ان ده واجب وطني

ومبسوطه انك رجعت وبشكرك علي التعليق الجيد
والمدونة مدونتك علق وطول زي ماانت عايز
وعودة خير ان شاء الله

شمس النهار يقول...

* طالبة مقهورة ..درجة أولى

صدقيني ماحدش هيعرف يضحك علنا تاني خالص
والتحرير موجود

شمس النهار يقول...

* الازهرى

عارف ياازهري انا كنت الاول بقول لا مش هننزل التحرير
لحد ما مجموعه من شباب اللأتلاف قابلوا المجلس وقعدوا يقولوا لهم هنفذ كل حاجه هنعمل كل حاجه
ومافيش حاجه اتعملت خالص
وخصوصا ان الشباب كان رايح ومعاه حلول للمطالب واسماء جيده جدا بديل
بس فعلا حسيت ان في حاجه انا مع التظاهر تاني بس مش مع الاعتصام

شمس النهار يقول...

* ابن رشد

شكرا علي تعليقك

والحقيقه انا لست بمحلله سياسيه خالص

انا ست مصريه بتكلم زي اي ست مصريه
بقول شايفه ايه وحاسه بأيه وبحكي عن اللي بعمله وبشوفه
ورد فعلي الشخصي للحدث
كمواطنه عاديه
يعني بكتب بالبلدي علي سجيتي كده
من قلبي
بكتب تجاربي الشخصيه

شمس النهار يقول...

* mrmr

الجيش هيعمل ايه ولا ايه ولا ايه

انا لو من الجيش اطلقنا واجري

ده حرب اسرائي اسهل من ارضاء الشعب المصري
:))))))))
ماهو برضوا احنا مش سهلين