الأحد، 19 يونيو 2011

اخبااااااااااااار

الخبر الغريب:
قيادي سلفي (حسن ابو الاشبال):من لاينتخب مرشحا اسلاميا للرئاسة((يتحدي)) الله ورسوله
والعمل ايه بقا لو رشح نفسه اكتر من واحد يعني مثلا لحد دلوقتي تلاته اسلاميين(علي اساس ان الباقي مش مسلمين!!!)
مين منهم مع الله ومين لو مااخترناهوش هنبقا بنتحدي الله ورسولة
واااااااسعة اوي دي منك ياابو الاشبال
يارب نقضي علي الامية في مصر علشان يستطيع كل فرد في مصر ان يميز بين كل مايسمعه من اي قيادي
-------
يافرحة ماتمت
القبض علي ابو الكباتن الفارين حسين سالم
وهوووبا اتنازل عن جنسيته
وهووووووبا افرج عنه بكفاااااالة
27 مليووووووون يورو
!!!!!!!؟؟؟؟؟؟؟
بس اللي طمني شوية انه مطلوب في اسبانيا علي قضية غسيل اموال يعني فلوسه ضايعة ضايعة علي مصر وعليه
بس دي مافيا يابا
مش هيسيبوه
--------
ارتباطخبر زعلني جدااااااااااااااااااااااا
يعني ايه الشهود يغيروا اقوالهم في قضية زي دي
يعني بيشهدوا زور
يعني خايفين من الشرطة ومش خايفين من ربنا
وفين الشيوخ اللي ماليين الدنيا والفضائيات مابيجبوش الناس دي ويقولوا لهم الا وقول الزور الا وقول الزور...الا وقول الزور
مش مصدقة ان في انسان ممكن يشهد زور علشان يضيع دم انسان قتل مهما كان وصفه
همه بيقولوا ان اللي اتقتلوا امام اقسام الشرطة بلطجيه
كشفوا علي الفيش والتشبيه بتاعهم
وان دي حالة دفاع عن النفس
للدرجة دي لسه في مصريين كده
بس هقول ايه اذا كان بعد الفضايح دي لسه في ناس بتقول اسفين ياريس
----------
هو احنا كل مانقبض لهم علي جاسوس
يقولك هاتوه وخدوا تلاته مصريين
طيب بغض النظر بقا عن قلة الادب بتاعتهم وان الفرد عندهم قصاد
سبعة اة تلاتة من عندنا
المره دي يااااااااااريت يدونا كل المصريين اللي عندهم
قصاد الواد ده
وبعدين ده عامل دعاية سياحية لمصر كبيرة ومتصور في كل حته فيكي يامصر
-------
خبر غريب جدااااااااااااااااااا

اخر
مش هقول غير واحدة واحدة كل شئ هينكشفنننن
ويبااااااااااان
واقروا الاسماااااء بأمعاااان
وشوفوا اللي كانوا عاملين نفسهم ثورجيه
ومين اللي جري يعمل حوار مع عمر سليمان
والناس معتصمة في التحرير
----------

هناك 24 تعليقًا:

Ramy يقول...

الواحد مش عارف يقول ايه


الواحد قلبه وجعه

من كتر الأخبار اللى تفرح

سواح في ملك اللــــــــــــــــــه- يقول...

حسين سالم اتنازل عن الجنسية

طيب ياتري كام واحد من اللي في طرة لاند

معاهم جنسيات اخري

شمس النهار يقول...

* Ramy
ماهو مابقاش في كلام يتقال

الوضع بقا فوق الكلام

وبعد كلام عصام شرف بصراحة الواحد اطمن شوية

شمس النهار يقول...

*سواح في ملك الله

اغلبهم معاه جنسية اخري

بس مشكلتهم انهم ماصدقوش ان الشعب الرعاع دول اللي بيمصوا دمهم هيعملوا فيهم كده
فاقعدوا فااتعكشوا واللي بيتعكش خلاص
مالوش مخرج

Foxology يقول...

يا سيدتى الفاضلة ...

بالنسبة لمن يتحدث باسم الدين وكأنه خليفة الله على أرضه فلا نقول له الا : ما يلفظ من قول الا لديه رقيب عتيد .. صدق الله العظيم .. نحدثه بلغته التى ( يدّعى فهمها ) وعلى الله قصد السبيل .

بالنسبة للمدعو حسين سالم : واين أموالنا المنهوبة الأخرى ممن تم القبض عليهم داخل الوطن ؟؟؟؟ حتى امس كانت هناك أحكام بالتحفظ على الأموال !! وكأن أصحابها لم يتصرفوا فيها منذ 4 أشهر حتى الآن فى انتظار حكم القضاء ! الأستاذ فهمى هويدى كتب مقالة بنفس المعنى صباح اليوم بجريدة الشروق .

بالنسبة لتغيير الشهادة .. وماذا ننتظر من قائدى سيارات الميكروباص ؟ ثلاثة أرباعهم من البلطجية وأرباب السوابق .. الربع الباقى بين بين .. ضباط المباحث و ساكنوا الأقسام يعرفونهم جيدا فردا فردا كل فى نطاق تخصصه ومن السهولة التأثير عليهم ! ولا عزاء للشهداء !

بالنسبة للصهاينة .. الموضوع برمته فيه خلط عظيم ولا أحد يعرف الحقيقة ( كاملة ) .. وان غدا لناظره قريب .

وأخيرا وثائق أمن الدولة .. لا أصدق الدستور فى حرف مما تكتبه الا اللهم بعض مقالات لبعض الكتاب وفقط .. واذا صحت الوثيقة فلا مانع .. النظام السابق معروف بأنه قد حول كل الأحزاب لخدمة الحزب الحاكم .

رحمنا الله مما يؤلم العقول من أخبار وفضائح

تحياتى

فاتيما يقول...

الذوق مش نافع مع العالم دى
الثورة خلاص مينفعش تبقى سلمية
سلمية دى متكلش معاهم
دول عاوزين ينطخوا بالنار ف الميدان
هما واللى بيحموهم

الأحوال بقت تقرف
واحنا خلاص يا شمس
ماشيين ف سكة الثورة التانية
وبدعى ربنا تبقى ثورة عمال وفلاحين
مش ثورة الجياع اللى هيكل قال ان الطبقى المتوسطة وما فوق هيا اللى لحقتها لما خرجوا هما الاول ...

بسر رجعوا تانى قعدوا ف البويت
وسمع اغلبهم الكلام الحمضان بتاع العجلة والسياسة و الهدوء الخ الخ

والأحوال اهى
لا تسر الا العدو
وتكسر قلب الحبيب فتافيت

ربنا كبير
وما ضاقت الا فرجت

ان شاء الله

بوسات وحضونات
ومعلش التعليق متعصب ومتنرفز
بس انتى اكيد معانا ف الحالة دى
وعارفة بقى

سلامى للحفيد الجميل
ولمامته وليكى قبلهم
:))

الازهرى يقول...

مع كل الشك فى فايمة امن الدولة

انما لسه فى خبايا كتيييييييييييير

وربنا يستر

Haytham Alsayes يقول...

معلش يمكن هاسيب كل الاخبار العجيبة الغريبة وهمسك في الاولاني
الشيخ حسن ابو الاشبال لا يمثل الي نفسه
الحمد لله الاسلام مفيهوش كلام اجبارى علي حد
بمعني كل شيخ او اي حد يؤخذ منه ويرد الا رسول الله صلي الله عليه وسلم لانه كلامه وحي ينزل
وعليه
الناس اللي بتفكر التفكير دي عاوز اسألها سؤال واحد
تخيل ياحضرة الشيخ المحترم انك بتقول الكلام دة وقدامك الرسول نفسه مجرد تخيل كان ايه موقف الرسول منك
طيب حضرتك جاوبي علي الكلام دة
كان الرسول هيعمل ايه
دايما بتخيل المشهد دة في اي حاجة
بتصدر اليومين دول او قبلها خاصة من الشيوخ يعني كان هيوافق ويرضي انه يكفر حد بمجرد انه بيعمل دعاية انتخابية لحازم ابو اسماعيل
طيب انا عن نفسي مش هنتخب شيخ من الشيوخ ليس لعورة فكرية عند الشيخ ابو اسماعيل اه هو شيخ وفوق راسي كمان بس مينفعش مش سياسي مش هيديني اللي انا عاوزه من المنصب دة
نرجع تاني نقول هو مثلا عمر بن الخطاب رضي الله عنه وارضاه كان سياسي ام فقيه
علي فكرة سيدنا عمر كان حافظ عشر اجزاء بس من القران ومع ذلك انا بشوف سيدنا عمر سياسي محنك جدا اكتر منه فقيه بمعني ان الدولة في الاسلام مدنية قلبا وقالبا وعلي فكرةى العالم اللي بتقول دولة مدنية بمرجعية اسلامية بينقضوا نفسهم اذا كان يامحترم منك ليه الدولة في الاسلام مدنية
هو ليه ابو ذر الغفارى رضي الله عنه وهو عالم وفقيه ومثلا عبد الله بن مسعود وهو من هو وابن عباس وغيره وغيره مخدوش مناصب ليه ؟؟؟؟!!!
لا كل هؤلاء رضي الله عنهم كانوا فقهاء وعلماء اجلاء وفقط ولكنهم يفتقدوا للسياسة والمناصب زى عمر بن الخطاب وعمر بن عبد العزيز وعثمان بن عفان وغيره وغيره من الافاضل في الاسلام يبقي الدولة مدنية ولا لا
بمعني انها تحترم القانون وتحترم حتي اهلية المنصب والكفاءات
حسبنا الله ونعم الوكيل انا قربت اطفش من البلد دي بجد


تحياتي

دعاء مواجهات يقول...

دى بقت مهزله فعلا بس اكيد لسه فيه امل ان احنا اللى نفلتر كل دا بتفكيرنا السليم ..


تحياتى

ابراهيم رزق يقول...

من كثرة الاخبار الغريبة

لم نعد نستغرب ما هو غريب او نشعر به
مسألة تعود

تحياتى

ذو النون المصري يقول...

لقد تعرضنا لاكبر عملية تضليل في تاريخنا...رئيس الدولة و رؤساء الاحزاب المفترض فيهم انهم رؤساء محتملون للدولة يتامرون معا ضد شعب مسكين لارهاقه و ابقاؤه تحت الوصاية او بالاحري تحت نير العبودية كي يتمكن كل منهم من تحقيق بعض مصالحه الشخصية .. الا لعنة الله علي كل من خدعنا و كل من سعي لمصلحته الشخصيه و هو علي علم يقيني بانها ضد مصالح الوطن.. و ليذهب هؤلاء الخونه رعاة مصالحهم الي الجحيم قبل مذبلة التاريخ... و ليحمي المصري ثورته و ليبقي هؤلاء في ذاكرته ...حتي يظل متيقظا لاي محاولات استحمار قد تاتي بها الايام ...فليس معني اننا ثرنا و نجحنا اننا لن نُستحمر بعد اليوم..كلا فقد يحدث ما حدث ثانية لو غفلنا و تركنا هؤلاء الانجاس يمرون من ذاكرتنا بلا عقاب ادبي يبقيهم كالرجس و يبقي فعلهم _و هو الاهم _ في دائرة الضوء .حتي لا ننسي..و اتمني ان لا ياتي من يقول ارحموهم فليس من طبيعة المصري الانتقام... يجب ان تتغير طبيعتنا و ننتقم ممن اذانا حتي لا ياتي اشرار اخرون الا و يعرفون ما سيحدث لهم لو وقعوا في ايدينا.......

شمس النهار يقول...

*Foxology

عايزة اقولك ان البطئ الشديد اللي حصل في الاجرائات

هو اللي تسبب في هرب امثال رشيد وبطرس غالي وحسين سالم وغيرهم

وماتنساش ان السبب الرئيسي وجود احمد شفيق مهندس تهريب الاموال وتظبيط الاوراق

مصر بتتعرض لبتلاء شديد ياابو يوسف
بس انا عندي امل كبييييير في الله
وربنا بيقول في القران ادخلوا مصر ان شاء الله امنين
يبقا خلاص نسلم بعد ماناخد بالاسباب
فرج ربنا قريب

شمس النهار يقول...

*فاتيما

فااااااااتيما ازيك ياجميلة

عارفة بقا انا مش غايظني غير موضوع العجلة دي

اذا كان العمال مش عايزين يشتغلوا نعمل لهم ايه
الناس عايزة تقعد وتاخد فلوس المصري بقا كسلان

واتنرفزي زي ماانتي عايزة انا عماله اندب وانوح من اول الثورة المضادة ماابتدت
وربنا يستر علشان لو في ثورة تانيه هتبقا دمار

قريتي بوست النقابة كتبت الموضوع كله
ياريت تقريه علشان انتي كنتي شريك في بعض احداثه

نورتي ياجميلة
والبرنس نور الدين زي الفل وسعاد كانت علي الفراعين النهارده بتعلن عن رفع القضية علي المستشفي في برنامج عايز حقي مع احمد عبدون
لما نرفعها علي اليوتيوب هبقا اديكي اللينك

شمس النهار يقول...

*الازهرى

ازهري عندنا يامرحبا يامرحبا
فييينك

اخبار الاستمحانات ايه ياريس

وبتشك ليه في قائمة امن الدولة انت قريت الاسماء دي فيها اسماء منطقية جداااا
اشهرهم ادور وواقعة جريدة الدستور
وحميدة وانت عارف انه مسجون علي زمة واقعة الجمل

شمس النهار يقول...

*Haytham Alsayes

هيييثم ماذا اقول بعد الذي قيل

بعد اذنك هاخد التعليق كده وهنشره عندي علي الفيس الشخصي بتاعي

وهكتب اسمك عليك
ده تعليق ولا كل التعليقات

ينصر دينك

شمس النهار يقول...

دعاء مواجهات

المشكلة مش فينا احنا
المشكلة في البسطاء من الناس اللي بيتأثروا بالشيوخ واحنا عارفين الشيوخ مسموعين جدااااااااا
في القري المصرية
والقوة الانتخابية الحقيقية في مصر هي اللي في المحافظات والقري والنجوع

شمس النهار يقول...

*ابراهيم رزق

لالالالا
مش عايزين نتعود علي الاخبار دي ونعتبرها عادي
مش عايزين نرجع تاني في حالة الغيبوبة
عايزين نصحصح ونقاوم صانعي الاخبار دي

givara يقول...

موضوع اجاسوس ده غايظنى بجد
لو هيدونا قصاده ميه
فى رأيى الواد ده ميرجعش
الواد كان ناقص يرشح نفسه لانتخابات الرياسه
بالنسبه لموضوع اللى مش هينتخب سلفى يبقى بيتحدى الله ورسوله
ده اللى كنت خايف منه

شمس النهار يقول...

ذو النون المصري

عجبني مسطلح استحمار ده جدا
لا مااعتقدش ان حد هيقدر يستحمر المصري تاني

اما بالنسبة لموضوع الانتقام

اعتقد اننا امرنا بالقصاص
وفي فرق بين الانتقام والقصاص

الانتقام فيه جور واخذ اكتر من الحق الحقيقي
والقصاص هو تحقيق العدالة في اخذ الحق
وربنا شرحها لنا علشان مانضلش
العين بالعين والسن بالسن والبادي اظلم

شمس النهار يقول...

*givara

ضحتني حكاية انه كان ناقص يرشح نفسه للرياسة
:))))))))

موضوع القيادي السلفي انا مااستغربش علشان هو ده اللي حصل في الاستفتاء وجت النتيجة بنعم
والسواد الاعظم من المثقفين والقانونيين والسياسيين
عايزين الصح اللي هو الدستور الاول
ولكن بعد ايه الان لانملك غير التسليم الديمقراطي لنتيجة الاستفتاء

rack-yourminds يقول...

اكتر شئ بيستفزني بجد الناس بتوع حزب اسفين يا ريس (حاجه تفرس)

beautiful mind يقول...

اخبار تمام وطازة
طيب وحضرتك مسمعتيش الاستاذ صبحي صالح لما قال ان الاخواني لازم يتجوز اخوانيه زيه
والا يبقي واد مش عارف قال عليه ايه كدا
احنا داخلين علي حرب افكار
بالنسبة بقي لباقي المواضيع اللي جاي هنعرف منه اكتر وايه هيحصل بالظبط
تحياتي

شمس النهار يقول...

*rack-yourminds

نفسي يطلع واحد منهم في برنامج توك شو مع طبيب نفسي اعرف بس هو اسف ليه وعلي ايه

شمس النهار يقول...

*beautiful mind

صبحي صااااااااالح
هو انا كتبت في حد زي ماكتبت عن صبحي صالح
هو بس علشان انت ماكنتش موجود ومتابع ده له حوالي تلات بوستات لوحدة
لحد ماالاستاذ ماجد القاضي قال لي ماتشيليه من دماغك