السبت، 4 يونيو 2011

وشهد شاهدا من اهلهااااااااااا+تحديث

ياجماعة حصلت حاجة في المدونة
ان ردي علي بعض التعليقات ماظهرش في التعليقات
وتعليقات لحد اتكتب فيها حد تاني
وبعتذر عن اللخبطة وهعيد التعليقات تاني

======
ايه رأيكم في الخبر ده
لما نزلت الكلام اللي بالاحمر تحت ده علي الفيس
ارتباطفي ناس من اصحابي زعلوا مني بعد مافهموا كلامي غلط واني بشتم في الجماعة
مش عارفة في ايه هو ليه بقينا نصادر علي راي بعض
هو معني اني اخالفك الراي ابقا غلط وحرام وعيب
ليه مانتعلمش احترام الراي والراي الاخر
ربنا لوعايزنا مانختلفش كان خلقنا راي وشكل ودين وفكر واحد
تخيلوا شكل الدنيا واحنا كلنا نسخة من بعض مافيش اختلاف
(انت بتضر الاخوان ياصبحي ياصالح مش كل الناس تصلح للتعامل مع الاعلام وخصوصا الاعلام الحالي طالما انت مالكش في ده ابعد وماتضرش جماعة بتجاهد من 1928 ولما تتكلم تتكلم عن نفسك مش بأسم جماعة بحالها
والاسلام ماله ومال اللي انت بتقوله وانت ليه بتشبه نفسك بالرسول
انت بتفتي في كل شئ ليه؟؟
الرسول ماقلش المهاجر مايتزوجش الا مهاجرة كفياك حرام عليك هضيع صورة الجماعة
)

هناك 28 تعليقًا:

سواح في ملك اللــــــــــــــــــه- يقول...

تعرفي يامدام شمس

انا فهمت كلام اراجل ده صح

هي مش قصة مهاجرة ولا مقيمة

لا طبعا موضوع الزواج اخواني باخوانية

ده موضوع في منتهي العقل للاسباب الاتية

اولا هما ليهم تقاليد شبه عائليه كاهل اصعيد

والعرب القدامي

زي يعني الواحد يتجوز بنت عمه او ماشابه

ذلك

ثانيا حضرتك عارفة نسبة العنوسة مابين

الشباب العاديين يعني واكيد فيه مثلها

في الاخوان فهو بيتكلم انه من باب اولي

انك تتجوز بنت اخوانية هما مربينها

ومعلمينها ولايطمحوا لتزويجها مثلا

لشاب لايعرفوه قد يكون سئ الخلق او مدمن مثلا

علي فكرة انا مش اخواني ولا احب تصنيف نفسي

لكن باحب اشوف الامور كما هي

ولا احملها اكثر ماتحتمل

تحياتي

ENG./ELSAYED,PMP يقول...

هندسة
المشكلة دى ام المشاكل حاليا زى ام المعارك بتاعت صدام
الاخوان جماعة سياسية دينية
لو انتقدتيها سياسيا ... يتم اتهامك بالزندقة ... طيب يا عم الحج حلهلنا ... انا عايز انتقدك من غير ما ادخل النار

تحياتى

دعاء العطار يقول...

انا حسيت انك بتدافعى عن الإخوان وبتصلحى صورتهم مش بتهاجميهم D: D:

بس حتى بقى لو افترضنا انك فعلاً مختلفه معاهم وبتقولى رأيك

ايه بقى المشكله فى كده ؟

هو ربنا خلقنا مخيرين ليه فى بعض الأمور؟

مش عشان نفكر وتفهم ونشوف ايه الصح ونختاره

ماتضايقيش لأن اللى يزعل من كلامك يبقى هو اللى عايز يراجع نفسه

اسيره الاحزان يقول...

انا لسه سامعه بلال فضل واتكلم عنه برده وعن الكلام بتاعه اللى محدش عنده عقل يوافق عليه

واغرب حاجه بجد حكايه ان الاخوانى يتزوج من الاخوانيه دى مصيبه ايه دى .... بعد كده يطلع الاهلاوى يتجوز من اهلاويه والزمالكاوى من الزمالكويه عشان يحافظوا ع النسل هههههههههههههه

إنسان || Human يقول...

هو الصراحة

سواح في ملك الله

بس هو في سؤال هو ايه علاقة العنوان بالموضوع؟؟

"وشهد شاهدا من اهلهااااااااااا"

هو حضرتك من اهلها ؟

Foxology يقول...

الحقيقة بعد الثورة وبعد الانفتاح العظيم اللى حصل فى كل وسائل الاعلام بقت مصر عبارة عن مكلمة كبيرة وكل واحد كبير أو صغير بيفتى وبيتكلم عن أى حاجة وده التطور الطبيعى لسنوات طويلة من التكميم الاعلامى وده شئ متوقع من الجماعة وقياداتها مع احترامى الشديد لكل الناس اللى فيها

تحياتى

عبدالحميد خطاب يقول...

أنت مدعوه يا افندم لمناقشة هامة من خلال مدونة http://mytadwen.blogspot.com/
نتشرف بزيارتك
جزاك الله خيرا

rack-yourminds يقول...

اولا:الاستاذ صبحي صالح اخطأ في تصريحاته وكان واجب عليه أن يعتذر

ثانيا:لست من الاخوان واختلف مع الكثير مما يطرحونه ولكن ثمة مجموعه من الحقائق ينبغي أن تذكر لوجه الله والوطن

*سيدتي الاعلام المصري دائما يتصيد بل ويتربص لكل ما يصدر عن الاخوان ,حتي يخيل الي احيانا انه لا يستهدف الاخوان بل يخشي من الاسلام والاخوان ما هم الا غطاء

*قد نختلف او نتفق مع الاخوان ولكن مما لاشك فيه انهم اكثير فصيل سياسي تعرض للقمع في عهد النظام السابق وكثيرمن الذين يهاجمونهم الان بالحق وبالباطل كانوا يناضلون تحت التكييف

*الأخوان كان لهم دور عظيم ايام الثوره وحتي من يختلف معهم شهد لهم بثباتهم يوم موقعة الجمل وتعلمين يا سيدتي ماذا كان سيحدث لو انسحب الثوار في موقعة الجمل

سيدتي ثمة شئ اسمه الأولويات فعلي اعلامنا ان يهتم بمثل تلك الاولويات علي سبيل المثال اقتصاد البلد ضحايا الثوره تطهير البلاد من كافة رموز النظام السابق بدلا من ان يشغلنا بمثل هذه التوافه من الامور التي لا تقدم ولا تاخر
__
تحياتي وسلامي لحضرتك

غير معرف يقول...

لو الاخان بيعتبروا صبحي صالح معبر عنهم يبقى يتحملوا بقا

أنا - الريس يقول...

أنا هكرر نفس الكلمة صديق إخواني لما هجمت بعض شخصيات الاخوان اللي بتكره الناس مش في الاخوان بس لا دا اصحاب الديانات الأخري بيبصوا إن ده هوا الاسلام وده غلط طبعا

قالي " متخدش كلام للاعلام باسم الجماعة إلا من عصام العريان "

أنا - الريس يقول...

بس برضوا من حق كل واحد يقول رأيه شرط تحمل العواقب دنيا وآخرة وعلي رأي ابويا كل واحد متعلق من عرقوبه

Unknown يقول...


السلام عليكم

أختي شمس..
موضوع زواج الإخواني من إخوانية تكلمت فيه بتفصيل في آخر بوست..

ورغم أني تكلمت عن صبحي صالح شخصيا في البوست قبل الأخير، لكن اسمحي لي أن أضيف (من وحي كلامك وتعليقات بعض القراء):

1 - هل 10 دقائق صوتية (بتوع الفلوطة) تجعلنا نتجاوز عن مئات الساعات الصوتية التي تحدث الرجل فيها خلال مؤتمرات وندوات ومناظرات وصفه الجميع فيها بالخطيب والمناظر المفوه (أتحدى أن يكون أحد أخذ على الرجل شيئا خلالها قبل كليب الفلوطة)!!!!
هل هذه الدقائق العشر (بافتراض أنه أخطأ) تكفي لجعلنا نصف الرجل بأنه غير أهل للخطاب الإعلامي؟ أليس حكما جائرا بعض الشيء؟!!

2- أتحدى (والكلام ليس لك) أن يأتي أحد باتهام صريح واضح من الإخوان لمخالفيهم (بـــالـــزنـــدقـــة)...!

3- أعتقد (والكلام ليس لك أيضا) أنه ليس من الصواب تسفيه راي الآخر.. فيكفي أن يقول واحدنا أنا غير موافق على ما يقول بسبب كذا وكذا.

4- أختي شمس.. يمكن لأي مسلم أن يستشهد في ردود أفعاله بالنبي (ص)، فهو قدوتنا.. وليس معنى ذلك أنني أرفع مكانتي لمكانته الشريفة.. فمن يؤذى لأنه يدعو إلى الله يصبر نفسه بأن النبي (ص) مع قدره العظيم أوذي في سبيل الله، فمن باب أولى أن يحدث له ذلك وأن يصبر عليه كصبر النبي (وصبحي صالح داعية إلى الله ويدعو إلى تحكيم شرع الله.. هذه حقيقة بغض النظر عن اتفاقنا أو اختلافنا مع أسلوبه).. لذا فهو يستشهد بذلك ضد محاربيه الحقيقيين من أعداء الحل الإسلامي، وليس ضد المخالفين له في الرأي من المستمعين والقراء.

طبعا أختي شمس... لك مطلق الحرية في إبداء رأيك.. ولا تحتاجين إلى موافقة أحد لإعطائك هذه الحرية..
اعرضي رأيك وليقبله من يقبل وليرفضه من يرفض... المهم أن يرفض رأيك في أدب ودون تجريح أو انتقاص من قدرك.. وإلا فأعرضي عنه وقولي: سلاما.

تحياتي أختي الكريمة..

شمس النهار يقول...

*سواح في ملك الله

كل اللي قلته ده وزيادة اعرفة عن زواج الاخواني من عائلة اخوانية
وطول عمرهم بيعملوا ده من غير ماحد يدخل او يعترض

زي النوبيين لايتزوجون الا من نوبييين
وماحدش اعترض

المشكلة ان لا الوقت ولا وضع البلد يسمح بمثل هذه الحوارات
وكمان الاسلوب اللي اتقال بيه الكلام ماينفعش اقبله من من هو مثل صبحي صالح
حد هيقول لي ان هو كان بيكلم شباب الاخوان
هقول علي عيني وراسي طول عمرهم بيعملوا مؤتمرات واجتماعات وعمرنا ماعرفنا بيقولوا فيها ايه
اشمعنا دلوقتي
ومش من مصلحة مصر ولا الاخوان اثارت اي بلبله الان واننا نتلهي في اي حوارات جانبيه
الاخوان همه الجماعة الوحيدة في مصر المنظمة وفي نفس الوقت معتدلة
وهكرر مش اي حد يصلح للتحدث في الاعلام

شمس النهار يقول...

*ENG./ELSAYED,PMP

اي انسان يتعرض للعمل العام
وخصوصا السياسة
مش من حقه انه يعترض اي نقد يوجه له الا لو كان شتايم وتجريح
علشان كده بنقول ياشيوخنا الاجلاء لو سمحتوا ابعدوا عن السياسة

شمس النهار يقول...

*دعاء العطار

انا لابدافع ولا بهاجم

انا بقول الحق

الجماعة اتسحلت من 1928 لحد النهاردة

وهمه الكاين الوحيد المنظم
وكانوا زي الفل والشعب اللي ماينتميش لهم وقف جمبهم كتير
فا النهاردة بعد ما الحمد لله اتشال عنهم كلمة المحظورة
هينزلوا بشعبيتهم ويخوفوا الناس منهم

وعلي فكرة انا تحاورت مع احد الاصدقاء من من ينتمي للأخوان عائليا من الاب والام كمان
قال انه مش راضي عن اللي بيحصل
ومازعلش من كلامي

شمس النهار يقول...

* اسيره الاحزان

ضحكتيني
:)))
حلوة اوي ان الاهلاوي يتجوز اهلاوية
تصدقي فكرة
انا كنت بكره يوم ماتش الاهلي والزمالك بسبب بابا وماما

بابا اهلاوي وماما زملكاوية وكانت الدنيا بتبقا ولعة

:))))
لما كرهوني في الكورة

شمس النهار يقول...

* Hu-man

لما تسألأ السؤال ده يبقا مادخلتش اللينك

الشاهد همه الجماعة نفسهم
عاملين تحقيق مع التلاته الشطار اللي ادلوا بتصريحات

شمس النهار يقول...

*حميد

حاضر من عينيه هروح حالا بعد ماارد علي التعليقات

بس انت ماعلقتش علي البوست ليه؟

شمس النهار يقول...

* حميد ي

علي فكرة المفروض ان الجماعة ماتصدرش ناس يعملوا بلبلة ويعتذروا علشان الشعب المصري ماعندوش الثقافة دي
والاعلام عندنا متربص بكل ماهو اسلامي
اول ماواحد فيهم يقول كلمة يتقال لك اهو شوفتوا دول هيولعوا البلد

ضيف علي ده ان اصلا مني الشازلي مذيعة رغم شهرتها الا انها لاتتمتع باي مهنية صادقة عايزة تعمل اي اثارة اعلامية وخلاص ولو رجعت لبوستات السنة اللي فاتت هتلاقيني عامله بوست عن اللي عملته مع البرادعي وهو لسه راجع مصر
الاعلام المصري الان لايعبر عن المصريين خااااالص
تحس انه في وادي والباقي في وادي

وطبعا الاخوان كان لهم دور ودور كبير كمان ايام الثورة مش همه مصريين ولا ايه
وكمان همه منظمين جدا وده اللي يميزهم عن اي تيار في البلد
علشان كده غير مقبول ان يطلعوا واحد يبوظ الدنيا كده
تحس ان الاعلام عايز يلهينا فعلا بأي قضية واعتقد ان قيادات الاخوان اذكي من كده بكتير
شكرا علي تعليقك القيم

شمس النهار يقول...

* فتاه من الصعيد

لا طبعا مش بيعتبروهم متحدثين عنهم
بدليل ان التلاته بيتعمل معاهم تحقيق جوه الجماعة

Unknown يقول...

بعيدا عن أى
شىء خاص بالأخوان
او غيرهم :تقبل راى
الأخر والحكم عليه من
غير أى رواسب او حساسيات
محتاجة ناس تانين غيرنا أو
غيرى انا شخصيا لأنى فعلا كتير
من الأمور عواطفى لها جزء من الحكم!

شمس النهار يقول...

*norahaty

الدكتورة عندنا يامرحبا يامرحبا

ازيك يارب تكوني بخير

وكلامك والله زين
وادخل علي اللينك ده وقولي لي ايه قولك في دكاترة الايام دي
http://www.facebook.com/home.php?sk=group_210429475655787&ap=1

شمس النهار يقول...

*Foxology

مش عارفة رديت علي تعليقك وتعليق ناس تانية ومااتنشرش ليه مش عارفة هعيد تاني

فعلا يافوكس مصر تحولت بقدرة قادر لمكلمة كبييييييرة

واللي ماكنش بيتكلم بقا بيتكلم علي الفاضي والمليان
والعيب مش عليهم العيب علي الاعلام اللي مابيخترش مين اللي ينفع يتكلم ومين اللي ماينفعش

بس ان شاء الله

شمس النهار يقول...

*MR.PRESIDENT

تصدق كلمة ابوك دي في الجون

بس هنا المتعلق مش من عرقوبه هو لا ده متعلق من عراقيبنا كلنا

وافيد ان العرقوب ده هو ظهر مفصل القدم لمن لم يعرف وهي منطقة من المناطق اللي الاحساس بالالم فيها صعب وشديد جدا
:)

شمس النهار يقول...

*ماجد القاضي

انا كتبت رد علي البوست اللي تفضلت ونشرته عندك في المدونة واكيد انك قريته

وخير دليل علي كلامي ان الجماعة نفسها تجري تحقيقات مع التلات فرسان اللي انا بعتبرهم ورطوا الجماعة في قضايا جانبيه هم في غني عنها وارجوا منك ان تطلع علي ردي علي باقي الزملاء هنا في التعليقات

وفي فرق بين انك تتخذ من الرسول قدوة وان تشبه نفسك بيه ولما تحب تعمل كده في لباقة للتشبيه مش كده علي طول ونسئ ادب الحوار مع الرسول اللي نهينا عنه اصلا
وماتطلعش من رجل مستشار وكان عضو مجلس شعب وينتمي لجماعة عريقة زي الاخوان المسلمين
ده يحاسب اكتر من اي حد تاني علشان المفروض انه يحاسب علي كلامة

شكرا لك علي تعليقك الثري

تامر علي يقول...

هو الجملة صحيحة وانا لااختلف مع معناها الا في حته التشبية بالرسول لانها جائزة بنص القرآن لأن الرسول قدوة لنا جميعاً وياريت كلنا نتشبه بيه

لكن الجملة "الصراحة يعني :))" قاسية شوية وفيها نبرة هجوم وكنت افضل ان تحمل نبرة النقد (الداخلي) لأننا كلنا نعتبر فصيل التيار الاسلامي حتى لو اختلفنا مع بعض كتير
تحياتي :)

غير معرف يقول...

Fajna stronka lecz dla polepszenia skutecznosci i reklamy zapraszam do skorzystania z naszej oferty np: [url=http://www.cyberpozycja.pl]Projektowanie stron www[/url] na pewno jestesmy konkurencyjni.

شمس النهار يقول...

*تامر علي

لما بتكون خايف علي حد مابتحبوش يغلط

والاخوان غالية علي اغلب المصريين
بسبب تضحيتهم والتعذيب والاكاذيب اللي اتعرضوا لها علي مر الزمان كمان همه الفصيل المعتدل الوحيد في مصر

وتاريخهم في البهدلة من 1928
مايجيش بقا افراد منهم لايجيدوا فن التعامل مع حوارات الاعلاميين
ويبهدلوا الدنيا
والحمد لله ان الجماعة حققت معاهم ومنعتهم من اي حوارات مع الاعلام
وخصوصا اللي بيحبوا يعملوا فرقعه اعلامية علي حساب اداب المهنة