الأحد، 12 يونيو 2011

الشهداء والمفقودين


تحية للمهندس خيرت الشاطر
علي الحوار الجميل اللي كان مع محمود سعد علي التحرير
بصراحة وضح حاجات كتير
جداااااااااا
هي دي الناس اللي تتكلم بأسم الجماعة مش صبحي واخوته
=======
ومش قادرة استوعب موضوع الشهداء والمفقودين اثناء الثورة
اللي اتكلم عليه يسري فودة والشيخ خالد الجندي النهارده
علي قناة ازهري
اللي اتقتل اتقتل
الله يرحمه برحمته الواسعة
مال العبيد بالعلاقة بين الرب وعبده
مات شهيد
مات مش شهيد دي علاقة بين ربنا وبينهم
ربنا مطلع علي موقعه ونيته
يعني هو السجناء اللي قاعدين لابيهم ولا عليهم ودخل عليهم ناس يقتلوا فيهم
ذنبهم ايه؟
يعني السجين ده مش روح
وايه عرفنا هو لابس لبس السجن ليه مش يمكن مظلوم ومسجون ظلم
ماياما النظام السابق ظلم ناس ودخلهم السجن
مايمكن مسجون سياسي
مش يمكن قتل وهو بيدافع عن السجن زي المساجين اللي جابوهم في التليفزيون ورفضوا يخرجوا وكانوا بيدافعوا عن مزرعة السجن
مش يمكن السجين ده تاب في السجن توبة نصوحة
وماحدش يقول من المعتقلين في الاحداث الاخيرة
علشان ان السجين يلبس لبس السجن ده معناه انه اتحكم عليه خلاص
وبيقضي العقوبة
كمان اللي اعتقلوا في بداية الثورة مارحوش السجون
ليه عايزين نحشر نفسنا في علاقة ماينفعش نحشر نفسنا فيها ماينفعش نقول ده صالح وده طالح ماينفعش نذكي علي الله
وياريت ندور علي المفقودين بدل الجدل ده المفقودين دول لازم يتعرف مصيرهم دول ليهم اسر مستنياهم
وليه الصور مش مالية الاعلام سواء النت او الصحف الورقية او برامج التوك شو اللي تحولت الي مكلمات اغلبها بايخة
ماينزلوا صور الناس دي بستمرار
في النهاية ربنا يصبر اهليهم
وياريت نتعامل مع الانسان علي انه انسان
مهما كان موقعه او نسبه اومستواه

هناك 18 تعليقًا:

سواح في ملك اللــــــــــــــــــه- يقول...

شموسة
سيدتي الفاضلة

لاتعليق بوستاتك اليومين دول اكثر من رائعة

تحياتي

Ramy يقول...

ربنا يرحمهم

لسه بقول لنفسى الشهداء اللى ادفنوا و مش عارفين اهلهم

طب اهلهم يعملوا لا عارفين اولادهم عايشين و لا شهداء

ربنا يعنهم

givara يقول...

ان شاء الله هعلق بالحقيقه اللى جوايا وبضمير
وده اولا
اما ثانيا فالأوصياء فى هذا الزمن قد كثروا
بل ان كثرتهم الان ليست مشكله لكن المشكله انهم صارو كالملح يتدخلون فى كل شئ واى شئ وكما قلتىحتى العلاقه بين العبد وربه لم يتركوها
سلامى للدكتور خيرت الشاطر
فاختلافى او اتفاقى مع منهجية فكره لا يفسد فى كونه قد ضحى وتألم من اجل الثبات على موقفه لذا وجبت علينا التحية حياله
اخر جزئيه وللعلم فمكانها فى اخر التعليق لا يضر على ضعف مكانتها فشهداء الثوره ومفقوديها هم من منحونا الأمل وهم الان او ذويهم اولى الناس بالأمل
تحياتى لذلك البوست الرائع

Foxology يقول...

انها محاكم التفتيش سيدتى والملازمة لأى ثورة خصوصا لو قامت من المقهورين والمظلومين !

ربنا يسترها علينا من اللى جاى

تحياتى

rack-yourminds يقول...

متفق معكي انه الاعلام له دور كبير جدا في موضوع المفقودين ايام الثوره ,يعوض ربنا في الاعلام

رحم الله شهداء الثوره واسكنهم فسيح جناته

الحياة الطيبة يقول...

شمس النهار الحمد لله أن العلاقة بينن العبد وربه لا يتدخل بها أحد .
رغم ذلك تجدين من يتدخل في شأن ليس بشأنه ...الحمد لله الذي يجزي على أصغر الأعمال ...فكيف ببذل الروح ؟
فإن قصدوا النية فلا يعلمها إلا الله ،فٌن اعترفوا بتلك الحقيقة فلا يجب أن يفتوا بشي ليس داخل في نطاق علمهم .
هنيئاً للشهيد .....لن يضره ماصار بعده ويكفي أن رحمة الله وسعت كل شيئ .
بوست مميز شمس النهار ،، تقبلي مروري ...دمت بود غاليتي.

tarek momen يقول...

ماشاء الله علي الأسلوب الرصين و المتزن في التعليق و التحليل
!!!!!!!!!!!!!!!!!!!!
ده انتي بقيتي استاذة

تيمور يقول...

كلامك صح شمس لازم نغير نظرتنا فى حاجات كتير مش المهم فرقعة اعلامية وخلاص

تحياتى

Unknown يقول...

السلام عليكم

صراحة لم اشاهد حوار يسري فودة.. لكن رأيت صورة مؤلمة عن تجمع شهداء الثورة المجهولين مع شهداء العبارة وشهداء القطار في مقابر واحدة... كل ضحايا مبارك في مكان واحد يشهدون على ظلمه...!

أما أن الشهداء مجهولين فلا يسعني هنا إلا ذكر موقف الخليفة الثاني عمر بن الخطاب (رضي الله عنه) عندما أحصيت أمامه أسماء شهداء إحدى معارك العراق، ثم قيل له: وهناك قتلى آخرين لا يعرفهم أمير المؤمنين (أي أسماؤهم غير معروفة)..!
فبكى عمر (رضي الله عنه) بحرقة قائلا: وما يضرهم ألا يعرفهم عمر.. فالله يعرفهم..!

................
الحمد لله إن حديث خيرت الشاطر عجبك..
بس يا ريت تطلعي صبحي صالح من دماغك بقى :))
................
تحياتي أختي الكريمة.

شمس النهار يقول...

سواح في ملك الله

شكرا ياسواح علي كلامك اللطيف

:))

شمس النهار يقول...

Ramy

بجد صعبانين عليا
يعني لو ميتين هيعرفوا مكانهم لكن دلوقتي ماحدش عارف لهم طريق كويسين ولا مش

شمس النهار يقول...

givara

بالظبط حاشرين نفسهم زي الملح
حلو التعبير عجبني

وتحيا كبيرة جدا لكل الشهداء

شمس النهار يقول...

Foxology

اهلا بيك ياابو يوسف وتعازي الحاره لك وللأسرة
ربنا يتقبلها في عباده الصالحين

شمس النهار يقول...

rack-yourminds

ده الدور كله علي الاعلام
مين النهارده مابيتفرجش علي البرامج الحواريه ونشرات الاخبار

لازم الصور تنشر علشان الناس تتعرف علي اهاليهم

شمس النهار يقول...

الحياة الطيبة

اهلا بيكي ياغالية يارب تكوني بخير

كلمات تعليقك اوافق عليها كلها

ولانملك لهم غير الدعاء

شمس النهار يقول...

tarek momen

من بعض ماعندكم يافندم

عارف ياحاج انا بعتقد اننا كنا شباب محظوظ جدا شوف احنا مين اللي كان بيتكلم معانا
والحمد لله لم نتربي علي الهيافة

شمس النهار يقول...

تيمور

الايام دي المهم الفرقعة الاعلامية بغض النظر عن مصلحة الوطن

شمس النهار يقول...

*ماجد القاضي

وعليكم السلام ورحمة الله وبركاته

تصدق كل ضحايا اللامبارك في مكان واحد!!!
ان شاء الله يختصموه يوم القيامة

صح يكفيهم ان الله يعرفهم سبحان الله

والله يااستاذ ماجد مش عارفة اخرجه هو ومن ضر الخطاب الاعلامي للأخوان
الناس دي فضلت تجري تجري وتجتهد ولما وصلت لأخر الخط جه حد وكعبلهم
والحمد لله الجماعة منعتهم من الحديث للأعلام
:)))