الاثنين، 13 يونيو 2011

ولا حس ولاخبر:))


عايزة اتكلم في حاجتين مالهمش دعوي ببعض :))
كنت في مشوار في المقطم ازور ارملة عمي المريضة
وانا رايحة وانا راجعة لاقيت منظر علي الجنبين
بصراحة منظر عار في جبين المصريين
الطريق ده متكلف كتييييييير جدا من دمنا وفلوسنا
تخيلوا ان كله اكوام ردش من اللي بيطلعوا من الشقق اللي بتتوضب
تخيلوا لما السواق ياخد مبلغ كبييييييير جدا
من صاحب الردش علشان ينقل بواقي التكسير ده المقلب العمومي
والبيه السواق علشان يوفر كام لتر بنزين
يروح يرميه علي الطريق اللي متكلف ملايين
وعلشان يتصلح ويتلم الردش ده محتاج ملايين تاني
الطريق اصبح شبه مسدود
وكل ده اترمي اثناء الثورة وغياب الامن
ده معناه ايييييييييييييييه؟
ان المصري مش عارف يحافظ علي بلده ولا ايه!!!؟؟
======
زي واحنا رايحين مؤتمر كفر الشيخ علشان مشروع الريسيكلنج
الشباب اللي معانا وروني التعديات اللي حصلت علي الارض الزراعية
وبرضوا اثناء الثورة
(الصور عندي بس لما نشغل اللاب توب بعد التجديدات هنشرها)
يعني برضوا المصري بيتصرف غلط في غياب الرقابة عليه
في ناس لازم يتمسك لها العصاية علشان تبقا صح
والناس دي ملت الدنيا صراخ لما القانون اتطبق عليهم وهدوا لهم التعديات
وطالبوا بأنهم يدفعوا غرامات
يعني انتوا بنيتوا علي اساس ان لما الدنيا تهدي ويصدر حكم بالازالة
تتصالحوا وتدفعوا غرامة وخلاص
وعلقة تفوت ولا حد يموت
واللي ادهشني ان واحد من اللي تعدوا بيقول في التليفزيون
وايه يعني مايخدوا مننا غرامات يستصلحوا بيها ارض تانيه في حتة تانية
ايه الحلاوة دي ايه المصري الفصيح ده
وحضرتك بتشتغل ايه بقا طيب هتسيب البيت اللي بنيته غصب وحرام وتروح الحتة التانية في الصحراء؟
والتاني قالك ايه حتي لما يهدوا الارض دي مش هتصلح للزراعة تاني خلاص
يعني هو بيجهر بالجريمة عيني عينك بيعترف انه بور الارض الزراعية
بصراحة مش لاقية تعليق غير ان المصريين نفسهم أكلوا بلدهم
وعلشان يبطلوا يكلوها لازم من قوانين صارمة
تنظم حياتهم بالزوق وبالعافية
قانون ماينفعش فيه تصالح قانون يتطبق علي الجميع بدون استثناااااااااااء
عارفين الامريكان اغلبهم لايهتموا بالنظافة اصلا
حد هيقول عرفتي منين؟:))
اقولك هناك قوانين صااااااااااارمة للي يرمي ورقة او اي شئ في الارض
وغرامات مالية كبيرة
وياويلة ياسواد ليله اللي يعدي الشارع من غير مايدوس علي زرار التعدية في شوارع وشوارع تانيه تستني لما نور التعدية ينور الا لو معاك طفل او حد كبيييير سنااااا
المهم لاقيت في اكتر من مكان بنات وشباب بيتمشوا وهمه بيكلوا و لما الاكل خلص مسحوا في هدومهم لكن البواقي رموها في السلة المخصصه في الشارع
لو همه نضاف اصلا كانوا مسحوا ايديهم في مناديل لكن هدومهم مالهاش قانون
اهو المصريين عايزين قوانين كده انت حر في نفسك لكن هتعمل غلط يعود علي البلد هتتهف غرامة أأأأأأأأأأأأأأأد كده
ياهتتحبس حسب غلطتك ياحلو
:)))))

هناك 28 تعليقًا:

Ramy يقول...

غُلبت أقول ان الأوربيين و الأمريكان

مش كويسين علشان هما من طينة تانى

لا علشان الغرامات و القانون اللى بيتنفذ وقتى يعنى مفيش هزار

و مع الوقت بقى طبع

و اللى متطبعش
يعمل العدل غصب عن عينه علشان الغرامات و السجن

على فكرة الموضوعين لهم علاقة وثيقة ببعض

أن الأنسان المصرى يعشق الهرجلة و عدم النظام

ENG./ELSAYED,PMP يقول...

إزيك يا هندسة
عارفة المشكلة فعلاً فى وجود قوانين منظمة ... بس المصريين فهلوية ... وبيعرفوا يتحايلوا عليها ... على فكرة التصرفات الغلط الكتير اللى بتشوفيها حواليكى مش بسبب مستوى تعليمى متدنى مثلاً... أبداً ... الأخلاقيات مش مرتبطة مثلاً بالليسانس أو البكالوريوس ... الأخلاقيات دى بتغرس فى الوجدان من الطفولة ... علشان كده ممكن تلاقى واحد عنده سبعين سنه و قمة السوء ... فضلت فترة كبيرة من حياتى معتقد أن تقدم السن ممكن يكون ليه تأثير على الاخلاقيات والسلوكيات ... و يا آسفاه ... اللى ذاكر ... ذاكر...!
طولت عليكى
تحياتى

Bent Men ElZman Da !! يقول...

فى جزء من الشعب المصرى
مش مستوعب لحد دلوقتى انه لازم يكون سبب فى بلدنا تبقى احسن
فى ناس اهى لسه بتاخد حق مش بتاعها
لسه فى ناس مش بتحافظ على نضافه الشوارع
لسه فى ناس ماتعرفش يعنى ايه نظام
لسه فى ناس بتخالف القانون
والاهم ان لسه فى ناس مش بتطبق عقوبات القانون على اللى بيخالفوه
لو احنا عايزين بلدنا تبقى احسن
بالناس دى
صعب نبقى احسن

givara يقول...

بص انا ليا رأى فى الموضوع ده تحديدا
كان فى مره من المرات نظيف قال فى حوار ليه ان الشعب المصرى لا يعرف معنى الديمقراطيه
ساعتها الدنيا قامت عليه وخصوصا جرايد المعارضه وساعتها برده انا قلت ان نظيف صح احنا فعلا منعرفش يعنى ايه ديمقراطيه والسبب ببساطه اننا بقالنا عقود عايشبن فى دايرة الاله الفرد الحاكم الذى لا يخطئ
يحضرنى موقف قرأت عنه سابقا ان تلاميذ مدينة ما بدولة فرنسا قامو بمظاهره بسبب ارتفاع ثمن تذكرة الباص
وعلى فكره اعمار التلاميذ دى كانت اقل من عشر سنين
مين اللى علم الاولاد دول يطالبو بحقهم وميسكتوش عن ظلم
الاجابه انهم اتربو على كده
اما المواطن المصرى اتربى على ان الحكومه عدوه اللدود ولو يعرف يسرقها يبقى هو كده ميه ميه وصح
المواطن المصرى اتربى على ان انه ملوش حق ولا يعرف يجيب حقه بالقانون فكان لازم عليه يتعلم الهبش وتنغرز فيه صفة الانتقام واللامبالاه اتجاه الدوله
لكن هو لما يحس ان البلد دى بقت بتاعته وان الحكومه شغاله عنده
هيحافظ ويبقى مواطن تانى خالص
بس ده محتاج شوية وقت
طولت عليكى معلش

لــــ زهــــــراء ــــولا يقول...

في ناس لازم يتمسك لها العصاية علشان تبقا صح


للاسف احنا مبنمشيش الا بالعصايا يا شموسة

لولا

Haytham Alsayes يقول...

القانون لازم يتطبق
لازم الاخلاق تتغير عشان كدة مش صح
الانسان المصرى اتشوه نفسيا وعاوز اعادة هيكلة في كل حاجة


معلش مقصر مع مدونتك جدا
ومعلش واسف اني مسألتش علي بنت حضرتك وان شاء الله تقوم با الف سلامة

تحياتي

دعاء مواجهات يقول...

للأسف المشهد دا بقى بيتكرر كل يوم على كل الطرق العامه الرئيسية والكبارى كمان

دى بقت بجد .. فضيحه ..

Unknown يقول...

أنا شفت نفس المنظر على الدائري والله.
نفس الردش وكان منظر محزن
بس طبعا مينفعش نقول إن ده المصري
هناك دائما في كل مجتمع الصالح والطالح. هناك من شاركوا في الثورة ومن وقفوا يشاهدونها ومن سعوا للقضاء عليها.

أحــوال الهـوي يقول...

دايما باقول ان هذه التعديات و السلوكيات ما هي الا نوع من المقاومة السلبيه للشخص العاجز و الغير قادر علي الحصول علي حقه او الشاعر بالغبن و الظلم
مثل اللي بيمسك مسمار يخدش بيه السيارت و يحس بعدها بالراحه

قبل ان نسال لماذا لابد ان نطبق القانون بحزم علي الجميع بدون استثناءات او مجاملات حينها اعتقد ان السلوك العام سوف يتحسن

ناس شايقه البلد متاحه و منهوبه همه كمان استحلوا اغتصابها

تحياتي

موناليزا يقول...

وأنا موافقة على تتشريع قوانين والكل يحترمها
وعايزين نحط تحت الكل دى كذا خط

شمس النهار يقول...

Ramy*

صح يارامي اغلب المصريين يموووووتوا في الهرجلة ده غير الفهلوة

:))

شمس النهار يقول...

ENG./ELSAYED,PMP

مره محامي قالي القوانين اتعملت علشان تكسر

ولسه بقول لرامي ان المصري يعشق الفهلوة عشق وياسلام لوعمل حاجة ضد القانون ونجحت
:))

مصر محتاجة لقوانين صارمة تطبق علي الكبير والصغير
وكمان تكون عادلة
ده غير ان لازم الخطاب الديني يتغير
ونعرف ان الدين معاملة مش طقوس

شمس النهار يقول...

*Bent Men ElZaman Da !!

كلامك صح
لسه محتاجين وقت نتغير

لازم الخطاب الحكومي والاعلامي يتغير

وواحده واحده مصر هتبقا احسن

شمس النهار يقول...

*givara

ايوووووووووة لسه وقت ووقت طويل علشان نتعلم
وكماااان لازم نحس ان البلد بتاعتنا احنا مش مجموعة وبس

شمس النهار يقول...

*لـــولا وزهـــراء

مش كل الناس يالولا بيمشي بالعصاية

العبد تقرعه العصي والحر تكفيه النظرة

شمس النهار يقول...

Haytham Alsayes

ايوة العصابة اللي كانت ماسكة البلد ضيعت اجيال
عايزين سنين علشان ترجع مصر زي زمان
لما حد يخبط فيك يعتذر


:)ومافيش تقصير ولا حاجة اليومين دول الناس كلها مشغولة ولازم نعذر بعض

شمس النهار يقول...

*دعاء مواجهات

اهلا اهلا يادعاء ازيك يارب تكوني بخير

ليكي وحشة انتي فين

شمس النهار يقول...

*حاتم عبدالفتاح

انا شايفة ان معاول الهدم بقت اكتر
من معاول البناء

والاتجاه العام كلمة ادي اللي خدناه من الثورة

شمس النهار يقول...

أحــوال الهـوي

اعتقد ان اللي بيخرب في الممتلكات العامة بيعمل كده علشان هو مش حاسس انه واخد حقه وكمان ان البلد دي مش بلده وعلشان مافيش عقاب

المفروض سجن العصابة اياها يكون رادع لهم بقا

بس انا عندي امل برضوا

شمس النهار يقول...

*موناليزا

صح مش بس نحط القوانين وبس
لا نحترمها والاحترام يجي من ان الكل يعرف انها هتطبق علي الكبير والصغير والغني والفقير

Tamer Nabil Moussa يقول...

والله ياشمس انا مع القانون الصحيح والتطبيق الصحيح لة

وربنا يصلح الحال

مع خالص تحياتى

شمس النهار يقول...

Tamer Nabil Moussa

كل الناس المعتدلة مع القانون

لو اتحط قانون صح واتطبق صح
الحياة هتبقا اسهل كتييييييييير

rack-yourminds يقول...

كل الشعوب التي نسميها متحضره لو غاب القانون فيها لحظات ستعم فيها الفوضي وقد تكون فوضي اشرس واعم مما نحن فيه

القانون الحاسم والعادل هو الحل

فتــافيت (رحاب الخضري) يقول...

هههههههههههههههه
انا عايزة قانون من ده هنا
خليهم يتلموا بقى شوية

مرة كانت راجعة بليل من القاهرة
وراكبة البيجو.. وبعدين واخدة الكرسي اللي قدام.. وكانت جعانة وباكل مولتو وبشرب بيبسي.. وبعد ما خلصت فضت حاطة الشنة اللي فيها كياس المولتو وكان البيبسي وازاة الماية جنبي لحد ما انزل وارميهم في باسكت او صندوق.. قام السواق واخدهم من جنبي قالي.. يا ابله كده حرام العربية تتبهدل ده حتى النظافة من الايمان.. وقام دب رامي الكيس على الطريق.. من من كتر الضحك وقتها والصدمة كنت هاموت بجد :))))).. ده عبيط اخواته!
والمشكلة انه كان جاد فعلا في كلامه!

مصر محتاجة قانون لكل حاجة
عشان البلد تتعدل :|

شمس النهار يقول...

* rack-yourminds

صدقني بعد ماعيشت في بلادهم اقدر اقول لك انهم لو مافيش قنون هتتقلب بلادهم فوضي اكتر مننا

شمس النهار يقول...

* فتافيت

هو مالوش دعوة عربيته وبس لكن الشارع طظ

زي الست اللي بتنضف بيتها وترمي كيس الزبالة من شباك المطبخ
ينزل في المنور ديييييييييب

وصاحب المحل اللي بيكنس محله ويرمي الزبالة في الشارع

لسه هناخد وقت

أنا - الريس يقول...

معلش مقصر يا شموسه
بس والله الواحد اليومين اللي فاتوا كان بيلف عشان يجب حق والحمد لله شيخ الأزهر كان متفاهم

أنا - الريس يقول...

بالنسبة للمصري اعتقادي إن كتير عايزين يتربوا وعندهم استعداد

لكن قليل اللي عاوز قانون يجبره لأن نفسه أماره بالسوء