الخميس، 16 يونيو 2011

الجاسوس -المشير -الرؤساء -سوريا ...الخ

السحابة اللي جاية من بركان اريتريا تخلينا نقول الحمد لله
اهي دي لادخل لبشر فيها
وتسبب قد ايه خسائر في السياحة؟؟؟؟؟
-------
موضوع الجاسوس اللي متصورلي في كل حته فيكي يامصر
ايه الحلاوة دي
وهو ده فعلا جاسوس ولا بيشتغلونا علشان نعرف قيمتهم
وايه التضخيم الاعلامي ده
وياريت مايسكتوش زي كل حاجة ويعرفونا كل شئ
اول بأول احياة ابوك علي راي فؤاد المهندس الله يرحمه:))
-------
ملاحظة انا ان الثانوية العامة السنة دي محطوتة في حجمها الطبيعي
ومافيش ارهاب نفسي لأولياء الامور والطلبة
والاعلام مهادن
خلصت الوظيفة بتاعت الثانوية انها تلفف الناس حوالين نفسها والناس تتلهي بيها عن امور اهم واصعب
طيب الحمد لله
واشكر وزير التعليم انه مازرش اللجان السنة دي
يارب خير:))
-------
عايز اوجه تحية للمشير طنطاوي المتواضع
الرجل ده بغض النظر انه كان وزير الدفاع وعشرة طويلة مع اللامبارك
الا انه راجل جدع ايوة
مااستغلش الوضع وقاعد في بيته ولا مسلط الضوء علي نفسه ولا عمل اي ورنيش ولاتلميع ولا صوره ماليه الجرايد والمجلات وكتب الوزارة
ولا طلع علينا كل شوية يلقي خطاب ولا حشر نفسه في حاجة
بيعمل في صمت
سلام سلاح ليك يامشير الجيش المصري اللي حمي ثورة بلده
--------
سؤال علي الماشي بقا مادام جبنا سيرة المشير
هو ايه وضع مصر من اللي بيحصل في الجارة العزيزة ليبيا
اللي بتربطنا بيهم مليون حاجه
وطن عربي وقارة واحدة واطول حدود
ونسب بين المصريين والليبيين وحاجات كتير
مستنيين ايه علشان علي الاقل ان ثوار مصر يعترفوا بمجلس ثوار ليبيا
وخصوصا يرئس وزارة مصر رئيس وزراء من ميدان التحرير
ومشير الجيش المصري حامي ثورتها
بصراحة شكلنا بقا وحش وخصوصا ان شكل النيتو بيعمل عمايل غريبة مريبة غامضة
واللي غايظني ان المجنون بتاعهم قاعد يلعب شطرنج ايه الخيبة دي
--------
ام سورية اللي الشعب ابتدا يتهجر ولا اللي جايله استعمار
مش فاهمة بصراحة موقف العالم من فشار الفار
لا واخيرا جامعة الدول العربية هتقوم متكاسلة لتحفظ ماء الوجه وتفكر هتعمل ايه
خزي لكل عربي لكل امم العالم
الا تركيا اللي فتحت اراضيها
يارب انصر اهل سوريا يارب
-------
والشئ المضحك بقا التقارير الطبية بتاعت عبد الله طالح واخوه في العصابة اللامبارك
نشوف كده
طاااالح(بيغيظ شعبه)صحة السيد الرئيس في تحسن شديد وسيلقي خطاب للشعب عن قريب:))))
والسعوديين يقولوا الراجل خلصان وعنده حروق وصعوبة في التنفس
المهم ربنا ياخده ويخلص الشعب اليمني منه ويقتص للشهداء منه
نشوف بقا اللامبارك علشان مايتحاكمش
صحة الرئيس السابق في تدهور تام وضغطه بيرتفع كلما تم التحقيق معه واقترابت محاكمته
(ونبي انا اللي ضغطي بيعلي من الكلام ده)
السيد الرئيس السابق ممتنع عن الطعام(اللي بيجيله من بره)
يخشي علي السيد الرئيس من النقل من شرم الشيخ علشان قلبه هيقف
ونيجي نسمع تسريبات من المستشفي ان صحته زي الفل لاتتناسب اصلا مع سنه
بزمتكم مش هم يضحك وهم يبكي
---------
الشركات الاسبانية ترفض استئناف العمل في لم زبالة المصريين قبل رفع التعاقد من 100 مليون الي 300 مليون جنيه !!؟؟
ايه الحلاوة دي؟؟؟؟؟
هو ماحدش قال لهم ان الثورة قامت وان العصافير طاروا مع النظام اللي كان حاطتهالنا
من هنا بقول المصريين لموا زبالتكم زي ماطول عمركم بتعملوا
وعيب اوي اوي اللي بيحصل نجيب اغراب ينضفوا لنا بلدنا
وياريتهم نضفوها
يعني اخدوا الملايين والبلد برضوا مليانة زبالة ولا نسينا تاريخ الزبالة قبل الثورة
وده بوست عن الموضوع ده قديم
----------
خبر عجبني جدااااااااااااااااااا
التجارة تفرض رسوما علي صادرات الرخام والجرانيت وورق الدشت لتوفير الخام للصناعة المحلية
لييييه الخبر عجبني؟؟؟
علشان الحاجات دي وغيرها بنصدرها خام بسعر عبيط وترجع لنا بسعر عالي جداااااااااااااااا
طيب مانبني مصانع ونكبر الصناعة في مصر
زي موضوع البلاستك الدشت نديه للصين علشان ترجعه لنا زجاجات هي والمانيا
واقصد هنا الزجاجات الشفافة
وغيره وغيره
شكلنا هنصحصح ياولاد للصناعة المصرية تااااااني
:)))
كفاية كده البوست بقا طوييييييييييل وممل
:))))))
البوست الساااااااااااادس عشر
يامعين يارب

هناك 24 تعليقًا:

عبدالحميد خطاب يقول...

السلام عليكم
شكرا جزيلا لك

ماذا تفعل لتستمتع بأجازة الصيف
موضوع هام .. مدونة تدوينى ومقالاتى

أحــوال الهـوي يقول...

بانوراما علي احداث المنطقه زي ملخص 24 ساعة

و اللي عاجبني انه رايك انتي بدون تأثر بالاعلام و لا تاثيرات الشارع من محبي الادعاء بفهم السياسه
موافق علي وجهة نظرك لاننا تقريبا بنفس الحزب

تحياتي لرؤيتك الشامله

Mahmoud Ahmed يقول...

أخبار كتييييييييره ^_^

سواح في ملك اللــــــــــــــــــه- يقول...

مش عارف انا ايه سر تمسكنا بالشركات

الاسبانيه في النضافة

مهم قبل مايحطوا رجلهم المبروكة

كانت مصر انضف بكتير

Bent Men ElZman Da !! يقول...

انا اول مره اعرف ان فى شركات اسبانيه هى اللى مسئوله عن النضافه :|

نور الدين (محمد الجيزاوى) يقول...

عشرة على عشرة الطرح البسيط الجميل
مش عارف ليه حاسس ان الناتو مستنى كدة لما الثوار يكملو نص ليبيا ويوقف الضرب ويبقى تقسيم رسمى دولة للثوار ودولة لكاسبروف .. قصدى القذافى \

بالنسبة للمشير انا والله بحترم الراجل دة جدااا وشايف ان الجيش محطوط عليه من الجميع

الجاسوس ... لاتعليق حتى تتضح الرؤيا


برافو عليك يا افندم ماشاء الله عقبال ماتكملى المقال رقم 31

Haytham Alsayes يقول...

احلي حاجة ضحكتني في تويتر الايام اللي فاتت الجاسوس الاهبل اللي اتسمك بس عندى احساس ان في لعبة اكبر من كدة المخابرات مش هتضر سمعتها علي واحد اهبل ولو عمولوها فعلا يبقي في ان في الموضوع والكل هيعرف يعني هيعرف

الحاجة اللي غيظاني موضوع الاعتراف بثوار ليبيا طيب ليه بقي احنا ضيعنا الوقت دة كله بدون اعتراف يعني احنا عاملين خاطر للاخ العبيط مدمر القذافي ولا ايه مش عارف المفروض نسأل عصام شرف علي النقطة دي


تحياتي

givara يقول...

تدوينه جميله
شبه ملخص الاسبوع كده والاجمل
تعليقاتك على الاخبار والمواضيع
احسنتى

Unknown يقول...

السلام عليكم أختي شمس..

جميلة جولتك الصحفية الناقدة السريعة دي...

أعجبتني معظم تعليقاتك على الأخبار...

وأكثر ما أعجبني وأؤيدك فيه ملحوظتك الذكية عن الثانوية العامة.. وكذلك تحيتك للمشير.

تحياتي أختي الكريمة.

شمس النهار يقول...

*حميد

وعليكم السلام ورحمة الله وبركاته

ان شاء الله ازور مدونتك اقرا البوست

فين تعليقك عن البوست هنا ياحميد؟

شمس النهار يقول...

أحــوال الهـوي

اهلا بيك

الحقيقة وفي الواقع وبالطبع:))))))

يادكتور انا بكتب برد فعل مواطنة مصرية بتتأثر بالاحداث اللي حواليها مش اكتر
يعني تقدر تقول اقوال ربات البيوت
:))
والله فكرة ليه المدونين مايعملوش حزب اشمعنا احنا يعني
او نعمل ائتلاف شباب المدونييين
:))

شمس النهار يقول...

* سبايدرمان

:)))
اي خدمة

شمس النهار يقول...

* سواح في ملك الله

اقولك انا بقا ليه شركات اسبانية وفي فرنسيه كمان

الزبالة دي مورد من ابو بلاش وكمان بتلم فلوس نظير لمها من البيوت
الشركات دي بتلم الزبالة وتفرذها جيدا وتاخد اللي ينفع للرسيكينج علي بلادها بملاليم وكمان تاخد فلوس وتبعتها لنا تاني في صورها الجديدة سواء ورق او بلاستك او غيره
نيجي بقا ليه شركات اجنبيه ماالزبالين المصريين طول عمرهم بيعملوا ده وبيربوا كمان الخنازير والدنيا كانت نضيفة وماشية
علشان العصابة اللي مشرفه في السجن دلوقتي كانت عايزة تقاسم كبار الزبالين في رزقهم
ولما رفضوا عملوا فيهم كده ومش بس كده طلعوا لنا في انفلونزا الخنازير ودبحوا لهم الخنازير ونضفوا الحته اللي تحت بداية المحور ل6اكتوبر
حلو الكلام

شمس النهار يقول...

* Bent Men ElZaman Da !!

وشركات فرنسية كمان
مع ان الزبالين المصريين مااشتكوش

شمس النهار يقول...

* نور الدين

دي شهادة اعتز بيها يانور الدين:)


الناتو شكله بيلعب علي الانزال البري
دي فعمتها لما الكونجرس انزر اوباما
وتلاحظ ان الضرب مش في المليان
مع ان لو تلميذ دخل جوجل ايرث هيعرف يجيب القذافي فين

بجد طنطاوي رجل متواضع جدا جدا وكل اللي حواليه يعرفوا كده

ان شاء الله نتم كلناالتدوينة ال31
بس اعتبر ده مدح ولا قر
:)))))))))))

شمس النهار يقول...

*Haytham Alsayes

شوف ياهيثم لو الجاسوس ده طلع تهييسه من المخابارت
هتبقا فضيحة بجلاجل وشخاليل
علشان مش وقته خاااااالص
بس الواد جسوس مسخره هو جاي يتجسس ولا يتصور
وبعدين متأمر اهبل في جاسوس يحط صورة علي النت
:))))))

اما ليبيا ده جرح كبيييييييير
هينزف عندنا المصريين مافيش مصري مش زعلان من الموضوع ده

شمس النهار يقول...

*givara

شكرا علي تعليقك اللطيف

بس فين المناقاشات:)))))

:))

شمس النهار يقول...

* ماجد القاضي

وعليكم السلام ورحمة الله وبركاته

شكرا علي تشجيعك وتعليقك اللطيف

وزي ماقلت ده تحليل ربات البيوت بس مش خالتي بمبة
:))))))

rack-yourminds يقول...

عندما اري ما يحدث في الدول التي تشهد ثورات شعبيه احمد الله ان وهبنا جيشا عظيما ورجل وطني شريف وهو المشير طنطاوي الرجل العظيم بارك الله فيه

فالجيش المصري هو عمود البيت الوحيد الذي لم يستطع نظام مبارك تهشيمه

شمس النهار يقول...

*rack-yourminds

الجيش المصري الحمد لله ولاءه دائما لمصر وليس للحاكم

والحمد لله ان المشير ورؤساء الافرع اجتمعوا علي كلمة واحدة

دعاء العطار يقول...

الواحد بعد كده مايقراش أخبار يجى يعرف الأخبار من جريدة " شمس النهار "

تصدقى اسم حلو لجريده .. لما تعمليها ابقى افتكرينى أشتغل معاكى (: (:

بجد بيعجبنى جداً اسلوبك فى التعليق على الأخبار وأرائك

وفرحت زيك جداً بالخبر الأخير نفسى يارب أشوف مصر فى المكانه اللى تستحقها

دمتى بكل خير يارب (: (:

جايدا العزيزي يقول...

طرح راقى ومميز كما عهدنا منك ست الكل

ايضا الافكار لتنميه بلدنا واعمارها والانتفاع بمواردها بارخص الاسعار فكرة جميله

اشكرك

تحياتى

شمس النهار يقول...

دعاء العطار

والله فكرة يادودو

تعالي نعملها انتي وانا

:))))
دي تكسر الدنيا
:)))

يارب يادودو الخبر الاخير ده يتعمل في كل المجالااااااات

شمس النهار يقول...

*جايدا العزيزي

اهلا بيكي ياجايدا
انت بتروحي فين وبتغيبي

شكرا علي كلامك اللطيف