الاثنين، 20 يونيو 2011

اخيرااااا اللاب توب خف وطلع من الانعاش+تحديث

من وراء الشاشة الجميلة للاب توب بتاعي
ومن وراء الكي بورد احدثكم
الحمد لله والشكر لله تم اصلاح اللاب توب
وعاد الي العمل في ثوبه الجديد
رغم وسوسة المغرضين من ابناء القبيلة بشراء لاب توب جديد
وانا اقول ابداااااااااااااااااااا
لاب توبي حبيبي
يقولوا لي ده قدم خلاص وبقا عجوز اقول لهم لالالالالا
ماافرطش فيه خدمني في صغره افرط فيه في شيخوخته
واسيبهم يقطعوه قطع غيار
ده مافيهوش بلوتوث اقل وايه يعني ماانا مركباله بلوتوث خارجي
يقولوا لي ده مافيهوش كاميرا
اقول لهم وانا يعني هصور تمثيلية
يقولوا لي علشان ننزل لك سكاي بي وتشوفي خالوا وتكلميه في بلاد الفرنجة
اقول لهم نوووو ادينا بنكلم بعض في التليفون وبسافر له
والحمد لله ادينا مع بعضينا بكتب لكم من خلاله
وكمان الهارد الجديدة كبيييييييييييره
-------
ندخل علي الاخبار بقا
امبارح كنت في اول شارع مكرم عبيد عند سيتي سنتر لاقيت شباب لابسين صديري اخضر شكل اللي بيلبسوه عساكر المرور ومكتوب عليه الاخوان المسلمين
وبينظموا المرور سألت واحد فيهم خير هو في حد عامل مؤتمر من الاخوان ولا ايه
قال لي لا احنا بنساعد في تنظيم المرور
قلت خير خير
------
شوفوا الخبر ده
مش ده اللي كنت بقوله في البوست اللي فات
ياتري بقا هينتهي الصراع لمين في دول
مصر دلوقتي فيها صراعات بين التيارات المختلفة
(والاشد هيكون بين التيارات ذات الاتجاه الديني)
ده مقال
وده مقال تاني
ياتري البلد رايحة علي فين ؟؟
----------
مش غريبة حبتين تلاته ان اخبار السيدة الفاضلة سوزان مبارك اختفت وماحدش بيجيب سيرتها خااااااااااالص
غموض غير مفهوم
ساعات بحس ان نزول التحرير شئ لابد منه علشان نفكر الناس اللي فوق اللي خدوا الثورة وبينظموا حال البلد دلوقتي
اننا لسه هنا ومصحصحين ومش هنخاف من تهديداتكم وتخوفنا بأمنا الغولة
---------

هناك 27 تعليقًا:

Foxology يقول...

أولا : حمد الله على سلامة اللاب توب :)

ثانيا : المنافسة الشرسة والاتهامات المتبادلة بتكشف قد ايه الناس دى لا مصلحتها البلد ولا الشعب وطظ زى ما قال مرشد الأخوان من سنتين كدة فى مصر واللى فيها :))

ثالثا : اختفاء أخبار الكل (مش ماما سوزان لوحدها) بيخللى الواحد يقلق وشوية بشوية بيتحول القلق لشك وريبة وبعدها على طول بيبقى يقين ... التاريخ بيعيد نفسه وسنة 54 جاية من تانى واللى يعيش يفكر صاحبه :)

تحياتى

Ramy يقول...

أولا حمد الله على سلامة الكمبيوتر


ثانياً انا مش مطمن لموضوع المرشحيين ده ربنا يسترها


ثالثاً عندك حق جداً

هما بيعتمدوا على ان المصرى ذاكرته ضعيفة

ميعرفوش انه كان بيفوت بمزاجه

دلوقت لأ

Tamer Nabil Moussa يقول...

مبروك شمس اصلاح الكمبيوتر

المنافسة مطلوبة مدام باحترام واعطاء فرص لجميع الاطراف

وربنا يصلح حال البلد

مع خالص تحياتى

tarek momen يقول...

سبحان من يحيي الرامات وهي رميم...مبرك شفاء اللاب توب

موناليزا يقول...

مبروك يا حبيبتى على سلامة جهازك:)

وفعلا انا برضه مستغربه ماعدتش فيه أخبار لا عن سوزان ولا عن بقية العائلة

شمس النهار يقول...

Foxology*

الله يسلمك ياابو يوسف قدر ولطف

:))
البلد بلد مين

انت شفت حزب الله بتاع لبنان مش كان مؤيد للثورة في مصر
شوف بقا موقفه من الثورة في سوريا

ناس كتير بقت بتاجر بالدين والمشكلة انك مش قادر تفرق بين اللي مع الله واللي مع نفسه

وشكلها في تحرير قريب بسبب العائلة المالكة

شمس النهار يقول...

*Ramy

الله يسلمك يارامي كلك زوق:)))

اما موضوع المرشحين ده
هيكشف الثمين من الغث

لااعتقد ان الشعب المصري هيفوت اي شئ
بعد كده
وخصوصا حالة الهدوء اللي لاتتفق مع روح الثورة

شمس النهار يقول...

*Tamer Nabil Moussa

الله يبارك فيك ياتامر

كنت خايفة يموت
ده احنا ياما سهرنا سوا
وهو خير صديق في الوحدة

بالنسبة للمرشحين في فرق بين التنافس والتناحر

نفسي يبقا في مناظرات بين التيارات كانوا ابتدوا يعملوا كده وبطلوا ليه مش عارفة

شمس النهار يقول...

tarek momen

لا ياحاج دي مش الرامات
:))
دي الهارد بعيد عنك طارت اي لسعت
اللاب توب حرن ماكنش عايز يقرا اي حاجه في اي حاجه

والحمد لله جت سليمة

شمس النهار يقول...

*موناليزا

الله يبارك فيكي ياحبيبتي
الحمد لله جت سليمة وماحدش قدر يفرق بيني وبين لاب توبي
:))))

Unknown يقول...

السلام عليكم ورحمة الله وبركاته
أحيي هذا الوفاء الذى أصبح فى هذا الزمان عملة نادرة الوجود ......

الإخوان والتيار الإسلامى يعرفون كيف يتقربون من الشعب أما التيار الليبرالى فمازال ماكثاً فى حجراته المكيفة يملؤها صراخاً واعتراضاً وأوهاماً.....

التيار الإسلامى ليس من الملائكة بل هم بشر
مثلى ومثلك ولكن الأضواء الليبرالية مسلطة على مشكلاتهم من أجل تضخيمها وهم يجيدون فعل ذلك......

فى التدوينة السابقة جاءت كلمة مرشح إسلامى ..وكان اعتراضك وقلت أليس الآخرين مسلمين
أود أن أوضح أن هناك فرقاً بين إسلامى ومسلم..
إسلامى بمعنى أنه ذو توجه منبعه الإسلام والكتاب والسنة فكراً وتطبيقاً.
ولكن مسلم وهى تنطبق على جميع المرشحين هم جميعاً مسلمين وإن اختلفت توجهاتهم مع الكتاب والسنة.

آسف على الإطالة ولكن قيمة كتابتك هى دافعى لهذا التطويل
تقبلى تقديرى واحترامى
وبارك الله فيك وأعزك

شمس النهار يقول...

*محمد الجرايحى

شكرا علي مجاملتك اللطيفة

اعجبتني كلماتك عن التيار اللبرالي

هم لايسمعون الاانفسهم
وناسيين ان اللي هينتخب مش بس في القاهرة
ده في جميع المحافظات والقري والنجوع

اللي زي ماحضرتك عارف يسيطر عليهم التدين وسماع كلام سيدنا الشيخ وهم لايعرفون هل الشيخ صح ولا غلط نتيجة الامية

نفسي الناس دول يوصلهم جميع التيارات نفسي الازهر يوصل لهم بالدين الوسط الصحيح

اما موضوع اسلامي ومسلم

حضرتك عارف ان الكلمة تشستخدم لغرض ما وليس للمعني
نحن هنا في البلوجر وتويتر والفيس وكل الناس اللي زينا يعرفوا الفرق
ونقدر نميز بين اللي واخدها لقب واللي يعنيها فعلا

المرشح مرشح والدين مالوش دعوة

وارحب بتعليقات حضرتك وارحب بالنقاش
وارحب بالتعليقات الطويلة فهي تثري البوست

دعاء العطار يقول...

ألف حمدالله على سلامته

والله وحشنااااا .. أيوه هى دى الناس اللى بتتمسك بقديمها

بالنسبه بقى للأخبار

فأنا بصراحه ولا اىىىىىىىىى حد يقدر يتوقع مين حاكم مصر القادم ... ومش عارفه ياترى دى ميزه ولا عيب

اللى عارفاه اننا كلنا مشتتين

دمتى ودامت لنا مصر بخير (:

SHAPE YOUR LIFE (ABOALI) يقول...

مببببببببببببببببببببروك على اللاب يا فندم

انا اللاب بتاعى شرب كوباية شاى بالقرنفل توووووووووومام
وحاليا بيحلى بالقهوة فى التوكيل
دعواتك بقى
وان شاء الله يكون اخر احزان اللاب توب

اما عن سلوك بعض الشباب
فده هاااااااااااااايل ربنا يديم التعاون

ام عن الصراعات بين االاطياف الدينيه

ده شيىء صحى جدا علشان نقدر نحكم ويظهر كل واحد على حقيقته
ام عن السيدة الاولى
فعلا وعن صدق
هناك شيىء غريب يحدث داخل البلاد
تحسى كده انهم عاوزين البلد تبقى مايصة ومش تومام
لسبب غير مفهوم
حبة البطلجية على كام حرامى والمظاهرات الفئوية
حاسس انى الشرطة او الجيش يقدر فى ثوانى يلمهم وعلى الرغم من كده حاسس بالحنان ونوع من انواع ضرب تحت الحزام للكل

بس مادام ربنا موجود وحنا مذكورين فى القراءن ان شاء الله ربنا هايخلينا نكيد الاعادى

مبببببببببببببروك مرة تانية
وان شاء الله الى الاحسن

شمس النهار يقول...

*دعاء العطار


الله يخليكي يادودو

والف شكر ومانجلكيش في حاجه وحشة ياغالية

:))
انا كنت حزييينة عليه اصله عشرة عمر برضوا
:)))

مصر دلوقتي بتمر بدنيا تانيه تحسي ان في مولد وسرك منصوب

بس مااعتقدش ان الشعب المصري المره دي حد هيأكله البلوظة

شمس النهار يقول...

*SHAPE YOUR LIFE (ABOALI)


:))
يانهار ابيض شاي وبالقرنقل كمان

:)))
دي حدثة اقوي من الحدثة بتاعت اللاب توب بتاعي انا الشغالة اللي معايااتضح انها وقعته
:)))
اما حال البلد مش مريحني
فعلا تحس ان في شئ غريب
الدنيا هايصة كده
والناس كلها بتتكلم ومافيش ثبات علي حاجه
واي توقعات بتتطلع غلط
بس انا رغم كل اللي بيحصل متفائله جدااااااااااا

سواح في ملك اللــــــــــــــــــه- يقول...

الف حمد الله علي سلامة اللاب توب بتاعك

احنا كنا فقدنا الامل فيه

بس ايمانك بيه ومساعدتك ليه وهو بعافية

كان عامل اساسي في شفاءه

بالنسبة بقي للرايس غالقادم

في نظري لسة الصورة مبهمة

لــــ زهــــــراء ــــولا يقول...

ست الكل

الف مليون حمد لله على سلامة اللاب توب وربنا يحفظه ويبعد عنه كل انواع الشر

بالنسبه لحال البلد بكل صراحه لا تعليق خلينا نتفرج شويه ...

اما حال طنط سوزى عاااااااااادى برضه كل حاجه بقيت عاديه جدا جدا

ربنا يحفظك ويباركف يكى

زهـــــــراء

Mahmoud Ahmed يقول...

مبروووووووووووووك رجوع اللاب بتوب من جديد
^_^

Haytham Alsayes يقول...

اولا حمد الله علي سلامة اللب توب العزيز ولا ارانا الله مكروها فيه

ثانيا
اعلق علي خبر عبد المنعم ابو الفتوح وحازم ابو اسماعيل
مفيش مانع من التنافس المشروع دة مناخ صحي جدا وجدال الدستور اولا والانتخابات اولا صحي برضه
لكن اللي مش صحي ودى وجهة نظرى ان الاسلاميين يروجوا للانتخابات بالدين
بمعني الشيخ ابو الاشبال اللي عمله دعاية انتخابية واستخدم الدين فيها بقوة وكفر الطرف الاخر ودة طبعا شناعة وقباحة
وطبعا مش معني كدة ان نضع الجميع في سلة واحدة لا خلينا منطقيين وعقلانيين في ناس في التيار السلفي محترمين جدا وعقلانيين جدا بدليل انهم عملوا احزاب ودة كويس اوى علي المستوى البعيد والقريب كمان

ابو الفتوح والاخوان دي بقي مشكلة
عبد المنعم ابو الفتوح من الشخصيات الوطنية المخلصة لا شك في ذلك ابدا محترم واعي وسياسي اكتر من العوا اللي هو مفكر اكتر منه سياسي واكتر من حازم ابو اسماعيل الشيخ البعيد عن دهاليز السياسة لذلك عبد المنعم ابو الفتوح الاكثر منهم حنكة
طيب موضوع مع الاخوان طبيعي جدا
الاخوان بيعانوا من تخبط شديد بعد الثورة لانه مناخ جديد عليهم وبرضه انقسام الجماعة الي تيارين محافظ واصلاحي وطبعا الاخوان بينكروا دة وبيعتبروها مكيدة من الاعلام انه يقسم الجماعة لتيارات ودة اساسا من الغباء السياسي اي فكرة الناس مؤمنة فيها بتختلف بعد شوية دة حتي الدين في اختلاف في وجهات التطبيق والنظر والا مكنش فيه المذاهب الفقهية الاربعة وغيرها
طيب ايه حكاية الفصل دة طبيعي في مسلسل الصراع بين التيارين في الجماعة في ناس عاوزة تحافظ علي الجماعة من التصدع ودة تيار قوى ودة المحافظ وعلي فكرة التيار دة خطر علي الجماعة من وجهة نظرى لانه بيفكر بتفكير ان امن الدجولة لسة موجود
عموما الجماعة داخليا بتعاني بشكل بشع وهنعرف الكلام دة في ايام قادمة وبدأت اهي
الاسلاميين عموما مستقبلهم في مصر كويس لكن الجماعة الاخوانية هي اللي هتعاني التفتت ويمكن موضح الوجهة دي في بوستي الاخير

معلش انا بتكلم كتير مش عارف ليه
هههههههههه
بس يمكن الاحداث بتحتم عليا كدة


تحياتي :)

mrmr يقول...

حمد الله على سلامه اللاب

امور كتيره بقيت غريبه فى بلدنا محتاجه تفسير لكن باذن الله مع الوقت كل شئ ح ينكشف ويبان

سامحينى على التقصير اصلى عندى امتحانات

غير معرف يقول...

http://www.elbashayer.com/tv-10704.html

شمس النهار يقول...

*سواح في ملك الله

انا مافقدش الامل ياسواح
انا كنت عارفة ان فيتر وهيقوم منها صاغ سليم

ووقوفي جنبه وايماني بيه
كان عامل اساسي
برضوا الحالة النفسيه للريض عليها عمل
:)))))))
:)))))

شمس النهار يقول...

*لـــولا وزهـــراء

:))
شكرا ليكي يازهرة

وربنا مايوريكي مكروه في اي لاب توب

ده فراقة صعب
ده هو اللي بيونسني
:)))))))

شمس النهار يقول...

* سبايدرمان

شكرا يادكتور الف شكر

وعلي فكرة عملت نظام حكاوي
:))

شمس النهار يقول...

*Haytham Alsayes

ماشاء الله عليك ياهيثم ايه الجمال ده
محلل سياسي من الدرجة الاولي

وبعدين اتكلم براحتك انت علي نظام حكاوي
:))))))))))

لو كل الكلام كده اتكلم ونورنا وبرضوا هنقلها علي الفيس

شمس النهار يقول...

*mrmr

الله يسلمك ياجميلة وحشتيني

اخبار الثانوية العامة ايه يارب يكون خير
هاااااانت ياجميلة