الثلاثاء، 21 يونيو 2011

مانشت


ده لينك مدونة مش هنسكت
مدونة رائعة مواضيعها دسمة فيها موضوع الان رائع
----------
في برنامج مانشت علي اون تي في
كان في مداخلة من دكتور عاصم عبد المجيد متحدث بأسم الجماعة الاسلامية
الحوار كان عن ان اعضاء الجماعة مش هيشتركوا في برنامج تكون المذيعة سافرة
اي لابد ان تكون محجبة
وقال انهم لايفرضوا علي احد الحجاب
لكن ده قرار شرعي من الجماعة لأن الحجاب فرض شرعي
لحد هنا مافيش مشكلة
واستشهد بأن بابا الفاتيكان لايستقبل اي سيدة الا واضعه غطاء رأس
وان سوزان مبارك عدوة الحجاب
لما راحت الفاتيكان وضعت غطاء رأس في المقابلة اللي تمت بينهم
ولحد هنا برضوا جميل
لكن اللي مش جميل بقا
ان الدكتور عاصم لما المذيع سأله هل توافق الجماعة علي ان تكون المراه رئيس جمهورية
قال ايييييييييييييه؟؟
مافيش حد عاقل في الدنيا يوافق علي ان تكون المراه رئيس للجمهورية
وده غلط شرعا توليت المراه
وكرر مافيش حد عاقل في العالم اكتر من مره
وكمان استشهد بأمريكا ام الحريات عمرها ماكان لها رئيس جمهورية ست
ولما المذيع قال له هيلاري كلينتون كانت مرشحة
قال له طيب ماالشعب الامريكي مااخترهاش
لايمكن هذا المخلوق الضعيف يكون رئيس جمهورية
وكان منفعل جدااااااااااا
مش عارفة في ايه مال الاخ عاصم زعلان ليه كده
عجبني الدكتور عبد المنعم ابو الفتوح لما اتسأل السؤال ده رد بذكاء شديد
قال في فرق بين الولاية لدولة اسلامية زي زمان ايام الدولة الاسلامية
وان الخليفة كان له مهام الولاية الشرعية
وبين رئيس الدولة الان اللي بيقود مؤسسات
يعني مابيأمش المصليين مثلا
ولا يتقدم الصفوف في الحرب
ده موقع سياسي وظيفي
يعني الدنيا سهله اهو يادكتور عاصم مش محتاجه ده كله منك
ولا اييييييييه
؟؟؟؟؟
ومش شايفة اي ست تقدمت لحد دلوقتي بصورة جدية للترشح
---------
وفي نفس البرنامج
استضاف الدكتور شوقي السيد
عضو المجلس الاعلي للصحافة
اللي المفروض انه خلاااااص
المدة بتاعته خلصت بقاله سبع شهور
والجميل بقا ان الاعضاء بيروح لهم شيكات المهايا الي الان
وقيمة الماهية الواحدة 4000جنيه
دكتور شوقي جه البرنامج ومعاه الشيكات اللي مستحرم يصرفها
وتفاصيل الموضوع هنا
عدد اعضاء المجلس79
نضربهم في 4000
دون وجه حق والدكتور بيقول لم يجتمعوا مره واحدة خلال السبع اشهر
وكمان الاعضاء المفرض انهم من منهم في السجن
ومن منهم اتشال من رئاسة الجرائد
وطبعا انتوا عارفين كان مين رئيس المجلس الاعلي للصحافة
؟؟؟؟؟
:)))))
صفوت الشريف جداااااااااااا
:))))

هناك 26 تعليقًا:

beautiful mind يقول...

مش اعرف اقول ايه
بس انا هقول رايي بصراحه شديده
انا مع الكلام اللي راجل قاله
ودا مش تعصب لا سمح الله
انما انا قريت حديث للرسول صلي الله عليه وسلم فيما معناه لعن الله قوما حكمتهم امراءه
اعتقد ان كل واحد ربنا خلقه لمهمه
والرئاسه عمرها ماكانت من صفات المرأه
دا رايي المتواضع
تقبلي حالص التحيات

سواح في ملك اللــــــــــــــــــه- يقول...

صباح الفل

انا مش هقول رايي

انا هعرض راي مخلوق ضعيف من مخلوقات الله في

الحكاية دي

وهو شايف ان الحكاية دي ضد الفطرة

فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِطْ بِهِ وَجِئْتُكَ مِن سَبَإٍ بِنَبَإٍ يَقِينٍ
إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ
وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لا يَهْتَدُونَ

تحيتي

شمس النهار يقول...

*beautiful mind

علي فكرة انا لااصادر علي راي احد
لكن مش علشان اقول راي اغلط في العالم كله
في دول الملكة ست والرئيسة ست ورئيسة الوزراء ست يعني دول كلهم في نظرة مجانين
والحديث اللي بتقول عليه كان في ابنت اعتقد كسري وكانت عندها تخلف عقلي
وولوها امرهم بعد موته
والصح (لن يفلح قوما)
وزي ماقلت الولاية غير الرئاسة بمفهمها الحالي
:))
وبعدين ماكان الاسم ريس واللي بتحكمنا سوزي
:))))

شمس النهار يقول...

*عندما تبعثر رسائلك

انا رحت وعلقت هناك والغريب ان المدونة من السنة اللي فاتت ومافيهاش غير البوست ده

شمس النهار يقول...

*سواح في ملك الله

صباح الفل

مافهمتش الربط
بس اللي اعرفة ان بلقيس ملكة سبأ
كانت ملكة رشيدة وبالنص من القران انها ماكانتش تقطع امر من غير ماتاخد راي مجلس الشوري بتاعها
وكانت المملكة من اجمل الممالك

فاياريت توضح لي وجهة نظرك
:))

tarek momen يقول...

يعني سؤال لو سمحتي هو انتوا ناقصين رئاسة
اسألي اي راجل ماشي في الشارع مين الحكومة يقول لك المدام اللي في البيت
ثم مين اللي كان بيمشي البلد في فترة المخلوع مش الست ام عيلاء و كل المصايب اللي وقعته فيها علشان خاطر ننوس عين امه جمال
والنبي تقعدي علي جنب هو احنا مستقرين علي رئيس لما كمان هايطلع لنا رئيسة

طهر فؤادك يقول...

السلام عليكم ورحمة الله وبركاتة

اخبارك اية وربنا يكرمك يارب والمسلمين
وانا بحترم حضرتك جدااا وسواء نتفق او نختلف دى سنة الحياة اما عن تولى المراة الرئاسة وانا شايف دة الموضوع الى جميع التعليقات مركزة علية فانا قريت فى موقع اسلام ويب ودة موقع بحترمة جدا ومعروف فتوى ودة السؤال :-
هل يجوز للمرأة الترشح للرئاسة؟ وإن كان لا يجوز فكيف كانت الملكة بلقيس ملكة على بلد بأكمله؟ وهل يجوز العمل للمرأة بصفة عامة دون ضرورة؟

والاجابة على الرابط :
http://www.islamweb.net/fatwa/index.php?page=showfatwa&lang=A&Id=152391&Option=FatwaId

وفى الاول ولاخر ندعى انا ربنا يولي علينا خيارنا اللهم امين والمسلمين

شمس النهار يقول...

*tarek momen

:))))))

في ايه بس ياحاج طارق
:))))

مالك بس ده حتي الستات لو مسكوا البلد انت عارف هتتربط وتتظبط زي مامربطين ومظبتين البيوت
:))))))

شمس النهار يقول...

*طهر فؤادك

وعليكم السلام ورحمة الله وبركاته

اشكرك علي كلامك وتعليقك اللطيف

وهروح اشوف الكلام هناك والاجابة

سرني مرورك

Amira Yusuf يقول...

انا مع رأيه بس ضد أسلوبه

دعاء العطار يقول...

لازال فيه عقول مصره إنها تنظر للمرأه بنظره دونيه

وكأنها نصف كائن مش كائن كامل

أنا مش بتكلم عن موضوع حك المرأه لأنى مقدرشى أفتى فيه لكن عجبنى جداً رأى ان فيه فرق بين الخلافه والولايه وبين الرئاسه كوظيفه

دمتى بكل خير (:

الازهرى يقول...

مافيش حد عاقل في الدنيا يوافق علي ان تكون المراه رئيس للجمهورية

يسلم فمك يا أستاذ خليفة
راجل بيفهم بصحيح

يعن منغصين علينا كل الوظايف حتى الشغلانة دى مش عايزين تسيبونا ناكل منها عيش واحنا مستريحين ؟

ربنا على الظالم والمفترى
ربنا على الظالم والمفترى
ربنا على الظالم والمفترى
ربنا على الظالم والمفترى
ربنا على الظالم والمفترى
ربنا على الظالم والمفترى
ربنا على الظالم والمفترى
ربنا على الظالم والمفترى


ربنا يهدينا يا رب ونفض بقى لمصر بعيد عن لعب العيال ده

غير معرف يقول...

هو شيف انها مخلوق ضعيف .... فنحاول نثبتله انها قويه بقا :)

وموضوع ولايه المرأه دي فيها خلاف على حسب ما قريت بعض أراء

شمس النهار يقول...

*mira@

:))
اوك
لاقاله بنوته تتفق معاه اهو علشانمايقولوش اننا مش ديمقراطيين

:))))

شمس النهار يقول...

*دعاء العطار

ايوة يادودو دي موضه كله يقول لك المراة ضعيفة
المراة مش عارف ايه
وكلام غريب مريب

وتقري في السيرة العطرة تلاقي المراه كان لها دور كبييييير جدا
زي مثلا في الهجرة مين اللي كان بيروح لحبيبنا المصطفي وسيدنا ابو بكر
مش اسماء
طيب الطريق كان عامل ازاي
كان طريق صعب
كمان الرسول امنها علي هذا السر العظيم
والامثلة كثيرة
:))
بس اللي يستوعب

شمس النهار يقول...

*الازهرى

:))))))

تصدق مش انت غايب بقالك فتره
بس قلت البوست ده لازم انت تعلق عليه

ابني وعااااااااارفااااااه
:)))))

فرصتك ان البنوتات الحلوين غايبين كانوا ردوا عليك
بتدعي عليهم ونبي لقول لهم
:)))

شمس النهار يقول...

*فتاه من الصعيد

ايوة كده الصعايدة وصلوا

ماتسيبونيش لوحدي هنا مع البوست ده

:)))))))

أمل حمدي يقول...

أنا خارج نطاق السياسة بس حبيت أسلم على ست الكل

الازهرى يقول...

وربنا مظلوم يا بيه

أنا موجود مش غايب
بس الامتحانات
مع حكاية تدوينة كل يوم اللى انتم عاملينها دى
مخليانى خلاااااااااص
قربت انفجر
واللى يفقع المرارة إن مفيش راجل مشترك فيها
كل اللى عمالين يرغو من اللى بالك فيهم

فقربت انفجر بحق ربنا

وكمان بلغيهم
احنا وقفنا وضربنا كل د علشان نخاف منهم ولا إيه
لااااااااااااا
عهد الخوف انتهى

أى حركة غدر منهمباسبورى وعلى مارسيليا عدل أقضى فيها باقى القرن اللى فاضل من عمرى

mrmr يقول...

راى عدم تولى سيده منصب رئيس جمهوريه ده راى كثيرين لان المجتمع الشرقى لا يومن بحقوق المراه
ولسه فى كتير بيبص للمراه انها خلقت من اجل خدمه الرجل يعنى عايزين عصر سى السيد يرجع من تانى

tarek momen يقول...

شمس النهار
لاحظت حاجة غريبة علي مدونة نوارة فيه تعليق من مدونة بت خيخة و لما ضغطت علي اللينك روحت لمدونة غريبة بتدافع عن مبارك المخلوع و منزلة 351 بوست خلال شهرين جربي تخشي علي المدونة دي و اذا كنتي تعرفي صاحبة المدونة الأصلية افهمي منها ازاي المدونة اتسرقت لحساب ناس تانية
الموضوع مهم

شمس النهار يقول...

*ماما أمولة

اهلا بيكي تسلمي لي ياجميلة

تنوريني في كل وقت

شمس النهار يقول...

*الازهرى

ده قر ولا نق ياازهري الله اكبر النهاردة الخميس والبنات في البلوجر عاملين احلي شغل


:))
عملتوا انتو ايه بقا

:))))))
مارسيلياااااااا
ماشي ياازهري هاجر علي مارسيليا يعني هي مافيهاش نت

:)))))))))

شمس النهار يقول...

*mrmr

عصر سي السيد

ده في المشمش يامرمر

:)))

عموما رئيسة جمهورية مش رئيسة جمهورية
نحن نصف المجتمع

:)))))

شمس النهار يقول...

*tarek momen

لا بنت خيخة اصلا مابتقبلش اسم اللامبارك هروح اشوف ايه الموضوع

هو البلوجر هيبتدي فيه اللعب هو كمان انت عارف ان صفحة ايد سعاد الفيس قفلها

عندما تبعثر رسائلك يقول...
أزال المؤلف هذا التعليق.