الجمعة، 24 يونيو 2011

المهر

كلمتني صديقة عزيزة جدااااااا علي وكانت منزعجة

الحقيني شكل جوزي هيفركش الجوازة

ليه بس في ايه ان شاء الله خير
قالت لي ابوها مصر يكتب المهر في القسيمة جنيه مصري واحد نظير ان الولد مايكتبش قايمة
قلت لها جميل وبعدين
ابو الولد بيقول :يعني ايه ادفع المهر ده كله ومايتكتبش افرض انهم ماتوفقوش يضيع علينا المهر
يرد ابوها: يعني ايه اجهز ده كله واحط فوق مهركم مرتين وتاخدوا بنتي وبعد شوية ترجعوها ويضيع علينا كل الفلوس دي
يرد ابوه :طيب هنكتب لك قايمة بالحاجات
يرد ابوها :ايه اللي هيفيد بنتي من شوية كراكيب
انا:الي اخر الحوار الغريب السخيف اللي بيتكرر في كل جوازة علي ارض مصر
بصرحة تحولت اي جوازة لمباراة في موضوع المهر والقايمة والمؤخر
اساس المهر ان تأخذه العروس حق لها
والزوج هو اللي بيأسس منزل الزوجة
المصريين اخترعوا ايه بقا علشان الحالة الاقتصادية وعلشان همه عجبه حبتين
العروسة تاخد المهر وتجهز بيه وفوقه حبتين تلاته كمان
والغريب بقا ان المؤخر في اغلب
لا
السواد الاعظم من حالات الطلاق لايدفع المؤخر للمطلقة
بالرغم انه دين علي الزوج الي يوم الدين
واذا توفي وهي علي زمته بيأخذ من التركة
وبعدها تقسم
وفي مصر ام العجايب الارملة بترفع بيه قضية علي الورثة
اللي في الغالب بيكونوا هي واولادها وطبعا بتكسبها
وبتاخد المؤخر من التركة وبعدها باقي التركة بتتقسم حسب الشرع
قلت لها احتكموا لحد من الشيوخ الازهريين وان شاء الله خير
وبصراحة لازم اهل العريس يكونوا اكتر منكم حفاظا علي حق العروسة ويتبعوا حدود الله علشان دي حقوق كل طرف هيتحاسب امام الله علي مااعطي ومااخذ
ومش منطقي ان العريس اللي بعد كده بيبقي الكبتن المخلوع
يتجوز ويخلف وهو ماشي ياخد المهر بتاعه كمان
وماحدش يقول لي ده الشرع
لالالالالا
الشرع ان الزوج يكون زي الفل وعلي خلق ومتدين وطيب ولاتعيب عليه ازوجة عيب
وهي اللي عايزة تطلق علشان مش بتحبه او متوافقه معاه
هنا بقا تفتدي نفسها وتديه مهره وتخلع
لكن مش الزوج يطلع روح زوجته ويسود عيشتها والمسكينة علشان تشتري نفسها
ياتخلع وتديه مهره
ياتبريه وتتنازل عن المؤخر
بجد المصريين بجد محتاجين ان الخطاب الديني في الحتة دي يتظبط شويتين تلاته
انتوا ايه رأيكم
؟؟؟؟؟؟

هناك 35 تعليقًا:

mrmr يقول...

صباحك فل يا شمس الشموسه

انا مش بعرف فى موضوع المهر
لكن الموضوع عايز توعيه بين الاسر وبعضها وخصوصا اللى عندهم شباب مقدمين على الزواج

ربنا يفرح قلوب كل الشباب ويعينهم ويساعدهم على اعباء الزواج

دعاء العطار يقول...

أنا بصراحه بشوف دايماً إن الماديات مش ضامن لأى حاجه

لأن لو حصل لاقدر الله طلاق ... البنت مش بيعوضها أى ماديات لأن ده بيبقى جرح كبير أوى

أعتقد ان الضامن الوحيد انها " تختار صح "

لما تختار صح مش هتحتاج انها تفكر فى قايمه ولا مهر ولا مؤخر ولا شبكه ولا أى حاجه من دى

عشان هتبقى حاسه بالأمان لأنها مع بنى أدم بيتقى ربنا

" إن أحبها أكرمها ... وإن كرهها لم يهنها "

مشكلتنا بقى فى مواضيع الجواز دى اننا قبل ماتتم الجوازه بنفكر فى الطلاق وبتتحول العيلتين لخصمين

ده جواز ياجماعه مش حررررررب

ده رأى المتواضع ... واتمنى يكون تفكيرى صح (: (:

Unknown يقول...

أنا شايفه ان الناس اللي بتبقى باقيه على بعض ما بيدققوش في الكلام ده أنا كتير شوفت جوازات تمت من غير خلافات كبيره و كله كان بيعدي عشان الناس شاريه بعض, و أغلب اللي كانوا بيدققوا على القايمه و المهر و الكلام ده كانوا بيسيبوا بعض لأن أساساً مفيش توافق من الأول, واحد من الطرفين بينشف دماغه لأنه مش مقتنع بالجوازه...تلاكيك يعني.

ربنا يسهلهم الأمور و يهديهم لما فيه خير
تحياتي لحضرتك

Foxology يقول...

الأهم من الدين والخطاب الدينى ... حديث العقل مهو انا كزوج لازم يبقى عندى دم واحساس متجوز واحدة بنت ناس كويسين ومستخسر فيها المهر ؟؟ اهلها هيستأمنونى على حتة منهم وانا مش هستأمنهم على ورقة القايمة وخايف امضى عليها ؟؟؟

الناس بقت دماغها شغالة فى الفلوس وبسسسس

بشوف كل يوم عينات من البشر دى

ربنا يرحمنا برحمته

تحياتى

Amira Yusuf يقول...

وانا صغيره كنت فاكره الدنيا وردي
وقال ايه هيجي اللي يحبني ويفديني بكل حاجه
طلع الجواز ده معضله كبيره
ولو حاجه اتفركشت بيكون بعد ما البنوته البريئه حلمت مليون حلم وخططت لحياه كامله على أمل انها خلاص هتبني بيت
وفالآخر يحصل خلافات والبيه العريس يفلسع اصله مش شايفها تستاهل ده كله
بجد بجد فعلا المصريين عاوزين اعادة تأهيل نفسي في شئون الجواز دي

Tamer Nabil Moussa يقول...

والله ياشمس الموضوع دة بحس ان الطرفين بيكون نظرة التعامل فية على انة بيعة وشروة

مش اساس بيت واستقرار

لازم كل طرف يعرف مالة وما علية

وخير الامور الوسط

لكن من البداية ويكون كدة التعامل افرض طلاق افرض مش عارف اية

فين الثقة

ربنا يصلح الحال

مع خالص تحياتى

givara يقول...

طب اقولك انا على موقف شخصى
انا لما جيت اتجوز مدفعتش مهر لأن انا اللى جهزت كل حاجه من الالف الى الياء وبررده مش عايزين ننكر دورها لأحسن الرد يقع فى ايديها
المهم اتجوزنا وكان المهر ربع جنيه تقريبا حاجه زى كده
والمؤخر مبلغ محترم وطبعا فى قايمة منقولات اللى مفروض انا جايبها متنسوش دى
فى وسط الزواج عملت زى ما ابويا عمل وقال لمراته اللى هيا امى مؤخرك اهو يا حاه الواحد مش ضامن الموت من الحياه
رحت انا عامل زيه كنت قابض جمعيه مع جماعه صحابى ورحت واخدها من ايديها وجبتلها بقيمة مبلغ المؤخر ذهب
ده هيا عشان مرديتش تاخد فلوس
تمام كده حد تاه منى؟؟
يعنى انا مدفعتش مهر وجبت كل حاجه ومضيت على قايمه بضعف كل حاجه ومراتى خدت مؤخرها
جه موضوع زعل كبير بينى وبينهاوصل لحد تدخل الاهل
ايه اللى حصل
لقيتهم عايزين قايمة المنقولات اللى فى الاصل نصها مش موجود وكمان المؤخر
طبعا انا لفت بيا الدنيا لما عرفت
اللى انتو بقى متعرفهوش
ان مراتى بعتت الذهب اللى انا اشتريته اللى هو قيمة المؤخر من ورا اهلها
عشان اخوها ميعرفش يعمل راجل عليا
ويفهم الناس انى معييش
طبعا هيا بالموقف ده خلتنى اروح زاحف ليها
وقلت انى كنت غلطان بالرغم من انه لأ
وايه رأيكم كمان
ان فى مره من المرات بقولها (اللى هيا مراتى) ان الموقف اللى انت عملتيه معايا ده خلانى اعيد كل حساباتى
الا انها ردت عليا
دى كانت حركه عشان تيجى تصلحنى
فى النهايه اللى بيبقى شارى بيشترى
واللى بيبقى بايع بيبيع وببلاش
انتهى

givara يقول...

طب اقولك انا على موقف شخصى
انا لما جيت اتجوز مدفعتش مهر لأن انا اللى جهزت كل حاجه من الالف الى الياء وبررده مش عايزين ننكر دورها لأحسن الرد يقع فى ايديها
المهم اتجوزنا وكان المهر ربع جنيه تقريبا حاجه زى كده
والمؤخر مبلغ محترم وطبعا فى قايمة منقولات اللى مفروض انا جايبها متنسوش دى
فى وسط الزواج عملت زى ما ابويا عمل وقال لمراته اللى هيا امى مؤخرك اهو يا حاه الواحد مش ضامن الموت من الحياه
رحت انا عامل زيه كنت قابض جمعيه مع جماعه صحابى ورحت واخدها من ايديها وجبتلها بقيمة مبلغ المؤخر ذهب
ده هيا عشان مرديتش تاخد فلوس
تمام كده حد تاه منى؟؟
يعنى انا مدفعتش مهر وجبت كل حاجه ومضيت على قايمه بضعف كل حاجه ومراتى خدت مؤخرها
جه موضوع زعل كبير بينى وبينهاوصل لحد تدخل الاهل
ايه اللى حصل
لقيتهم عايزين قايمة المنقولات اللى فى الاصل نصها مش موجود وكمان المؤخر
طبعا انا لفت بيا الدنيا لما عرفت
اللى انتو بقى متعرفهوش
ان مراتى بعتت الذهب اللى انا اشتريته اللى هو قيمة المؤخر من ورا اهلها
عشان اخوها ميعرفش يعمل راجل عليا
ويفهم الناس انى معييش
طبعا هيا بالموقف ده خلتنى اروح زاحف ليها
وقلت انى كنت غلطان بالرغم من انه لأ
وايه رأيكم كمان
ان فى مره من المرات بقولها (اللى هيا مراتى) ان الموقف اللى انت عملتيه معايا ده خلانى اعيد كل حساباتى
الا انها ردت عليا
دى كانت حركه عشان تيجى تصلحنى
فى النهايه اللى بيبقى شارى بيشترى
واللى بيبقى بايع بيبيع وببلاش
انتهى

موناليزا يقول...

قوليلهم كمان
وكله كون والناس اللى بتفتى دى كوم تانى
فكرتينى بواحدة بتحكيلى على مشكلة واحدة صاحبتنا
فقالت لى هو المفروض بعد الطلاق اللى جاب حاجة ياخدها
اتنرفزت عليها اوى وقلت لها وده فى شرع مين؟؟
هو كان خاطبها والمفروض ترجع له هداياه!!
دى كانت زوجة يعنى اللى هو جايبه ده من مهرها وحقها الطبيعى انها تاخد مهرها

بجد اوحش فى المصريين انهم بيقلدوا بعض من غير تفكير

دلؤتى لو ابو العروسة مثلا ما جابش ليها الدِش والتكييف الجوازة تبوظ
رغم ان ابو الزوجة مش ملزم أصلاً بحاجة
لو ساعد فبيكون ذوقياً يعنى منه وكهدية منه لبنته لكن احنا عندنا طبعا الوضع مختلف

Haytham Alsayes يقول...

ممممممم

انا رأى ان افضل كدة
مالو كدة
الجواز دلوقتي بقي رفاهية
لا اقدر عليها انا وامثالي من جموع الشعب العاطل
!!

حمدى جعوان يقول...

محتاجين ثورة على كل حاجه فى حياتنا

تحيااااتى

الاحلام يقول...

شمس النهار
الزواج لابد ان يكون مكبنى على شيئان
الموده والرحمه ان تواجدوا فالزواج ان شاء الله سوف يدوم ووالد الفتاه لابد ان يختار لابنه الانسان التذى يتحلى بالموده والرحمه ووالد الابن لابد ان يختار لابنه فتاه متدينه فاظفر بذات الدين
ليس للمال صله بين هذا وذاك فانه فقط وسيله للاعاشه المريحه التى تعيننا على شكر الله سبحانه وتعالى
دمتى بكل خير تقبلى تحياتى الاحــــلام

أحــوال الهـوي يقول...

الموضوغ كله ينحصر حول تقوي الله و مراعاة حقوق الغير

و الخوف من الظلم و الحرص علي ابنائنا باختيار الافضل بصرف النظر عن غناه او فقره

عجبني جدا تعليق جيفارا لما فيه من صدق

اللهم اصلح شبابنا و شباتنا


تحياتي

Tarkieb يقول...

طب انت عارفة ان في افغانستان دلوقتي بيعملو افراح تكفي لجواز حي السيدة والحسين مع انه شعب مش لاقي ياكل...تقريبا كدة كل ما الفقر يكتر بيكتر التزمت والقوايم والكلام الفاضي

عبدالحميد خطاب يقول...

فعلا محتاجين الموضوع ده يتظبط والله
بقت مأسأة

شمس النهار يقول...

*mrmr
صباح الياسمين

ايوة الموضوع عايز تغيير كبير في العقليات

الغريب ان الناس بتكيل بمكيالين
يعني ابو الولد ده لو بنته هي اللي بتتجوز تلاقي انقلب وبقا بيدور علي حق بنته

:)

شمس النهار يقول...

* دعاء العطار

تفكيرك صح ميه ميه
بس الواقع بقا غير

كام قصة حب وزواج بتنتهي في المحاكم
واكل حقوق

وفي النهاية سبحان مقلب القلوب

المصريين لما بيطلقوا او يختلفوا لايجيدوا فن الخلاف
وفعلا بتبقا حرب

شمس النهار يقول...

*شيرين سامي

كلامك صح بس لكل حالة ظروفها

وكمان في ناس مادققش ولما اختلفوا طرف اكل حق طرف

وبرضوا من منطلق الحرب واللي معانا معانا واللي مش معانا يبقا عدونا

شمس النهار يقول...

* Foxology

ربنا يكرمك ياابو يوسف

كلامك صح الصح

وده تفكير الشاب اللي بيتقي ربه

ومن يتق الله يجعل له مخرجا ويرزقه من حيث لايحتسب

شمس النهار يقول...

*mira@

مش عارفة ليه ضحكت اوي وانا بقرا التعليق بتاعك

يمكن علشان البيه العريس اللي فلسع ده وفاكر ان العروسة ماتستاهلش ده كله

مش عارف انه عمل فيها جميل ان فلسع
علشان عريس تفكيره كده قلته احسن

:))

شمس النهار يقول...

*Tamer Nabil Moussa

كلامك ده جميل

عارف منين تيجي الثقة
لما نرجع للشرع اللي بيحصن اي علاقة
لو رجعنا لشرع ربنا
هنلاقي الدنيا زي الفل سواء في الزواج او الطلاق

شمس النهار يقول...

* givara

ربنا يكرمك ويجازيك كل خير

عارف علشان انت اتقيت الله فيها
وعملت شرع ربنا

وفعلت

من يتقي الله يجعل له مخرجا ويرزقه من حيث لايحتسب

انت اتقيت الله جعل لك مخرج باللي عملته معاك مراتك
ورزقك من حيث لاتحتسب كمان

بس بجد مراتك ست الستات باللي عملته
وعلشان اتقت الله فيك
ربنا كرمها
ربنا يبارك لكم وعليكم

شمس النهار يقول...

*موناليزا

منظومة الزواج كلها في مصر عايزة تترتب من جديد
مفاهيم غلك
في بنات فاهمه الزواج غلط

وفي شباب فاهم الزواج غلط

ياريت يعملوا دورات عن الزواج في الاسلام
ويقروا الرسول وزوجاته كانوا بيعملوا ايه

شمس النهار يقول...

*Haytham Alsayes

:)))

دوام الحال من المحال

ان شاء الله تتجوز بنت ولا كل البنات

هتتجوز هتتجوز

اصل ده شر لابد منه
:))))

شمس النهار يقول...

*حمدى جعوان

:))

لا الموضوع ده عايز انقلاب مش هتنفع فيه ثورة

ولازم يكون انقلاب دموي
:))

شمس النهار يقول...

*الاحلام

الزواج الان بقا فعلا بيعه وشروة
والسبب الحياة الاقتصادية

اهل الشاب بيفحتوا في الصخر علشان يجوزوه
وبيخافوا ان الجوازة تبوظ والسبب نسب الطلاق العالية الان

وكذلك اهل البنت بيفحتوا في الصخر علشان يكملوا علي المهر ويجوزوا بنتهم
وبيخافوا الزواجة تفشل وبنتهم ترجع لهم مطلقة وكمان خسرانه كل شئ

شمس النهار يقول...

*أحــوال الهـوي

بالظبط تقوي الله اللي هي قوام كل شئ في الحياة علي وجه الارض

عارف مشاكل الفلوس دي بقت بتحصل مع الفقراء والاغنياء

وفعلا تعليق جيفارة ماشاء الله جميل

شمس النهار يقول...

*Tarkieb

صدقني الكلام ده بيحصل في الوسط الغني والوسط الفقير

ده اسلوب وتركيبة شعب

شمس النهار يقول...

* حميد

مايظبطوش غير الرجوع للشرع
الرجوع للكتالوج

givara يقول...

اشكرك يا شمس النهار
اشكرك بشده

Bent Men ElZman Da !! يقول...

انا مش اعرف كتير عن حكايه المهر دى
واول مره اسمع اصلا ان حتى لو الزوج مات بياخد المؤخر من التركه جديده دى عليا رغم انى دارسه موضوع التركه ده

بشكل عام وبخلاف المسميات الجواز دلوقتى فى مصر بقى مادى بطريقه غريبه
الاهل بيفكروا فى الفلوس اولا واخيرا
ومش بيستوعبوا ان الجوازه دى لو فشلت الفلوس مش هتنفعهم فى حاجه ابدا

لو كان الزوج انسان محترم وهيراعى ربنا فيها يبقى الموضوع مش محتاج ضمانات بفلوس
لان الفلوس مش هتبقى هى تمن سعاده البنت
ولا الفلوس هى اللى هتبنى حياه سعيده

شمس النهار يقول...

*givara

الشكر لله
وفعلا الطيبون للطيبات

شمس النهار يقول...

*Bent Men ElZaman Da !!

:))
فكرتيني بالمثل اللي بيقول ياواخد القرد علي ماله بكره المال يروح ويفضل القرد علي حاله

موضوع المؤخر ده لسه عاملينه لصديقة ليه وفعلا اخدت المؤخر

عندما تبعثر رسائلك يقول...
أزال المؤلف هذا التعليق.
مونتي بوكيه ورد يقول...

انا مع دعاء العطار و افكاركم الايجابيه
أنا بصراحه بشوف دايماً إن الماديات مش ضامن لأى حاجه

لأن لو حصل لاقدر الله طلاق ... البنت مش بيعوضها أى ماديات لأن ده بيبقى جرح كبير أوى

أعتقد ان الضامن الوحيد انها " تختار صح "

لما تختار صح مش هتحتاج انها تفكر فى قايمه ولا مهر ولا مؤخر ولا شبكه ولا أى حاجه من دى

عشان هتبقى حاسه بالأمان لأنها مع بنى أدم بيتقى ربنا

" إن أحبها أكرمها ... وإن كرهها لم يهنها "


انا كنت فاكر ان العريس لما بييج يتجوز بيختار وبس وهو ال بيعمل كل حاجه ومبيدفعش حبيبته اي حاجه كفايه انه لقي الانسانه ال تحبه وتصونه وهو دا الكنز ال يستحق كل شيء
عاوز اكمل بس ارجع من عند دكتور الاسنان ان شاء الله