الأربعاء، 29 يونيو 2011

تااااااااااااني ياشرطة

الحل للوضع الان
ياشرطة اطلعوا باللي عمل الليلة دي واعتذروا للشعب
والظابط اللي شتم امبارح في الميكريفون يتعرف
ويتحاكم والشعب يعرف
============
في عرض دين النبي الشعب يريد اسقاط النظام
وتاني ياشرطة تاني
بتضربوا الشعب تاني
هو احنا خلصنا من الاولاني علشان نبتدي تاني
مش حزرتكم وقلت لكم الحل في البوست ده من زمان
كان زمنا اتصالحنا وخلصنا
لكن واضح ان جهاز الشرطة عندنا من بلد اخر ليس علي كوكب الارض
بحس في الفديوهات اللي جاية من التحرير ان دي غزة فرع التحرير
ليه العنف الشديد ده يعني ايه تضرب متظاهر بالمنظر ده
ونرجع بقا للفيلم من الاول
جمعية(مع العلم ان جميع الجمعيات الاهلية والخيرية والتعاونية كانت تتبع المدام سوزان)
تحب تكرم اهالي الشهداء في مسرح البالون مااعرفش باقي اهالي الشهداء عرفوا منين راحوا مأجرين تلات اوتوبيسات وياله هيلا بيلا علي مسرح البلون اشمعنا احنا يحاولوا يدخلوا الامن ماارضاش ليه مش عارفة
المهم يروحوا هوووووبا داخلين المسرح ومكسرين الدنيا بالعصيان اللي معاهم
(لطاف اوي اهالي الشهداء اللي رايحين عايزين يتكرموا ومعاهم عصيان دول)
وبعد كده يلموا نفسهم هيلا بيلا تاني ورايحين علي الداخلية عدل
ويضربوا الشرطة هناك
وتحصل هوجه ويخطلت الحابل بالنابل
وبعد كده يقول لك بلطجية
حد صدق الكلام اللي كتبته فوق ده
مش حاسين ان في حاجه غلط كده وان السيناريوا هابط حبتين
عموما البلطجية دول اللي ابتدوا القصة انتوا اللي عملتوهم ياشرطة سايبة
والبلطجية دول انتوا اللي سايبنهم للنهارده مامسكتوهمش علشان تستخدموهم وقت ماتحبوا
تقدروا تقولوا لي ايه البلطجي الوطني ده اللي يفرح بالشهادة ويتصدي للشرطة المسلحة وهو اعزل الا من طوبة ان لاقاها
حسبي الله ونعم الوكيل
اللي بيحصل ده نتيجة التهاااااااااون بدماء الشهداء
نتيجة اخبار مبارك المستفزة
نتيجة المحاكمااااااااااااات الغريبة المريبة اللي بتحصل ومتشطرين علي امين شرطة غائب الله اعلم مين اللي مغيبه
الحل في القصااااااااااااااص
العدل ياوزير العدل
العدل ياعصام ياشرف
التااااااااار كبير بين الشرطة والشعب
فين الكفن والخروف

هناك 18 تعليقًا:

Tarkieb يقول...

الحل والله زي ماحماس عملت جهاز شرطة جديد خالص

Baskouta يقول...

و كأن الشرطة اختفت الفترة اللي فاتت وغابت عن دورها الاصلي بس علشان يلتقطوا انفاسهم ويجهزوا نفسهم للمعركة القادمة وطبعا تكون بمنتهى الشراسة
ويبقى الشعار
الشرطة تنتقم من الشعب

حسبنا الله عليه توكلنا نعم المولى ونعم النصير

مامة مازن يقول...

والله العظيم مش فاهمة أى حاجة
بفتح جهاز المصايب والكوارث المسمى بالتلفاز لقيت كارثة امبارح لا وايه مستمرة لليوم
والله العظيم بقيت اخاف اشترى جرايد او اقراها ع الويب و بخاف جدا من فتح التليفزيون ونفسى مش بتطاوعني اطنش اخبار بلدى لكن اخبار بلدى مبقتش تسر مفيش حاجة تفتح النفس قلبى ما ارتاحش من 11 فبراير اللى فات الدنيا ممشيتش زى ما كنت بتمناها المقتول اتقتل وقتيله لسه عايش واغلبهم احرار واللى سرق سرق ومرجعناش منه حاجة والجعان لسه جعان واللى مش لاقى حالته عدم واللى مش شغال برضه مش شغال
فى حاجة غلط
بجد والله مش فاهمة منين مودى على فين

Bent Men ElZman Da !! يقول...

انا مش فاهمه هما ليه بيعملوا كده
المشكله مش طلعت فى نظام بس
المشكله طلعت فى نفسيات اشخاص مش هتتغير
والحل ان الاشخاص دول نفسهم يتغيروا
ربنا يستر على اللى جاى

الازهرى يقول...

شفت
بعينى ما حدش قال لى

وقلت بلسانى محدش مصدقنى

كل حاجة هترجعنا التحرير تانى

يبقلا نريح دماغنا ونعمل أماكن ضيافة هناك ويجيبوا لنا فروع ماكدونالدز لحد ما نشبع

وبلاها دولة

مصطفى سيف الدين يقول...

يا مدام شمس السيناريو هابط ليه؟ وايه اللي يخلينا ننزل ندافع عن ناس داخلة بالشوم وتكسر وايه اللي يخلي وزارة الثقافة تكرم ناس وناس لاء
انا حاسس اننا كشعب بقينا شبه الدمية اللي بتتحرك بخيوط ماسكها انسان خفي لابس اسود وراه خلفية سودة حتى الجماهير اللي بتتفرج مش عارفاه
واحد يكتب على تويتر اجري يا معلم كله ينزل بنتضرب الكل ينزل يآجر وبدل ما كانوا عشر بلطجية والداخلية وقفالهم بقيوا الافات كلهم من الثوار والمتظاهرين الحقيقيين وتبدا المشادات والمشابكات على خلفية ان الشعب مش طايق الشرطة والراجل اللي لابس اسود في الخلفية السودة يضحك ويكركر بس حتى الجماهخير اللي بتتفرج عليه في المسرح مش سامعة ضحكته لان الجماهير بطلت تسمع غير صوتها علشان المجلس العسكري والحكومة فقدت مصداقيتهم والسلفيين فقدوا مصداقيتهم عند الليبراليين والليبراليين فقدوا مصداقيتهم عند السلفينن ومحدش بقي يسمع ولا عايز يسمع
هي دي الديمقراطية؟
نيجي للاعلام بقى مين بقى بيصدق اي قناة؟ محدش طبعا بسبب خلفية الكدب والخداع بتاعت القنوات دي المترسبة في عقولنا
حاليا الكل على الفيسبوك وتويتر وبياخد المعلومة منهم من اشخاص غير موثوق فيهم وبالتالي تاهت الحقيقة وسط ملايين القصص وفي النهاية اللي ظهر قدامنا سيناريو هابط
طيب ايه الحل هاقولها وبكل تفاؤل معرفش اي حل
تحياتي

مونتي بوكيه ورد يقول...

بكل بساطة احساس اناني لما كل واحد بيفكر في نفسه وبس
الشرطه فيها الحلو و ال اتغطي عليه بسبب ال فرحان بشكل المسدس علي بروفايله وكأنه أعلي من الناس و اتولد عشان يبقي ولي عليهم
مع ان في ال زيه واحسن منه و مش كاتب حتي انا شرطي وفاصل نفسه عن شغله عشان يعيش حياه طبيعيه
ودي بقي بعض التعليقات هسيبها بدون ذكر اسامي ال كاتبينها من الطرفين الشرطة والشعب ال هما في النهايه كايان واحد مصريين ضد البلطجة و العدو و الفتنه و أي ضرر يلحق ببلدنا العظيمه مصر
-----------------------------------
دا رد بنت مع الشرطة وظطز في الشعب
نفسى حد يطلع يقول بخ للشعب يحسسهم ان فية راجل للبلد دى .........حتى بيان القوات المسلحة ومع احترامى ليهم .........كان فاضل يقولو ونهيب بالشعب الامور ارجوكو بليز بلاش شقاوة عشان عمو كبير الجيش بيضايق
اية بقى مش حينفع كدة عايزين رد رادع البلد حتغرق
--------------------
ودا رد ساره من اصدقاء الشرطة داخله تهدي النفوس

من متابعتي لأراء بعض الشباب من بني وطني ... إكتشفت .... أنهم يريدون جهاز شرطة مسأط البنطلون و مبين البوكسر و حاطط في جانبه مسدس ميه ... عاشان يعرفوا يلعبوا معاه بوليس و حرامي أو إستغمايه
-------------------
ودا رأي ظابط
هيه لو الشرطه مكنتش نزلت امبارح كان الاعلام هيقول عليها ايه طبعا وحشيين وشرييرين وفلول اخر حاجه وانفلات اخر حاجه
------------------
ودا كمان رأي ظابط
تانى
مطلوب بلاغ رسمى ضد شباب ائتلاف الثوره اللى كان بيحرض الناس امبارح على الهوا الناس انها تنزل وتشتبك مع الشرطه و حركه 6 ابريل اللى دعت لاعتصام مفتوح وطلبت المسانده من انحاء الجمهوريه بالاضافه لل...... اسماء محفوظ ونواره نجم اللى عمالين يحرضو الناس على صفحتهم ضد الشرطه متهيالى كده الموضوع بقا واضح ومعروف مين اللى عايز يخرب البلد احنا هنسكت ليه وليه الكل خايف يقول ان العيال بتوع الثوره دول هما اللى خربوها
------------------
ودا .. بوست واضح
لو الشرطه قفلت لمده شهر الثوار حيخلصوا علي بعض لوحديهم

------------------

ودا كمان رأي ظابط
اريد ان أسال كل من في ميدان التحرير لماذا ذهب الى هذا الميدان وما الدافع اللذي دفعه الى ذلك ...???
لا إجابة غير انه سمع من ذلك او ذاك ان الامن المركزي يعتدي على المتظاهرين فقرر الذهاب لنصرة المتظاهرين من يد الشرطة كأنه يملك ما لايملكه غيره .... اين العقل والحكمة ان كل من يحمل حجرا او يرفع اي نوع من انواع السلاح على رجل من رجال الشرطة او الجيش هو بلطجي مخرب يجر البلد الى الهاوية واصبح واضحا وضوح الشمس ان هناك من يدفع الكثير من الاموال ليدفع بهذه البلد الى طريق التأخر والضعف ...
--------------------
يا جماعه الفتنه زي الفيرس وباء بينتشر في الجسم بسرعه مل واحد بيبص لنفسه ساعتها و بيبقي شايف ان ال تاني عدوه وبس .. ومحدش بيبص اننا كلنا ممكن يكون مضحوك علينا وبيضحك علينا من اعدائنا و احنا عمالين نكره بعض ونقتل في بعض
كل واحد شاف نفسه الصح .. ودلوقتي شايفين ال بيجرا لبلدنا ..

لمصلحة من .. لشماته من اكيد في كتير عارفين الاجابه
لك الله يا مصر

مونتي بوكيه ورد يقول...

صديقي العزيز مصطفي .. ردك جميل ورائع حقيقي

سواح في ملك اللــــــــــــــــــه- يقول...

مش عارف

بس انا الامور اختلطت في دماغي

مش عارف الحقيقة فين

ومين اللي بيحرك البلطجية دول

ولما فيه بلطجية والامن شايفهم يالعين المجردة

الامن سايبعم ليه

مقبضش عليهم ليه

شمس النهار يقول...

*Tarkieb
ماهم مش راضيين محسسنا ان الدنيا هتخرب

شمس النهار يقول...

*Baskouta

اللي غايظني انهم استوردوا قنابل مسييله للدموع بعد الثورة وبيقولوا اشد كمان

شمس النهار يقول...

*مامة مازن

واحنا اخدنا ايه من المطالب ارجعي كده للمطالب من اول يوم
ماتغيرش الهتاف من اول يوم لحد النهارده

شمس النهار يقول...

*Bent Men ElZaman Da !!

وهمه مين الاشخاص اللي اتغيروا
مافيش اغلب الناس في مكنها
اللي اتغيروا يتعدوا علي الصوابع
اومال الدنيا هايصة ليه

شمس النهار يقول...

*الازهرى

انا بقول بدل نصب الخيم والتعب يعملوا بيوت او كباين للمعتصمين
:)

شمس النهار يقول...

السناريو هابط علشان كل اللي انت قلته
وكمان كان لازم يجددوا عن كده

الحل هو القصاااااااااااص
الناس تحس ان اقتص من الناس دي

شمس النهار يقول...

*مونتي بوكيه ورد

اشكرا علي التعليق

استخلصت من كلام الناس ان مصر فيها ناس مش مصدقة ان احنا في ثورة اصلا

فعلا يامونتي مصطفي عامل تعليق جميل

شمس النهار يقول...

*سواح في ملك الله

الشرطة سايبة البلطجية علشان همه حبايب اوي من زمان

إيمان هلال يقول...

لا جديد انها الشرطه المصريه إعتدنا على الإهانه وأصبحت جزء من شعب يعشق الصمت ، كل الاوراق تعود الى اماكنها