الثلاثاء، 21 يونيو 2011

لوكنا بنحبها

في بداية البوست احب اهدي اغنية لوكنا بنحبها
لأبني ذو النون المصر العائد بأذن الله الي ارض الوطن مصر
ترجع مصر بالسلامة
--------
لوندوووووره الجبل
ده لينك بوست قديم كتبته عن انجلترا الجبل بتاعت المطاريد
يعني ايه بطرس غالي يتحكم عليه ب30 سنة سجن في مصر ومحطوط في الاجندة الحمراء للأنتر بول وعااااادي بيتجول عااااادي في لندن
ليه الغرب بيتشدق بالحريات ومساندة الشعوب والحريات
وفي نفس الوقت متسترين علي كل الفارين من العدالة
مصر لازم بقا تاخد مواقف حازمة من الدول دي ونفضح الاعيبها في التستر علي المجرمين الفارين من بلدانهم عندهم
وبالنسبة للكابتن حسين سالم دي اخر اخباره
-----------
اخيرااااااااااا تم الاعتراف بمرض اللامبارك الحقيقي
بالذمة دي عقليات كانت بتحكمنا
يصبغ شعره ويخفي مرضه للدرجة دي كانوا فاهمين اننا سازجين
ويحبسوا ابراهيم عيسي ويقعدوا يخبوا كل ده علشان ايه
والاعلان دلوقتي علشان مايتحاكمش علشان موضوع القلب مانفعش قالك يبقا سرطان
عموما هو كده اخد عدالة ربنا وداق السرطان اللي دوقه للشعب المصري من ادخال مواد مسرطنه من كل شكل ولون
لا ومدلعينه اخر دلع وجايبين له دكتور الماني يعالجه ده ياما ناس بريئه ماتت في السجون بسببه
طيب لما يجيله ملك الموت يبقا يوريني هيعمل ايه
----------
اكتر شئ استغربت له في خطاب فشار الفار
مش كلامه بالعكس انا كنت عارفه انه مش هيقول حاجه
وكلامه هيبقا من نوع سوف والشعب مندس ومؤامره
وكأن الشعب كله مندسين وهو الوحيد اللي وطني طيب ابقا عيش فيها لوحدك
ولما تقابل ربنا وايدك كلها دم هتقول لربنا ايه
الرئيس فيكم بيبقا مش عايز يمشي الا ومدمر تاريخه وكمان قاتله نص الشعب
المهم مش ده اللي استغربت له
استغرابي علي الحاضرين في القاعة للخطاب وكم التصفيق له ولا اللي حرر الجولان خلاص
بجد اندهشت اندهاشه ينفهش لها المنفهشين اجمعين
ايه ده يكونش دول اسفين ياريس فرع سوريا
:))))
والحمد لله زي ماتوقعت اول ماخلص الخطاب اللي ماطلعش قبل كده في المظاهرات طلع بعد الخطاب
------------
هو مش البرادعي قال ميت مره انه ماعندوش اي جنسية اخري
ايه موضوع القضية اللي مرفوعة عليه دي علشان سحب الجنسية منه
صحيح مصر ام العجايب
-----------
بن علي اتحاكم واخد حكم وبرضوا بيكدب وبيقول ماعنديش فلوس بره ولاجو تونس ياعيني غلبان
واللامبارك قال نفس الكلام اومال ايه الاموال اللي اعلن انها اتجمدت دي مش عارفة
ومجنون ليبيا قال برضوا انه ماعندوش فلوس
وكذلك علي طالح وفشار الفار
الله لما انتوا فقراء واحنا واقفين عليكم بالخسارة كده
متبتين فينا ليه ومش عايزين تمشوا
وبعدين مش عيب تبقوا رؤساء قد الدنيا وتكدبوا وبعدين اللي بيكدب دلوقتي بيروح طره:))
---------

هناك 24 تعليقًا:

Ramy يقول...

و كأن كل الرؤساء العرب

رضعين على بعض (أسف للفظ)

بس دول مبيتعلموش

يا جدعان الفيلم متكرر يمكن مبيشفوش سيما (:

بالنسبة للغرب صدقينى الغرب او امريكا ليها مصلحتها فى الأول و الأخر

ما أخذ بالقوة لا يسترد إلا بقلة الأدب

tarek momen يقول...

فشار الفار مش هينخلع الا بخلع الضرس لان امريكا لا بتحبه و لا قادرة علي بعده هاتلاقي فين و احد زيه سايب الجولان من غير مايرفع منشه ذباب قدام اسرائيل

tarek momen يقول...

استاذ رامي
عجبني قوي اصطلاح ما اخذ بالقوة لا يسترد الا بقلة الأدب

tarek momen يقول...

استاذ رامي
عجبني قوي اصطلاح ما اخذ بالقوة لا يسترد الا بقلة الأدب

rack-yourminds يقول...

كل النظم العربيه القمعيه عقليتها واحده وكذلك نهجها

سواح في ملك اللــــــــــــــــــه- يقول...

صباح الفل

اولا بصي علي الرابط ده

وبعدين اعلق علي البوست

http://www.youm7.com/News.asp?NewsID=439313

سواح في ملك اللــــــــــــــــــه- يقول...

مش عدل ان المخلوع

يجيله دكتور الماني من برة

لو الكلام ده بيتعمل مع اي مسجون يبقوا

يعملوه مهعاه

*بشار الاسد عنده استعداد يستغني عن نص شعب

سوريا مقابل انه مينزلش من عالكرسي

* ايه حكاية معندهمش فلوس دي

هما كانوا رؤساء جمهوريات واللا بياعين

في سوق الجمعة

Lady E يقول...

برغم العراقة والحضارة وكل اللي درسته عن انجلترا الا انهم بيحبوا الفلوس اكتر ما بيحبوا اي حاجة تانية ومش كده وبس دول بيعتبروا العرب عموما أقل منهم وعندهم حق في كده للأسف !

هو انا ليه مش مصدقة ان اللامبارك مريض فعلا؟ هو السرطان هيجيله منين وهو مكنش بياكل اكل مسرطن أصلا !!

مبحبش اكمل خطابات فشار تحسي انه ده كان هيبقى مستقبل مصر لو جيمي كان مسك الحكم

العرب اتفقوا على الا يتفقوا لا في حكامهم كلهم كوبي وبست من بعض

Foxology يقول...

المشكلة انهم كلهم نفس النوعية سبحان الله نسخ مكررة من بعضهم البعض

ربنا يرحمنا من الأشكال دى بأأأأة

تحياتى

Haytham Alsayes يقول...

ههههههههههههه
عجبني اوى
اسفين ياريس فرع سوريا
صح والله
صقفوا 14 مرة !!

اساسا كلنا في الهم والطغيان عرب
لنا الله


تحياتي

شمس النهار يقول...

*Ramy

كل الرؤساء العرب كوبي بيست
:)))

فعلا لازم الغرب يعرف انه زبالة

وكفاية مواقفهم المايعة تجاه العرب

شمس النهار يقول...

*tarek momen

المشكلة مع فشار الفار انه مش لوحده العيلة كلها هي اللي بتحكم سوريه

شمس النهار يقول...

*rack-yourminds

عندك حق

بس بقالك مدة مش بتتناقش وتعلق تعليقات مطوله

:))
خير مالك ياولدي للدرجة دي حال البلد بقا اكبر من الكلام
:))

شمس النهار يقول...

*سواح في ملك الله

لما قريت الخبر ده وتفاصيله جالي صداع
اشخاص من مصر اسرائيل بتمجدهم يخربيت كده

اما فشار الفار هو مش هيلاقي شعب يحكمه بعد كده من كتر الدبح اللي بيعمله

شمس النهار يقول...

*Lady E

الانجليز مش بس بيموتوا في الفلوس دول بيحتقروا العرب ليييييييه؟؟
مش قادرين ينسوا اننا كنا قطعة من الامبراطورية اللي كانت لاتغيب عنها الشمس

لا صدقي ماهو الجزاء من صنف العمل وده حكم ربنا فيه
وهو عنده من زمان وكان في تكتم ولما ابراهيم عيسي نشر الكلام ده قبضوا عليه

وطبعا الحمد لله ان جيمي ماقدرش يوصل لأي حاجه
زي اخواته فشار وسيف القزافي

شمس النهار يقول...

*Foxology

ماتقلقش ياابو يوسف
نصر الله قريب

اليمن وليبيا وسوريا هينضفوا من السفاحين قريب

شمس النهار يقول...

*Haytham Alsayes
المصفقتيا في الوطن العربي واحد ياهيثم

علي فكرة تعليقك في البوست السابق اللي هروح ارد عليه هو كمان حطيته عندي علي الفيس بوك الشخصي مش بتاع شمس النهار
:))

Tamer Nabil Moussa يقول...

السلطة تعمى الابصار وتغلق القلوب وتجعل الصادق كاذب هولاء الظالمين حسابهم الكبير عند ربنا

مع خالص تحياتى

Bent Men ElZman Da !! يقول...

من كتر من سمعت عن اخبار حسين سالم ده
مابقتش عارفه ايه الصح وايه الغلط

مش مصدقه صراحه حكايه ان عنده السرطان دى مش لانه حصن منيع مثلا بس حسيتها حجهاادام حجه القلب مانفعتش

اكتشفنا على حين غره كده ان كل رؤساء الدول العربيه متبعين نفس المنهج
الشعب مقابل الكرسى...نفسى افهم ليه

دعاء العطار يقول...

" بجد اندهشت اندهاشه ينفهش لها المنفهشين اجمعين
ايه ده يكونش دول اسفين ياريس فرع سوريا "

هههههههههههههههههههههه

ده اسفين ياريس ليها فروع كتييييييييير مش بس سوريا

عارفه المفروض المسجين ولبلطجيه يطالبوا انهم هما كمان يدلعوا الدلع ده لاء وكمان أضعافه

بجد حاجه تنرفز أووووووى ... يبقول مجرمين وقتالين قتله وحراميه وسارقين خير البلد ويجيلهم دكتور المانى يعالجهم

ياحللووووووووووولى ياحلولى

ألف حمدالله على سلامة ابن حضرتك (:

شمس النهار يقول...

*Tamer Nabil Moussa

همه بيبتدوا كويسين وبعد ماالشعب مابيألهم
بيلصقوا في الكرسي
ومابيطلعوش غير بالدم

شمس النهار يقول...

Bent Men ElZaman Da !!

لا فعلا هو عنده بس كانوا مخبيين علينا وقالك دي المراره
:))
هو اللي فقع مرارتنا

عقبال باقي الحكام العرب الظلمين منهم وهم كثروا

شمس النهار يقول...

*دعاء العطار

اللي يلاقي الدلع ولا يدلعش يبقا حمااااااااار

وقالك ايه اللي ماتوا في ملابس السجن مش شهداء واللي ماتوا امام الاقسام مش شهداء
واللي نهبنا بنجيب له دكاتره من بره

ذو النون مدون من ابنائي المدونين وله اكتر من مدونة واتشرف ان يعتبرني زي والدته
وهو في بلاد الغربه وسوف يعود الي مصر قريبا ده ان ماكنش عاد فعلا الان

ذو النون المصري يقول...

الف شكر علي الهدية
اسعدتني جدا و الله
شكرا جزيلا